༸གོང་ས་མཆོག་གིས་ཨོ་ས་ཀ་གྲོང་ཁྱེར་གྱི་སློབ་གྲྭ་ཆེ་བའི་སློབ་མ་ ༣༠༠༠ བརྒལ་བར་བཀའ་སློབ་སྩལ་བ།

གསར་ལས་ཁང་གི་གསར་འགོད་པས།

༢༠༡༦-༡༡-༡༠

༢༠༡༦ ཟླ་ ༡༡ ཚེས་ ༡༠ རེས་གཟའ་ཕུར་བུ།

2016-11-10-osaka-g01-20161110-_mn_3323-copy

Photo Courtesy /Masaya Noda

༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༡༠ ཉིན་༸གོང་ས་མཆོག་གིས་ཉི་ཧོང་གི་གྲོང་ཁྱེར་ཨོ་ས་ཀའི་ Osaka སེ་ཕུ་སློབ་གྲྭ་ཆེ་བའི་ Seifu High School ནང་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་གྱིས་ཆིབས་སྒྱུར་བཀའ་དྲིན་བསྐྱངས་ནས་སློབ་མ་གྲངས་ ༣༠༠༠ བརྒལ་བར་དུས་རབས་ ༢༡ ནང་པ་ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན།

2016-11-10-osaka-g02-20161110-_mn_3457-copy

Photo Courtesy /Masaya Noda

ངོས་རང་དེ་རིང་འདིར་ཡང་བསྐྱར་སླེབས་ཏེ་ཁྱེད་རང་ཚོ་འཁྱུག་ཙམ་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ཁྱེད་རང་ཚོ་དུས་རབས་ ༢༡ མི་རབས་ཆགས་ཡོད། འདས་པའི་དུས་རབས་དེ་ད་ཆ་ཡོལ་ཟིན་སྟབས་བཟོ་བཅོས་རྒྱག་རྒྱུ་མེད། མ་འོངས་པ་ད་ལྟ་འབྱུང་འགྱུར་རེད། དེར་བརྟེན་ད་ལྟའི་ང་ཚོའི་བྱེད་སྟངས་ལ་བརྟེན་ནས་མ་འོངས་པར་འགྱུར་བ་འགྲོ་རྒྱུ་ཡོད།

2016-11-10-osaka-g03-20161110-_mn_3564-copy

Photo Courtesy /Masaya Noda

དུས་རབས་ ༢༡ སྐབས་ཀྱི་བྱིས་པ་ཁྱེད་རང་ཚོས་ཕུགས་རྒྱང་རིང་པོ་དང་བསམ་བློ་རྒྱ་ཆེན་པོའི་ཐོག་ནས་འབད་བརྩོན་བྱས་ན་འབྲས་བུ་བཟང་པོ་ཞིག་ཁྱེད་རང་ཚོའི་མི་ཐོག་སྐབས་མཐོང་ཐུབ་རྒྱུ་རེད། དེར་བརྟེན་ཁྱེད་ཚོ་གཞོན་ནུ་ཚོའི་ལག་ཏུ་ཡོད། ང་ཚོ་གྲས་རྒས་འཁོགས་ཚོ་དུས་རབས་ ༢༠ མི་ཆགས་ཡོད། ང་ཚོའི་རེ་བ་རྒྱག་ས་ནི་དུས་རབས་ ༢༡ མི་རབས་གསར་པ་ཁྱེད་རང་ཚོ་ཆགས་ཡོད།

2016-11-10-osaka-g04-20161110-_mn_3626-copy

Photo Courtesy /Masaya Noda

འདས་པའི་དུས་རབས་ ༢༠ དེ་བདེ་སྐྱིད་ལྡན་པ་ཞིག་བྱུང་ཡོད་ན་དེ་ག་མུ་མཐུད་ནས་འགྲོ་རྒྱུ་བྱུང་ཡོད། འོན་ཀྱང་དེ་འདྲ་ཕལ་ཆེར་བྱུང་མེད། དུས་རབས་ ༢༠ ནང་དམག་འཁྲུག་མང་པོ་བརྒྱབ་ཡོད། ལོ་རྒྱུས་སྨྲ་བ་ཚོས་བཤད་པ་ལྟར་ན་ཕལ་ཆེར་མི་ས་ཡ་ཉིས་བརྒྱ་ལྷག་ཙམ་བསད་པའི་ལོ་རྒྱུས་ཡོད། ངོས་ཀྱི་མི་ཚེ་ལ་ཆ་བཞག་ན། ངོས་རང་ཕྱི་ལོ་ ༡༩༣༥ ལོར་སྐྱེས་ཤིང་། དེ་དུས་རྒྱ་ནག་དང་ཉི་ཧོང་དམག་འཁྲུག་འགོ་འཛུགས་རྒྱུའི་མཚམས་ལ་སླེབས་འདུག ཡུ་རོབ་ལ་ཆ་བཞག་ན། ན་ཛིའི་སྟོབས་ཤུགས་ཡར་སླེབས་ཏེ་གང་ལྟར་དམག་ཆེན་གཉིས་པ་འགོ་འཛུགས་རྒྱུའི་དུས་ཚོད་སྐབས་སུ་ངོས་རང་སྐྱེས་པ་རེད། དེ་ནས་དམག་ཆེན་གཉིས་པ་དང་ཀོ་རི་ཡའི་དམག ཝེ་ཐི་ནམ་དམག རྒྱ་ནག་ནང་དུ་ནང་འཁྲུག་ཤོར་བ་སོགས་བྱུང་ཡོད།

Photo Courtesy /Masaya Noda

དེང་སྐབས་དཀྱིལ་ཤར་ཡུལ་གྲུ་ཁག་གི་ནང་འཁྲུག་པ་ཧ་ཅང་རྒྱག་བཞིན་ཡོད། ངོས་ཀྱིས་མི་ཚེ་འདིའི་ནང་འཁྲུག་པ་རྒྱུན་མ་ཆད་པ་བྱུང་བ་མཐོང་ཡོད། དེར་བརྟེན་དུས་རབས་ ༢༠ མིའི་ལོ་རྒྱུས་ཁྲོད་ཧ་ཅང་གལ་གནད་ཆེ་བའི་དུས་རབས་ཤིག་ཆགས་ཡོད། ཕྱོགས་གཅིག་ནས་དུས་རབས་དེ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད། ད་དུང་ཡང་འཛམ་གླིང་འདིའི་སྟེང་མི་གསོད་ཁྲག་སྦྱོར་ཡོང་བཞིན་པ་དེ། དུས་རབས་༢༠ ནང་གི་མིའི་བསམ་བློ་གཏོང་སྟངས་དེ་རང་རྒྱལ་གཞན་ཕམ་གྱི་ལྟ་བ་ཤུགས་ཆེན་པོ་ཡོད། འཚེ་བའི་ལམ་ལ་བརྟེན་ནས་རང་རྒྱལ་གཞན་ཕམ་གྱི་བསམ་བློ་བཏང་ནས་འགྲོ་བཞིན་ཡོད།

2016-11-10-osaka-g06-20161110-_mn_4006-copy

Photo Courtesy /Masaya Noda

དུས་རབས་ ༢༡ འགོ་སྟོད་དུ་ཡང་འཁྲུག་རྩོད་ཡོང་བཞིན་པ་དེ་དུས་རབས་ ༢༠ མིས་བསམ་བློ་གཏོང་སྟངས་ནོར་འཁྲུལ་ཕྱིན་ཏེ་ད་ལྟ་དུས་རབས་ ༢༡ འགོ་སྟོད་དུའང་མུ་མཐུད་རྙོག་གྲ་དེ་ལྟར་འབྱུང་བཞིན་ཡོད། དེར་བརྟེན་དུས་རབས་ ༢༠ དེ་བདེ་སྐྱིད་ལྡན་པ་ཞིག་ཆགས་མེད། དུས་རབས་ ༢༡ འདི་བདེ་སྐྱིད་ལྡན་པའི་དུས་རབས་ཤིག་བཟོ་དགོས་རྒྱུ་དེ་ཁྱེད་རང་ཚོའི་ལས་འགན་རེད།

སློབ་གྲྭའི་ཚོགས་ཁང་གསར་པ་དབུ་འབྱེད་མཛད་པ།Photo Courtesy /Masaya Noda

བདེ་སྐྱིད་ཟེར་བ་དེ་དཔེ་རུ་ཆ་བཞག་ན། མདུན་གྱི་མེ་ཏོག་འདི་དག་ང་ཚོར་བདེ་སྐྱིད་ཡོང་རྒྱུའི་ཆ་རྐྱེན་ཞིག་ལ་རྩི་བཞིན་ཡོད། རླུང་དང་དངངས་སྐྲག་ཧ་ཅང་ཡོད་སྐབས་མེ་ཏོག་གི་མཐའ་བསྐོར་ནས་བསྡད་ན་གང་འདྲ་འདུག་གམ། སོ་སོ་རླུང་ལངས་ཏེ་སེམས་འཁྲུག་པའི་སྐབས་སུ་གྲོགས་པོ་བློས་འཁེལ་བ་ཞིག་ཡོང་སྟེ་སེམས་གསོ་བཏང་ན་དེས་ཕན་པ་ཡོད། དེར་བརྟེན་བརྩེ་བ་ཟེར་བ་དེ་ཧ་ཅང་རྩ་ཆེན་པོ་རེད་འདུག

ཚོགས་ཁང་གསར་པའི་ནང་།Photo Courtesy /Masaya Noda

དུད་འགྲོ་ཡིན་ནའང་ཕར་བརྩེ་བ་བྱས་ན་ཚུར་དགའ་པོ་བྱེད་ཀྱི་ཡོད། ང་ཚོ་མི་ཡིན་ནའང་དུད་འགྲོས་ཚུར་བརྩེ་བ་བྱས་ན་དགའ་པོ་ཡོད། མེ་ཏོག་གིས་མི་ལ་ཚུར་བརྩེ་བ་བྱེད་རྒྱུའི་ནུས་པ་གང་ཡང་མེད། ནང་པའི་གཞུང་ནང་མེ་ཏོག་སོགས་ཕྱི་དངོས་པོ་དེ་དག་སེམས་མེད་བེམ་པོར་རྩི་བཞིན་ཡོད། ང་རང་ཚོ་སེམས་ལྡན་ཚོར་བདེ་སྡུག་ཅེས་པ་དེ་སེམས་ཀྱི་ཚོར་བ་ཞིག་ཆགས་ཡོད། དེ་ལྟ་བུའི་སེམས་ཀྱི་ཚོར་བ་དེ་སྡུག་བསྔལ་དང་མ་སྐྱིད་པ་ཡོད་པའི་སྐབས། དེ་དག་སེལ་ཆེད་སེམས་མེད་བེམ་པོས་སེལ་རྒྱུ་ཧ་ཅང་ཁག་པོ་རེད། སེམས་ལྡན་ཞིག་གིས་བརྩེ་བའི་རྣམ་འགྱུར་བསྟན་ན་སོ་སོའི་སེམས་འཁྲུག་བསྡད་པ་དེ་ཕྲན་བུ་ལྷོད་དུ་འགྲོ་རྒྱུར་ཕན་ཐོགས་ཡོད།

2016-11-10-osaka-g10-20161110-_mn_4475-copy

གསར་འགོད་པའི་དྲི་བར་བཀའ་ལན་སྩོལ་བཞིན་པ།Photo Courtesy /Masaya Noda

བདེ་སྡུག་ནི་སེམས་ཀྱི་ཚོར་བ་ནས་བྱུང་བ་ཞིག་ཡིན། གང་ལྟར་སེམས་མ་སྐྱིད་པ་ཡོང་རྒྱུ་དེ་གཙོ་བོ་ནི་ཁོང་ཁྲོ་དང་། འཇིགས་སྣང་གི་ཐོག་ནས་ཡོང་བཞིན་ཡོད། གཞན་གྱིས་རང་ལ་བརྩེ་བའི་རྣམ་འགྱུར་བསྟན་པ་ཡིན་ན་སོ་སོའི་སེམས་ལྷོད་ལྷོད་ཡོང་གི་ཡོད། དུས་རབས་ ༢༠ ནང་འཚེ་བ་ཡོང་རྒྱུ་དེ་མིའི་རང་བཞིན་ལྷན་སྐྱེས་དེ་འཚེ་བའི་རང་བཞིན་ཅན་ཆགས་མེད། དེ་ནི་ཚན་རིག་པ་ཚོས་ཞིབ་འཇུག་བྱས་ཏེ་མིའི་ལྷན་སྐྱེས་ཀྱི་རང་བཞིན་དེ་བྱམས་བརྩེའི་རང་བཞིན་ཅན་རེད་འདུག ཅེས་བརྟག་དཔྱད་ཀྱི་ལམ་ནས་ར་སྤྲོད་ཐུབ་པ་བྱུང་ཡོད།

2016-11-10-osaka-g11-20161110-_mn_4561-copy

གསར་འགོད་པའི་དྲི་བར་བཀའ་ལན་སྩོལ་བཞིན་པ།Photo Courtesy /Masaya Noda

ཇི་ཙམ་གྱི་སེམས་ནང་ཞི་བདེ་ཡོད་པ་དེ་ཚོད་ཀྱིས་འབྱུང་བ་དེ་དག་ཆ་སྙོམ་པ་ཡོང་གི་ཡོད། གང་ལྟར་སེམས་ལ་ཞི་བདེ་ཡོད་ན་ལུས་ཀྱང་བདེ་བ་ཡོང་གི་ཡོད། ལུས་བདེ་ཐང་གི་ཐོག་ནས་མི་ཚེ་རིང་པོ་ཡོང་བཞིན་ཡོད། སེམས་འཁྲུག་ན་ལུས་ཀྱི་འབྱུང་བ་དེ་དག་འཁྲུག་པའི་རྐྱེན་གྱིས་མི་ཚེ་ལའང་སྐྱོན་བྱེད་ཀྱི་ཡོད། མིའི་ལྷན་སྐྱེས་ཀྱི་རང་བཞིན་དེ་བྱམས་བརྩེ་ལྡན་པ་ཞིག་ཡིན་དུས་ང་ཚོས་རེ་བ་རྒྱག་ས་ཞིག་ཆགས་ཡོད། མི་ལ་ཐུན་མོང་མ་ཡིན་པ་དེ་གད་མོ་དགོད་རྒྱུ་དེ་ཡོད། ཅེས་སོགས་ཀྱི་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་སྩལ་ཡོད་པ་བཅས།།