༢༠༡༦ ཟླ་ ༡༡ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༢༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེན་པོ་ཧོར་གྱི་ཡུལ་དུ་མཛད་འཕྲིན་ཉིན་མཐའ་མའི་སྐབས་གསར་འགོད་པ་མི་གྲངས་ ༥༠ ཙམ་ལ་ཐེངས་འདིར་སོག་ཡུལ་ཁུལ་དུ་ཆིབས་སྒྱུར་དང་འབྲེལ་བའི་སྐོར་གྱི་དྲི་བར་བཀའ་ལན་སྩལ་དོན། གོང་དུ་དགའ་ལྡན་དགོན་པའི་མཁན་པོས་གསུངས་པ་ལྟར་རེད། ད་ཐེངས་ངོས་རང་ཆེན་པོ་ཧོར་གྱི་ཡུལ་དུ་ཡོང་ཐེངས་དགུ་པ་ཆགས་ཡོད། དེ་ཡང་བྲེལ་བ་ཚ་པོ་བྱས་ནས་ཉིན་ཤས་དེའི་རིང་ལ་དོན་སྙིང་ལྡན་པ་ཞིག་བྱུང་། ངོས་རང་ཉིད་ཀྱང་ཧ་ཅང་དགའ་པོ་བྱུང་། ངོས་རང་ས་གནས་གང་དུ་ཕྱིན་ཡང་ངོས་ཀྱི་བསམ་བློའི་ནང་ལས་འགན་རིམ་པ་དང་པོ་འདི་འཛམ་གླིང་འདིའི་སྒང་ལ་མི་དུང་ཕྱུར་ ༧༠ ཙམ་ཡོད་པ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་མཁན་ཤ་སྟག་རེད། འོན་ཀྱང་སྡུག་བསྔལ་མང་པོ་ཞིག་ང་རང་ཚོ་མི་རང་གིས་བཟོས་པ་ལྟ་བུ་འདུག རྩ་བ་ཐུག་ས་དེ་ཆགས་སྡང་དབང་གིས་ཡོང་བཞིན་ཡོད་པ་ཧ་ཅང་གསལ་པོ་རེད།
དེའི་ཐོག་ལ་ཆོས་ཁས་ལེན་མཁན་དང་མི་ལེན་མཁན་ཡིན་ནའང་རེད། གང་ལྟར་ཆགས་སྡང་གིས་ང་ཚོར་རྙོག་གྲ་བཟོ་བཞིན་ཡོད་པ་འདི་ངོ་སྤྲོད་བྱ་རྒྱུ་དང་། གཞི་རྩའི་མིའི་རང་བཞིན་བྱམས་བརྩེ་ལྡན་པ་རེད། ཅེས་ཚན་རིག་པ་དེ་དག་གིས་བརྗོད་བཞིན་ཡོད། ང་རང་ཚོའི་རང་བཞིན་ལྷན་སྐྱེས་དེ་བྱམས་བརྩེའི་རང་བཞིན་ལྡན་པ་ཞིག་ཡིན་སྟབས་ང་ཚོས་འབད་བརྩོན་བྱས་པ་ཡིན་ན་ལྷན་སྐྱེས་རང་བཞིན་བྱམས་བརྩེའི་ནུས་པ་གོང་དུ་འཕེལ་བ་བརྒྱུད་སྤྱི་ཚོགས་ཞི་བདེ་ལྡན་པ་ཞིག་བཟོ་ཐུབ་རྒྱུའི་རེ་བ་ཡོད། ངོས་ཀྱི་ལས་འགན་རིམ་པ་དང་པོ་འདི་རེད།
རིམ་པ་གཉིས་པ་འདི་ངོས་རང་ནང་པ་ཞིག་ཡིན་པའི་ཆ་ནས་འཛམ་གླིང་འདིའི་སྒང་གི་ཆོས་ལུགས་མི་འདྲ་བ་ཡོད་པ་དེ་དག་ཚང་མ་བྱམས་པ་དང་བརྩེ་བ། བཟོད་པ་དང་ཆོག་ཤེས། ཞེས་བསླབ་བྱ་རྒྱག་མཁན་གཅིག་པ་རེད་འདུག ལྟ་གྲུབ་ཐོག་ལ་མི་འདྲ་བ་ཡོད། དེ་དགོས་མཁོ་ཡོད་པ་ཞིག་ཀྱང་ཡིན། མིའི་ཁམས་དང་མོས་པ་མི་འདྲ་བ་ལ་ལྟ་གྲུབ་མི་འདྲ་བ་དགོས་པ་ཞིག་ཆགས་ཡོད།
དེར་བརྟེན་ལྟ་གྲུབ་མི་འདྲ་བ་དེ་དག་གིས་ཁམས་དང་མོས་པ་མི་འདྲ་བའི་མི་ལ་ལྟ་གྲུབ་མི་འདྲ་བ་དེ་དག་གི་ཐོག་ནས་བྱམས་བརྩེ་གོང་མཐོར་སྤེལ་རྒྱུ་གཅིག་གྱུར་རེད་འདུག དེར་བརྟེན་ཆོས་ལུགས་ཚང་མ་མཐུན་སྒྲིལ་བྱ་རྒྱུའི་གཞི་རྩ་ཡོད་ལ་རྒྱ་གར་ལ་ཆ་མཚོན་ན་དཔེ་མཚོན་ཞིག་རེད་འདུག འཛམ་གླིང་འདིའི་སྒང་གི་ཆོས་ལུགས་གཙོ་ཆེ་བ་ཚང་མ་ཧ་ལམ་རྒྱ་གར་ནང་ཡོད།
གསུམ་པ་འདི་ངོས་རང་བོད་མི་ཞིག་ཡིན། བོད་ཀྱི་ཆབ་སྲིད་འགན་འདི་ཕྱི་ལོ་ ༢༠༡༡ ལོར་ངོས་ཀྱིས་ཆ་ཚང་བཞག་ཟིན་པ་ཞིག་རེད། ཆབ་སྲིད་འགན་འདི་འོས་བསྡུ་བྱས་པའི་ཆབ་སྲིད་འགོ་ཁྲིད་ཀྱིས་འགན་འཁྱེར་བཞིན་ཡོད་སྟབས་ངོས་ལ་འགན་མེད། ངོས་ཀྱིས་ད་ལྟ་འགན་གང་ཞིག་འཁྱེར་བཞིན་ཡོད་བརྗོད་ན། བོད་ཀྱི་ཆོས་དང་རིག་གཞུང་། སྐད་ཡིག་ཟུར་གསལ་ཞིག་ཡོད། སངས་རྒྱས་པའི་ཆོས་ལ་མཚོན་ན་དཔལ་ནཱ་ལེནྡྲ་ནས་བརྒྱུད་པ་ཞིག་རེད། ངོས་ཀྱིས་འདིར་ཧ་ལམ་ཕྱེད་ཀ་ཀྲོག་ཀྲོག་ལྟ་བུ་ཆགས་བཞིན་འདུག གང་ལྟར་དཔལ་ནཱ་ལེནྡྲའི་ཆོས་བརྒྱུད་ཀྱི་སངས་རྒྱས་པའི་ལྟ་གྲུབ་ཚད་མའི་ལམ་ནས་གཏན་ལ་དབབ་རྒྱུ་འདི་བོད་པ་ཁོ་ནར་མ་གཏོགས་མེད་པ་ལྟ་བུ་འདུག གང་ལྟར་ནཱ་ལེནྡྲའི་ལྟ་གྲུབ་དེ་དངོས་ཡོད་གནས་ཚུལ་ལ་ཞིབ་འཇུག་བྱས་ནས་འགྲོ་རྒྱུ་ཞིག་རེད་མ་གཏོགས། དད་པ་གཅིག་པོའི་ཐོག་ནས་འགྲོ་རྒྱུ་ཞིག་མ་རེད།
གནམ་ཐང་དུ་དགའ་ལྡན་དགོན་པའི་དགེ་འདུན་པ་སྐུ་བགྲེས་པ་ཁག་གཅིག་ལ་མཇལ་ཁ་དང་བཀའ་སློབ་སྩོལ་བཞིན་པ།
དེར་བརྟེན་འདས་པའི་ལོ་ ༣༠ ལྷག་རིང་ངོས་ཀྱིས་ཚན་རིག་པ་དང་ལྷན་འབྲེལ་བ་ཧ་ཅང་བྱུང་ཡོད། བོད་ཀྱི་ཆོས་དང་རིག་གཞུང་། ཁོར་ཡུག་བཅས་སྲུང་སྐྱོབ་བྱ་རྒྱུ་དེར་ངོས་ཀྱི་མ་འཆི་བར་དོ་སྣང་བྱས་ནས་སྡོད་ཀྱི་ཡོད། ཧོར་གྱི་ཡུལ་འདིར་མཚོན་ན་ང་ཚོ་ཧ་ལམ་ལོ་ངོ་སྟོང་ཕྲག་གཉིས་གསུམ་རིང་ནས་འབྲེལ་བ་ཤུགས་ཆེན་པོ་བྱུང་ཡོད། ནང་ཆོས་མ་དར་གོང་ནས་ཕལ་ཆེར་འབྲེལ་བ་ཡོད་རེད་བསམ་བཞིན་འདུག ང་ཚོ་མིའི་ཕུང་པོའི་གྲུབ་ཆ་ནས་བརྩི་བ་ཡིན་ནའང་བོད་མི་དང་སོག་པོ་གཉིས་ཀའི་ལུས་པོའི་སྟེང་ནག་བྲིས་ཡོད་པ་གཅིག་པ་རེད་འདུག གང་ལྟར་ང་ཚོའི་རིག་གཞུང་གོམས་འདྲིས་མང་པོ་ཞིག་ཐོག་ནས་སྔ་མོ་ཡིན་ན་དབུས་ཨེ་ཤི་ཡ་དེའི་ནང་འབྲེལ་བ་ཧ་ཅང་ཡོད་ས་རེད།
བར་སྐབས་སོག་ཡུལ་ནང་ལ་མཚོན་ན་དཀའ་ངལ་ཧ་ཅང་འཕྲད་ཡོད་ཀྱང་ད་ཆ་རང་དབང་ཐོབ་ནས་ཁྱེད་ཚོས་ཀྱང་སོ་སོའི་ཆོས་དང་རིག་གཞུང་དེ་དག་ཉམས་པ་སོར་ཆུད་མི་ཉམས་རྒྱུན་འཛིན་ཡོང་སླད་ཁྱེད་ཚོས་འབད་བརྩོན་བྱེད་བཞིན་འདུག ཧ་ཅང་ཡག་པོ་རེད། ཐུགས་རྗེ་ཆེ་ཞུ་རྒྱུ་ཡིན། དཔལ་ནཱ་ལེནྡྲའི་ལྟ་གྲུབ་ཉམས་པ་སོར་ཆུད་མི་ཉམས་གོང་འཕེལ་ཡོང་རྒྱུ་ཟེར་བ་དེ་ལྷ་ཁང་དང་སྐུ་འདྲ་ཙམ་བཞེངས་པ་དང་འདོན་པ་བཏོན་པས་ཕན་རྒྱུ་མེད། སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་འདུག ཅེས་སོགས་ཀྱི་བཀའ་སློབ་སྩལ་བསྟུན་གསར་འགོད་པ་ཁག་གཅིག་གི་དྲི་བར་བཀའ་ལན་སྩལ།
སྐབས་དེར་གསར་འགོད་པ་ཞིག་གིས་སྐུ་ཞབས་ཌོ་ནལ་ཊམ་ Donald Trump མཆོག་ཐེངས་འདིར་ཨ་རིའི་སྲིད་འཛིན་གསར་པར་འོས་འདེམས་བྱུང་བའི་ཐོག་དགོངས་ཚུལ་བཀའ་འདྲི་ཞུས་པར་བཀའ་ལན་སྩལ་དོན། ངོས་ཀྱིས་ཨ་རིའི་རྒྱལ་ཁབ་འདི་རང་དབང་ལྡན་པའི་འཛམ་གླིང་རྒྱལ་ཁབ་ཀྱི་སྣེ་འཁྲིད་མཁན་ཞིག་ལ་ངོས་འཛིན་བྱེད་བཞིན་ཡོད། འོས་བསྡུའི་སྐབས་འཁྲུག་ཆ་དོད་པོ་བྱུང་མིན་ལ་མ་ལྟོས་པར་མི་མང་ཚོས་ཐག་གཅོད་བྱས་ཟིན། འོས་བསྡུའི་སྐབས་འོས་མི་རྣམས་ལ་རང་ཉིད་གང་བཤད་ཀྱི་རང་དབང་ཡོད། འོན་ཀྱང་འོས་བསྡུ་ཟིན་རྗེས་རྒྱལ་ཁ་ཐོབ་མཁན་རྣམས་ཀྱིས་དངོས་ཡོད་གནས་ཚུལ་ལ་གཞིགས་ནས་དེར་འཚམས་པ་ཞིག་གི་ཐོག་ནས་ལས་ཀ་བྱེད་དགོས་པ་ནི་དངོས་ཡོད་རེད། དེར་བརྟེན་དེའི་ཐོག་སེམས་ཁྲལ་གང་ཡང་མི་འདུག སང་ལོར་ངོས་རང་ཨ་རིར་སྲིད་འཛིན་གསར་པ་ཁོང་དང་མཇལ་འཕྲད་ཞུ་རྒྱུའི་གོ་སྐབས་ཤིག་ཕལ་ཆེར་ཡོང་རྒྱུ་རེད། ཅེས་བཀའ་ལན་སྩལ།
རྒྱ་ནག་གཞུང་གིས་སོག་པོས་གཙོས་ཡུལ་གྲུ་གཞན་ལ་ཆིབས་སྒྱུར་དང་འབྲེལ་ནས་སུན་གཙེར་བཟོ་བཞིན་པའི་ཐད་དགོངས་ཚུལ་བཀའ་འདྲི་ཞུ་སྐབས་བཀའ་ལན་སྩལ་དོན། དེ་ནི་རྒྱ་ནག་གཞུང་གི་རྒྱུན་ལྡན་བྱ་སྤྱོད་ཅིག་ཡིན། ངོས་རང་བསྐྱོད་ཐུབ་པའི་ནང་པའི་རྒྱལ་ཁབ་གཉིས་ཁོ་ན་ཡོད་པ་ནི་སོག་ཡུལ་དང་ཉི་ཧོང་ཡུལ་གཉིས་ཡིན། རྒྱ་ནག་ནང་མཚོན་ན་རྒྱ་རིགས་ནང་པ་ས་ཡ་ ༤༠༠ ལྷག་ཡོད། ཁོང་ཚོ་མང་པོ་ཞིག་གིས་ངོས་རང་རྒྱ་ནག་ཏུ་ཡོང་རོགས་བརྗོད་བཞིན་འདུག འོན་ཀྱང་རྒྱ་ནག་གཞུང་གིས་ངོས་རང་ཁ་བྲལ་བ་རེད། ཅེས་སྐྱོན་བརྗོད་བྱེད་བཞིན་ཡོད།
དངོས་ཡོད་གནས་ཚུལ་ནི་ཕྱི་ལོ་ ༡༩༧༤ ཙམ་ནས་ངོས་ཀྱིས་རང་བཙན་མ་རྩོད་པར་དོན་དམ་རང་སྐྱོང་གི་གནས་བབ་ཚད་ལྡན་ཞིག་རྩོད་བཞིན་ཡོད། རྒྱ་རིགས་མང་པོ་ཞིག་གིས་ཤེས་ཀྱི་ཡོད། ཕྱོགས་མཚུངས་འཛམ་གླིང་ཁྱོན་དུ་ཤེས་ཀྱི་ཡོད། བོད་མིའི་ཁྲོད་ངོས་ཀྱི་རང་བཙན་མ་རྩོད་པ་དེར་སྐྱོན་བརྗོད་བྱེད་མཁན་ཡང་ཡོད། ངོས་ཀྱིས་དང་པོ་ནས་ང་ཚོ་རང་རྒྱལ་གཞན་ཕམ་གྱི་སྐད་ཆ་མིན་པར་ཕན་ཚུན་ཕྱོགས་གཉིས་ཀར་ཁེ་ཕན་ཡོང་རྒྱུར་བསམ་བློ་གཏོང་དགོས་འདུག ཅེས་བསམ་བློ་དེ་འདྲ་ཞིག་བཏང་བ་ཡིན། ཞེས་བཀའ་ལན་སྩལ་བ་སོགས་ཉིན་མཐའ་མའི་མཛད་འཕྲིན་ཁག་ཡོངས་སུ་ལེགས་གྲུབ་རྗེས་ཆིང་གེ་སི་ཁང་རྒྱལ་སྤྱིའི་གནམ་ཐང་བརྒྱུད་སླར་ཡང་ཉི་ཧོང་ཕྱོགས་སུ་མཛད་འཕྲིན་འཕྲོ་སྐྱོང་མཛད་ཆེད་ཆིབས་༸ཞལ་བསྒྱུར་ཡོད།
༸གོང་ས་མཆོག་གིས་ཉི་ཧོང་ནང་ཉིན་གཉིས་རིང་སྐུ་ངལ་གསོ་གནང་མཛད་རྗེས་ཕྱི་ཚེས་ ༢༦ ཉིན་ཉི་ཧོང་གི་གྲོང་ཁྱེར་ས་ཡི་ཏ་མའི་ Saitama ནང་མང་ཚོགས་ལ་བཀའ་སློབ་སྩལ་རྗེས་ཕྱི་ཉིན་རྒྱ་གར་དུ་ཆིབས་སྒྱུར་བསྐྱང་རྒྱུ་ཡིན་འདུག་པ་བཅས།།
