༢༠༡༦ ཟླ་ ༡༡ ཚེས་ ༡༦ རེས་གཟའ་ལྷག་པ།
༄༅། །ཉི་ཧོང་གི་ཀོ་ཡ་སན་ཞེས་མཛེས་སྡུག་ལྡན་པའི་གནས་རི་དེར་རྟེན་གཞི་བྱས་པའི་ཉི་ཧོང་ནང་གི་གསང་སྔགས་དགོན་པ་རྙིང་ཤོས་སུ་གྲགས་པ་ཀོན་གོ་བྷུ་ཇི་ Kongobuji དགོན་པ་དང་། ཀོ་ཡ་སན་ Koyasan མཐོ་སློབ་བཅས་ཀྱི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༦ ཟླ་ ༡༡ ཚེས་ ༡༤ ནས་དབུ་འཛུགས་ཀྱིས་ཕྱི་ཚེས་ ༡༥ བར་མཛད་འཕྲིན་རྒྱ་ཆེ་བསྐྱངས་གནང་མཛད། དེ་ཡང་ཕྱི་ཚེས་ ༡༥ ཉིན་སྔ་དྲོ་ཐོག་མར་༸གོང་ས་མཆོག་གིས་ཀོན་གོ་བྷུ་ཇི་དགོན་པའི་བཞུགས་གནས་གསོལ་མགྲོན་ཁང་ནས་ཆིབས་སྒྱུར་བསྐྱངས་ནས་ཉེ་འཁྲིས་ཀྱི་ཚོགས་ཁང་ཞིག་ཏུ་དུས་རབས་ ༢༡ ནང་པ་ཚོའི་ལས་འགན། ཞེས་པའི་བརྗོད་གཞིའི་ཐོག་བཀའ་སློབ་སྩལ།
དེ་ཡང་ཐོག་མར་བཀའ་སློབ་དབུ་འཛུགས་མ་མཛད་གོང་མགོན་པོ་གང་ཉིད་མཆོག་གིས་ཚོགས་བཅར་བ་རྣམས་ཀྱི་དྲི་བར་བཀའ་ལན་སྩལ། སྐབས་དེར་དྲི་བ་ཞུ་མཁན་མང་བ་བུད་མེད་ཡིན་འདུག་ཅིང་། ཐོག་མར་དགེ་འདུན་པ་ལོ་ན་གཞོན་པ་རྣམས་ལ་བཀའ་སློབ་ལམ་སྟོན་ཇི་ཡོད་དང་། དབུལ་ཕྱུག་བར་ཁྱད་སྐོར་གྱི་དྲི་བར་བཀའ་ལན་སྩལ་དོན། ཡེ་ཤུའི་གྲྭ་བཙུན་རྣམས་ཀྱིས་གཞན་ལ་སྦྱིན་པ་གཏོང་རྒྱུའི་ལམ་སྲོལ་བཟང་པོ་དེར་ང་ཚོས་ངེས་པར་དུ་མིག་དཔེ་བལྟ་དགོས་པ་ཞིག་རེད་འདུག
སྤྱིར་སྒེར་པ་སོ་སོ་དབུལ་ཕྱུག་གི་གནས་སྟངས་དེ་ལས་འབྲས་དང་འབྲེལ་ཡང་། ཕྱུག་པོ་ཚོས་དབུལ་ཕོངས་ཉམ་ཐག་རྣམས་ལ་མི་གཅིག་གྱུར་གྱི་འདུ་ཤེས་ཐོག་ནས་རོགས་རམ་ཤུགས་ཆེ་ཙམ་གནང་དགོས། སྐྱོ་པོ་ཚོས་ཀྱང་ཡིད་ཞུམ་ནས་མ་བསྡད་པར་ངས་ཀྱང་འཇོན་ཐུབ་རྒྱུ་རེད་བསམས་ནས་སེམས་ནང་བློ་སྤོབས་བསྐྱེད་ནས་འབད་བརྩོན་བྱེད་དགོས། ཞེས་བཀའ་ལན་སྩལ།
དེ་རྗེས་ཚོགས་བཅར་བ་གཞན་ཞིག་གིས། སྡུག་བསྔལ་གྱིས་མནར་བ་རྣམས་ལ་སྐྱོབ་ཐབས་ཇི་ལྟར་བྱེད་ཐུབ་མིན་གྱི་དྲི་བར་བཀའ་ལན་སྩལ་དོན། སྤྱིར་བསམ་བློའི་ནང་དཀའ་ངལ་ཇི་ཙམ་ཡོད་པ་ཕྱིར་དེ་ཙམ་མངོན་མི་ཐུབ་ཀྱང་ལུས་ལས་སེམས་ནང་གི་སྡུག་བསྔལ་དེ་ཚབས་ཆེ་བ་ཡོད། དེར་བརྟེན་ང་ཚོས་གཙོ་བོ་སེམས་ཀྱི་སྡུག་བསྔལ་སེལ་རྒྱུའི་ཐོག་བསམ་བློ་ཤུགས་ཆེ་བ་གཏོང་དགོས། སངས་རྒྱས་བཅོམ་ལྡན་འདས་ཀྱིས་འགྲོ་བ་རྣམས་སྡུག་བསྔལ་ལས་སྐྱོབ་སྐབས་སྡིག་པ་རྣམས་ཆུས་མི་ཁྲུས་ཤིང་། སྟོན་པ་རང་ཉིད་ཀྱིས་ཞལ་ནས། ངས་ནི་ཁྱེད་ལ་ཐར་པའི་ལམ་སྟོན་གྱིས། ཐར་པ་རང་ལ་རག་ལས་ཤེས་པར་བྱ། ཞེས་གསུངས་པ་ལུང་འདྲེན་མཛད་རྗེས།
དུས་རབས་ ༢༡ ནང་པ་ཚོའི་ལས་འགན། ཞེས་པའི་བརྗོད་གཞིའི་ཐོག་བཀའ་སློབ་དབུ་འཛུགས་མཛད་དོན། སྤྱིར་ནང་ཆོས་སྤྱི་དང་དེའི་ནང་ཚན་ནས་དཔལ་ནཱ་ལེནྡྲའི་བཞེད་སྲོལ་དེ་དག་ག་དུས་ཡིན་ནའང་རྒྱུ་མཚན་ལ་བསམ་བློ་བཏང་ནས་རིག་པའི་ལམ་ནས་བརྟག་དཔྱད་ལ་གཙོ་བོ་གཞིར་བཞག་པའི་ཐོག ཆོས་རྣམས་ཀྱི་དོན་དམ་གྱི་གནས་ལུགས་མཐར་ཐུག་གང་ཡིན་པ་ཤེས་ཐབས་གནང་བཞིན་ཡོད་པ་ལས། དད་པ་དང་རྨོངས་ཞེན་བྱས་ནས་རྩ་བ་ནས་འགྲོ་ཡི་མེད། དེ་ནི་དེང་དུས་ཚན་རིག་དང་ཧ་ཅང་མཐུན་པོ་ཡོད་ཅིང་། དེར་བརྟེན་རིག་པའི་ལམ་ནས་དཔྱད་པ་བྱ་རྒྱུ་འདི་ཧ་ཅང་གནད་འགག་ཆེན་པོ་ཞིག་འདུག
དུས་རབས་ ༢༡ ནང་ཆོས་བརྗོད་སྐབས་འདོན་པ་འདོན་རྒྱུ་ལྟ་བུ་ཞིག་དང་ཆོ་ག་ཕྱག་ལེན་འདྲ་བྱས་ནས་སྡོད་རྒྱུ་ཞིག་རྩ་བ་ནས་མ་རེད། ངོས་ཀྱིས་ལོ་ངོ་ ༣༠ ལྷག་རིང་ཚན་རིག་པ་དང་ལྷན་བགྲོ་གླེང་བྱས་པ་ཡིན། དེང་སྐབས་ཚན་རིག་པ་ཚོས་འཇིག་རྟེན་ཁམས་ཀྱི་རིག་པ་དང་། Cosmology གས་ཐོར་ཆེན་པོ། Big Bang Theory སོགས་ནང་པའི་གཞུང་ནས་ཀྱང་གསུངས་ཡོད། དེ་བཞིན་དབང་རྩ་དང་། ཀླད་པ་དང་བློའི་བྱེད་ལས་ཀྱི་རྣམ་གཞག ཀོན་ཊམ་དངོས་ཁམས་རིག་པ། Quantum Physics རྣམས་ཀླུ་སྒྲུབ་ཀྱི་གསུང་སོགས་ནང་པའི་གཞུང་ནང་གསལ་ཡོད། བློའི་རྣམ་གཞག་དང་འབྲེལ་ནས་ནང་པའི་སེམས་ཁམས་རིག་པའི་རྣམ་གཞག་དེ་དག་ཧ་ཅང་གི་ཚད་མཐོན་པོ་རེད།
གཙོ་བོ་དེ་ཐོག་ཞབས་འདེགས་ཇི་འདྲ་ཞིག་བསྒྲུབ་ཐུབ་མིན་ཐད་ང་ཚོས་བསམ་བློ་བཏང་ནས་འགན་མང་ཙམ་འཁྱེར་དགོས། ང་ཚོས་ལུས་པོའི་འཕྲོད་བསྟེན་ཐོག་ཧ་ཅང་དོ་སྣང་བྱེད་བཞིན་ཡོད། འོན་ཀྱང་བསམ་བློའི་འཕྲོད་བསྟེན་ལ་དོ་སྣང་གང་འདྲ་ཞིག་བྱེད་དགོས། ཁོང་ཁྲོ་དང་འཇིགས་སྣང་སོགས་ཆགས་སྡང་གི་བློ་ཉོན་མོངས་རག་པ་དེ་དག་འགོག་ཐབས་བྱེད་ནས་བཟང་པོའི་བློ་དེ་དག་གོང་མཐོར་གཏོང་ཐབས་བྱེད་དགོས། རྒྱུ་མཚན་དེ་དག་ལ་བརྟེན་ནས་ངོས་ཀྱི་རྒྱ་གར་ལྷོ་ཕྱོགས་གདན་ས་གྲྭ་ཚང་དགེ་འདུན་འདུས་སྡེ་ཁྲི་ཕྲག་ཡོད་པ་རྣམས་ཀྱི་སློབ་ཚན་དུ་ཚན་རིག་ངེས་པར་དུ་འཛུགས་ཐབས་བྱས་པ་ཡིན། ཞེས་སོགས་ཀྱི་བཀའ་སློབ་སྩལ་བསྟུན། ཁུལ་དེར་མཛད་འཕྲིན་ཁག་རེ་ཞིག་ལེགས་པར་མཇུག་སྒྲིལ་མཛད་ནས་རྒྱལ་ས་ཊོག་ཡོའི་ཁུལ་དུ་ཆིབས་༸ཞལ་བསྒྱུར་ཡོད་པ་བཅས།།
