༢༠༡༦ ཟླ་ ༡༡ ཚེས་ ༡༧ རེས་གཟའ་ཕུར་བུ།
༄༅། །༸གོང་ས་མཆོག་གིས་ཉི་ཧོང་གི་གྲོང་ཁྱེར་ཡོ་ཀོ་ཧ་མའི་ Yokohama པེ་སི་ཕི་ཀོའི་ཚོགས་ཁང་ཆེན་མོའི་ནང་མང་ཚོགས་སྟོང་ཕྲག་བརྒལ་བར་བྱམས་བརྩེའི་སྐོར་བླང་དོར་བཀའ་སློབ་སྩལ་འདུག
དེ་ཡང་ཕྱི་ལོ་ ༢༠༡༦ ཟླ་ ༡༡ ཚེས་ ༡༧ ཉིན་༸གོང་ས་མཆོག་གིས་མཛད་འཕྲིན་གྱི་ཐོག་མར་བོད་དང་སོག་པོ། ཀོ་རི་ཡ་བཅས་ནས་དད་ལྡན་སེར་སྐྱ་མང་ཚོགས་ཁག་གཅིག་ལ་མཇལ་ཁ་དང་བཀའ་སློབ་སྩལ་འདུག སྐབས་དེར་མགོན་པོ་གང་ཉིད་མཆོག་གིས་གཙོ་བོ་བོད་ནས་ཕེབས་པ་དང་གཞན་ཁག་གཅིག་བཅས་ཁྱོན་བོད་མི་ ༡༥༠ ཙམ་ལ་མཇལ་ཁ་དང་བཀའ་སློབ་སྩལ་བའི་སྙིང་དོན།
བོད་ཀྱི་སྐད་ཡིག་ལ་མཚོན་ན་དེང་སྐབས་དཔལ་ནཱ་ལེནྡྲའི་གཞུང་ལུགས་ཆ་ལག་ཚང་བ་ཞིག་ལ་སློབ་སྦྱོང་བྱེད་དགོས་ན་བོད་སྐད་དང་བོད་ཡིག་ནང་བཞིན་སྐད་ཡིག་གཞན་འཛམ་གླིང་འདིའི་སྒང་ཧ་ལམ་མཐོང་རྒྱུ་མེད་པ་དང་། སྤྱིར་པཱ་ལི་དང་ལེགས་སྦྱར་སྐད་གཉིས་ཀྱི་ནང་དུ་ནང་ཆོས་ཀྱི་གཞུང་འགའ་ཤས་ད་ལྟ་བཞུགས་ཡོད་རུང་། སྐད་ཡིག་དེ་དག་ད་ཆ་དུས་ཚོད་ཡོལ་ཟིན་པའི་སྐད་ཡིག་རྙིང་པ་ཞིག་ཆགས་ཟིན་སྟབས་དེ་ཙམ་ཤེས་མཁན་མེད་པར་བརྟེན། སྐད་ཡིག་དེ་གཉིས་དང་རྒྱ་སྐད། ཧིན་སྐད་སོགས་ཀྱི་ནང་དུའང་དཔལ་ནཱ་ལེནྡྲའི་གཞུང་ལུགས་མཐིལ་ཕྱིན་པ་འགྲེལ་བཤད་བརྒྱབ་མི་ཐུབ།
དེར་བརྟེན་ནང་པའི་གཞུང་ལུགས་ལ་ཐོས་བསམ་སློབ་གཉེར་ཅིས་ཕྱིན་པ་ཞིག་བྱེད་དགོས་ན་བོད་སྐད་ནང་མ་གཏོགས་སྐད་ཡིག་གཞན་གྱི་ནང་དུ་དཔལ་ནཱ་ལེནྡྲའི་གཞུང་ནས་གསུང་པའི་གཞི་ལམ་འབྲས་གསུམ་གྱི་རྣམ་གཞག་དང་། ལྷག་པར་དེང་སྐབས་ཚན་རིག་པ་རྣམས་ཀྱིས་ཧ་ཅང་དོ་སྣང་བྱེད་བཞིན་པའི་ནང་ཆོས་ནས་གསུང་པའི་སེམས་ཁམས་རིག་པ་དང་། ཚད་མ་རིག་པའི་རྣམ་གཞག་དེ་དག་འགྲེལ་བཤད་བརྒྱབ་ཐབས་བྲལ།
ནང་ཆོས་ནས་གསུང་པའི་ལྟ་གྲུབ་དང་སེམས་ཁམས་རིག་པའི་རྣམ་གཞག་ལ་དེང་སྐབས་འཛམ་གླིང་ནང་དོ་སྣང་བྱེད་ཤུགས་ཆེ་རུ་འགྲོ་བཞིན་ཡོད། བོད་ཀྱི་ཆོས་དང་རིག་གཞུང་ནི་འཛམ་གླིང་གོ་ལ་ཧྲིལ་པོ་འདིར་ཧ་ཅང་གལ་ཆེན་པོ་ཡིན་སྟབས། བོད་མི་རྣམས་མུ་མཐུད་ནས་གནས་དགོས་པ་རང་བཞིན་གྱིས་གལ་ཆེན་པོ་ཆགས་ཡོད།
ནང་པ་ཚོས་འཇིག་རྟེན་བཀོད་པ་པོ་མི་འདོད་པར་བརྟེན་ཁོང་གི་བྱིན་མཐུ་ལ་བརྟེན་ནས་རང་རྒྱུད་ལ་རྟོགས་པ་སྐྱེད་ཟེར་བ་མི་འདོད་པར། སྟོན་པ་བཅོམ་ལྡན་འདས་ཀྱིས་བདག་ཉིད་བདག་གི་མགོན་ཡིན། ཞེས་གསུངས། ནང་པ་སངས་རྒྱས་པས་བློ་སྦྱོང་ཉམས་ལེན་ཐོག་ནས་རང་རྒྱུད་ལ་རྟོགས་པ་སྐྱེ་ཐབས་བྱེད་བཞིན་ཡོད། དེར་བརྟེན་བོད་མི་ཚོས་བོད་ཀྱི་སྐད་ཡིག་ལ་བརྟེན་པའི་ཐུན་མིན་ཆོས་དང་རིག་གཞུང་དེ་དག་ཧ་ཅང་རྩ་ཆེན་པོར་བརྩི་ནས་བདག་གཅེས་བྱེད་དགོས་པ་ཧ་ཅང་གལ་ཆེ་ཡིན་པ་དང་།
དེ་བཞིན་དབུ་མའི་ལམ་གྱི་སྲིད་བྱུས་ཐོག་ནས་རྒྱ་ནག་དང་མཉམ་སྡོད་བྱེད་ཐུབ་རྒྱུ་ཡིན་པའི་སྐོར་ལ་བཀའ་སློབ་སྩོལ་སྐབས། བོད་མིར་མཁོ་བའི་དཔལ་འབྱོར་གྱི་མཐུན་རྐྱེན་དེ་དག་རྒྱ་ནག་གཞུང་གིས་བསྐྲུན་ཐུབ་རྒྱུ་དང་། རྒྱ་རིགས་ཚོར་ནང་ཆོས་ཀྱི་བསླབ་བྱ་དང་འབྲེལ་བའི་ནང་པའི་གཞུང་ལུགས་ཀྱི་རྣམ་གཞག་ཐོག་གོ་རྟོགས་རྒྱ་སྐྱེད་གཏོང་ཆེད་བོད་མི་ཚོས་རྒྱ་མི་རིགས་རྣམས་ལ་ཕར་བློ་སྐྱེད་ཕུལ་ཐུབ་པ་ཞིག་ཡོང་ཐུབ་རྒྱུ་ཡིན་སྐོར་བཀའ་སློབ་སྩལ།
དེ་རྗེས་ཀོ་རི་ཡ་ཇོ་གེ་ Jogye ཆོས་ཚོགས་ཀྱི་ནང་པའི་དགེ་འདུན་པ་ཁག་གཅིག་ལ་མཇལ་ཁ་དང་བཀའ་སློབ་སྩལ་རྗེས་ཉིན་གུང་ལྗགས་སྨིན་བཞེས་གྲུབ་བསྟུན་སླར་ཡང་ཀོ་རི་ཡ་མི་མང་ཁག་གཅིག་ལ་མཇལ་ཁ་དང་བཀའ་སློབ་སྩལ།
དེ་ནས་༸གོང་ས་མཆོག་གིས་ཡོ་ཀོ་ཧ་མ་པེ་སི་ཕི་ཀོའི་ཚོགས་ཁང་ཆེན་མོའི་ནང་Pacifico Yokohama Hall མང་ཚོགས་རྣམས་ལ་བྱམས་བརྩེ་ནི་བདེ་སྐྱིད་ཀྱི་རྩ་བ་ཡིན། ཞེས་པའི་བརྗོད་གཞིའི་ཐོག་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་སྩལ།།
