༢༠༡༦ ཟླ་ ༡༡ ཚེས་ ༡༥ རེས་གཟའ་མིག་དམར།

༄༅། །འདི་གར་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་ཀྱིས་བཏང་གནས་ནང་འཁོད་དོན། ས་སྐྱའི་ཕུན་ཚོགས་ཕོ་བྲང་གི་སྐྱབས་མགོན་༸གོང་མ་བདག་ཆེན་འཇིགས་བྲལ་རིན་པོ་ཆེ་མཆོག་ཕྱི་ལོ་ ༢༠༡༦ ཟླ་ ༤ ནང་བྱང་ཨ་རིར་ས་སྐྱ་ཕུན་ཚོགས་ཕོ་བྲང་དུ་དགོངས་པ་རྫོགས་ཡོད་པ་དང་། ཟླ་འདིའི་ཕྱི་ཚེས་༧ ཉིན་སྐུ་གདུང་རིན་པོ་ཆེ་བྱང་ཨ་རི་ནས་རྒྱ་གར་གྱི་རྒྱལ་ས་ལྡི་ལིར་ཡོད་པའི་ས་སྐྱ་ཕུན་ཚོགས་ཕོ་བྲང་གི་དགོན་པར་གདན་ཞུ་གནང་ཡོད་པ་དང་། ཕྱི་ཚེས་ ༨ ནས་ ༡༠ བར་ཉིན་གྲངས་གསུམ་རིང་བླ་སྤྲུལ་མི་མང་རྣམས་ལ་གདུང་མཇལ་དང་།

ཕྱི་ཚེས ༡༡ ཉིན་གྱི་སྔ་དྲོ་ཆུ་ཚོད་ ༩ ཐོག་དཔལ་ས་སྐྱ་༸གོང་མ་བདག་ཁྲི་རིན་པོ་ཆེ་མཆོག་དང་ངོར་ཀླུ་ལྡིང་མཁན་ཆེན་རིན་པོ་ཆེ་རྣམ་གཉིས་དབུ་བཞུགས་ཐོག་ཕོ་བྲང་རྣམ་གཉིས་ཀྱི་སྐུའི་གདུང་སྲས་རྣམ་པ་དང་བླ་སྤྲུལ་དགེ་བཙུན་སྟོང་ཚོ་གཅིག་ཙམ་གྱིས་ཕྱོགས་བཞིར་འཁོད་ནས་སྐུ་གདུང་ཞུགས་འབུལ་གནང་ཡོད། གདུང་མཆོད་ཀྱི་མཛད་སྒོའི་ཉིན་བོད་མིའི་སྒྲིགས་འཛུགས་ཀྱི་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གཙོས་པའི་སྤྱི་འཐུས་ཁག་གཅིག་དང་།  ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། བཀའ་བློན་དང་བཀའ་ཟུར། གཞན་ཡང་ལྡི་ལི་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག ས་གནས་ཚོགས་སྐྱིད་ཁག་གི་སྐུ་ཚབ་སོགས་ཆེད་ཕེབས་གནང་ཡོད་ཅིང་། རྒྱལ་བལ་འབྲུག་གསུམ་གཙོས་པའི་འཛམ་གླིང་ཤར་ནུབ་ཡུལ་གྲུལ་གང་སར་དད་ལྡན་སློབ་འབངས་སྟོང་ཚོ་ཁ་ཤས་གདུང་མཆོད་ལ་མཉམ་ཞུགས་བྱས་ཡོད་པ་བཅས།།