༢༠༡༦ ཟླ་ ༡༡ ཚེས་ ༢༢ རེས་གཟའ་མིག་དམར།
༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༢༠ བོད་ཟླ་ ༩ ཚེས་ ༢༢ ལྷ་བབས་དུས་ཆེན་ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་བཀའ་བློན་གཡུ་ཐོག་ཀརྨ་དགེ་ལེགས་མཆོག་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་གདན་ས་ཆེན་པོ་དཔལ་ལྡན་འབྲས་སྤུངས་བློ་གསལ་གླིང་དུ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གི་དགེ་བཤེས་མཚན་བཏགས་ཀྱི་རྟེན་འབྲེལ་མཛད་སྒོར་མཉམ་ཞུགས་གནང་འདུག
དེ་ཡང་དགེ་བཤེས་མཚན་བཏགས་ཀྱི་མཛད་སྒོ་ཉིན་གཉིས་པའི་ཐོག་འབྲས་སྤུངས་བློ་གསལ་གླིང་གྲྭ་ཚང་གིས་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་སྐབས་ཆོས་རིག་བཀའ་བློན་མཆོག་དང་སྐུ་མགྲོན་རྣམ་པས་གསུང་བཤད་གནང་ཡོད། དེ་རྗེས་གླིང་རིན་པོ་ཆེ་མཆོག་ལ་རྟེན་འབྱུང་མཇལ་དར་སྒྲོན་འབུལ་ཞུས།
ཉིན་རྒྱབ་བཀའ་བློན་མཆོག་ལ་མོན་གྷོ་ས་གནས་འགོ་འཛིན་གྱིས་མགྲོན་འབོད་ལྟར། མོན་གྷོ་ས་གནས་འཐུས་ཚོགས་ཀྱི་ཚོགས་ཁང་ནང་ཆུ་ཚོད་གཅིག་རིང་གི་བགྲོ་གླེང་ལས་རིམ་ཐོག་མཉམ་ཞུགས་གནང་འདུག
ལས་རིམ་ལྟར་ན། བཀའ་བློན་མཆོག་ཕྱི་ཚེས་ ༢༣ ཉིན་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ གོ་སྒྲིག་ཞུ་ཕྱོགས་ཀྱི་ལས་དོན་དང་འབྲེལ་ས་གནས་རྒྱ་གར་གྱི་དཔོན་རིགས་རྣམས་དང་མཇལ་འཕྲད་གནང་རྒྱུ་དང་། དེ་བཞིན་དུས་དབང་ཚོགས་ཡུལ་ས་གནས་སུ་མཚམས་གཟིགས་བཅས་ཀྱི་ཆེད་གཞུང་འབྲེལ་ཕྱོགས་ཕེབས་གནང་རྒྱུ་ཡིན་འདུག་པ་བཅས།།
