༢༠༡༦ ཟླ་ ༡༡ ཚེས་ ༢༣ རེས་གཟའ་ལྷག་པ།

སྐུ་ཞབས་ཨ་རིབ་ཝི་ར་ནི་མཆོག་དང་ལྷན།

༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༢༢ ཉིན་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཨ་རིབ་ཝི་ར་ནི་ Arif Virani མཆོག་གིས་ཁེ་ན་ཌའི་གྲོས་ཚོགས་ནང་བོད་དོན་རྒྱབ་སྐྱོར་གྱི་གསུང་བཤད་གནང་དོན།

བཀུར་འོས་ཚོགས་གཙོ་མཆོག དེ་རིང་ངས་བོད་མིའི་ཆབ་སྲིད་ཀྱི་འགོ་ཁྲིད་བློ་བཟང་སེངྒེ་མཆོག་གི་སྐོར་ཞུ་རྒྱུ་ཡིན། ཕྱི་ལོ་ ༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱུང་བའི་སྲིད་སྐྱོང་བློ་བཟང་སེངྒེ་མཆོག་ལ་རྩིས་སྤྲོད་མཛད་རྗེས།  འབུམ་རམས་པ་བློ་བཟང་སེངྒེ་མཆོག་མང་ཚོགས་ཀྱིས་འོས་འདེམས་བྱས་པའི་བོད་མིའི་ཆབ་སྲིད་ཀྱི་འགོ་ཁྲིད་སྲིད་སྐྱོང་ཐོག་མ་ཆགས་ཡོད། བཙན་བྱོལ་ནང་སྐྱེས་པའི་སྐུ་ཞབས་བློ་བཟང་སེངྒེ་མཆོག་ནི་ཨ་རི་བོད་མིའི་སློབ་ཡོན་ Fulbright Scholar  ཐོབ་མཁན་ཁོངས་ཡིན་པ་མ་ཟད། བཙན་བྱོལ་བོད་མིའི་ཁྲོད་ཨ་རིའི་ཧ་ཝར་ཌི་གཙུག་ལག་སློབ་ཁང་ནས་ S J D ཁྲིམས་ལུགས་རིག་པའི་མཁས་དབང་གི་ཕྱག་ཁྱེར་ཐོབ་མཁན་བོད་མི་ཐོག་མ་ཆགས་ཡོད།

ཁེ་ན་ཌའི་ནང་བོད་མི་མང་ཤོས་གནས་ཡུལ་ནི་ང་གྲོས་ཚོགས་འཐུས་མིར་འདེམས་མཁན་གྱི་ས་གནས་ Parkdale -High Park ཆགས་ཡོད།  བོད་མི་དེ་དག་དང་རྒྱལ་སྤྱིའི་ནང་མི་མང་པོ་ཞིག་གིས་འབུམ་རམས་པ་བློ་བཟང་སེངྒེ་མཆོག་དབུ་མའི་ལམ་གྱི་སྲིད་བྱུས་ལ་ཆོད་སེམས་བརྟན་པོས་རྒྱུན་སྐྱོང་གནང་མཁན་ཞིག་ཡིན་པར་ངོས་འཛིན་ཞུ་བཞིན་འདུག   དབུ་མའི་ལམ་གྱི་ལངས་ཕྱོགས་ནི་བོད་མི་རྣམས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་སུ་བསྡད་ནས་བོད་མི་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ཐོབ་ཐབས་བྱེད་བཞིན་ཡོད།

དབུ་མའི་ལམ་གྱི་སྲིད་བྱུས་ལངས་ཕྱོགས་འདི་ནི་འདྲ་མཉམ་དང་ཕྱོགས་གཉིས་མཐུན་འབྲེལ་རྒྱུན་སྐྱོང་གི་སྲིད་བྱུས་གཞི་རྩར་བཟུང་ནས་བོད་ཀྱི་གནད་དོན་ཞི་བའི་ལམ་ནས་གསལ་ཐབས་བྱ་རྒྱུའི་ལངས་ཕྱོགས་ཤིག་ཡིན་པར་བརྟེན།   སྲིད་བྱུས་དེས་སྤྱི་ཚོགས་ནང་བརྟན་ལྷིང་སྲུང་སྐྱོབ་འོག་ཕྱོགས་གཉིས་མཉམ་གནས་ཐུབ་རྒྱུའི་སྲིད་བྱུས་ལག་བསྟར་དོན་འཁྱོལ་ཐུབ་པ་ཞིག་ཡིན་པ་གསལ་པོ་རེད།   ངས་སྐུ་ཞབས་བློ་བཟང་སེངྒེ་མཆོག་དང་ཨ་རི་སྐུ་ཚབ་དོན་གཅོད་སྐུ་ཞབས་སྤེན་པ་ཚེ་རིང་ལགས་རྣམ་གཉིས་ལ་འཚམས་འདྲི་ཞུ་རྒྱུ་ཡིན།  ཁོང་རྣམ་གཉིས་ཀྱིས་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་ཐབས་གནང་བཞིན་པ་དེར་ངས་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་གསུངས་རྗེས་གྲོས་ཚོགས་འཐུས་མི་རྣམས་ཀྱིས་དགའ་བསུ་ཞུས་འདུག །

བརྙན་འཕྲིན་གཟིགས་ཆེད་འདིར་གནོན།