༢༠༡༦ ཟླ་ ༡༡ ཚེས་ ༡༠ རེས་གཟའ་ཕུར་བུ།

༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཨོ་ས་ཀ་ནས་སྐུ་ཞབས་ཌོ་ནལ་ཊམ་མཆོག་ཐེངས་འདིར་ཨ་རིའི་རྒྱལ་ཡོངས་སྲིད་འཛིན་གྱི་འོས་བསྡུ་ཆེན་མོའི་ནང་རྒྱལ་ཁ་ཐོབ་པར་འཚམས་འདྲི་མཛད་པའི་ནང་འཁོད་དོན།   ཨ་རི་ནི་མང་གཙོ་དང་རང་དབང་སྲུང་སྐྱོབ་ཐོག་ཁྲིམས་ལུགས་དབང་སྒྱུར་གཙོ་བཟུང་བྱེད་མཁན་གྱི་རྒྱལ་ཁབ་ཅིག་ཡིན་སྟབས།  ངོས་ཀྱིས་ཡུན་རིང་ནས་བསྔགས་བརྗོད་ཞུ་བཞིན་ཡོད་པ་མ་ཟད།  ཨ་རིའི་སྣེ་ཁྲིད་འོག་མང་གཙོའི་འཆར་སྣང་དེ་དག་དོན་འཁྱོལ་ཡོང་སླད་འཛམ་གླིང་ཀུན་གྱིས་རེ་ལྟོས་ཧ་ཅང་བྱེད་བཞིན་ཡོད།  ཨ་རིའི་མང་ཚོགས་དང་སྲིད་འཛིན་རིམ་བྱོན་རྣམས་ཀྱིས།  འཚེ་མེད་ཞི་བའི་ལྟ་གྲུབ་ལ་གཞི་བཅོལ་བའི་བོད་མིའི་ཐུན་མིན་ཆོས་དང་རིག་གཞུང་སྲུང་སྐྱོབ་སླད་རྒྱབ་སྐྱོར་དང་མཐུན་འགྱུར་རོགས་རམ་གནང་བ་དེས་ང་ཚོར་ཆེ་མཐོང་ཧ་ཅང་ཐོབ་པ་ཞིག་བྱུང་།  འབྱུང་འགྱུར་སྐུ་ཉིད་མཆོག་གི་ལས་དོན་གང་ཅིར་བྱ་བ་ལམ་ལྷོང་ཡོང་བའི་བཀྲ་ཤིས་སྨོན་འདུན་ཞུ་རྒྱུ་ཡིན།  ཞེས་འཁོད་འདུག

གསུང་འཕྲིན་ཨིན་ཡིག་ནས་ཕབ་སྒྱུར་ཞུས་པས་ཨིན་ཡིག་ལ་རྩ་འཛིན་ཡོང་བ་ཞུ།།