༢༠༡༦ ཟླ་ ༡༠ ཚེས་ ༡༢ རེས་གཟའ་ལྷག་པ།

༄༅། །ཉེ་ལམ་ཐེ་ཝན་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་མཁན་གྲོས་ཚོགས་འཐུས་མི་སྐུ་ཞབས་ཕེ་ཌི་ལིམ་ Mr Freddy Lim མཆོག་ལ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཐུགས་རྗེ་ཆེ་ཞུས་གནང་འདུག དེ་ཡང་ཕྱི་ལོ་ ༢༠༡༦ ཟླ་ ༡༠ ཚེས་ ༡༡ ཉིན་ཚོགས་གཙོ་མཆོག་གིས་ཕུལ་བའི་གསུང་འཕྲིན་ནང་འཁོད་དོན།

སྐུ་ཉིད་མཆོག་དང་སྐུ་ཉིད་མཆོག་གིས་ཚོགས་པར་ཐེ་ཝན་མང་གཙོ་ཡར་ཐོན་ཚོགས་པ་ Democratic Progressive Party དང་གོ་མིང་ཏང་ཆབ་སྲིད་ཚོགས་པ། Kuomintang Party དེ་བཞིན་ཐེ་ཝན་དུས་རབས་ཀྱི་ནུས་ཤུགས་ཚོགས་པ་ Taiwanese New Power Party བཅས་ཀྱིས་རྒྱབ་སྐྱོར་འོག་ཐེ་ཝན་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བར་བོད་མི་མང་སྤྱི་འཐུས་ལྷན་ཚོགས་ཀྱིས། གཞིས་བྱེས་བོད་མི་ཡོངས་ཀྱི་ཚབ་ཞུས་ནས་སྙིང་ཁུང་རུས་པའི་གཏིང་ནས་བཀའ་དྲིན་བླ་མེད་དུ་ཆེ། ཞེས་ཞུ་རྒྱུ་ཡིན།
ལྷག་པར་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་ཞའོ་མ་ཡེ་ཅིང་ Xiao Mei Ching མཆོག་དང་སྐུ་ཉིད་ཀྱི་ཚོགས་པས་དང་དུ་བླངས་ནས་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་ཆེད་ལས་གཞི་དབུ་འཛུགས་གནང་བར་ང་ཚོས་དམིགས་བསལ་བཀའ་དྲིན་ཆེ། ཞེས་ཞུ་རྒྱུ་ཡིན།

རྣམ་འགྱུར་འདིས་ང་ཚོར་སེམས་འགུལ་ཧ་ཅང་ཐེབས་བྱུང་བ་མ་ཟད། བཀའ་དྲིན་ཧ་ཅང་ཚོར་ཐུབ་པ་བྱུང་། བོད་དོན་རྒྱབ་སྐྱོར་གྱི་ཚོགས་པ་གསར་འཛུགས་གནང་བ་དེ་བརྒྱུད་ཁྱེད་རྣམ་པས་ཐེ་ཝན་གྲོས་ཚོགས་འཐུས་མི་རྣམ་པས་བོད་དོན་ཐོག་གདུང་སེམས་མཉམ་སྐྱེའི་རྒྱབ་སྐྱོར་གནང་བཞིན་ཡོད་པ་གསལ་སྟོན་གནང་ཡོད། དེར་བརྟེན་ཁྱེད་རྣམ་པས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་གནང་བར་ང་ཚོས་བཀའ་དྲིན་སྙིང་བཅང་ཞུ་རྒྱུ་ཡིན། མི་མང་གི་མངོན་འདོད་གཞི་རྩར་བཟུང་བའི་ཐོག་ནས་ཐེ་ཝན་ནང་མང་གཙོའི་ལམ་ལུགས་ལག་བསྟར་གནང་བཞིན་པ་དེ་ནི་ཨེ་ཤི་ཡའི་ཁྱོན་དུ་གལ་ཆེའི་མིག་དཔེ་བཟང་པོ་ཞིག་ཏུ་གྱུར་བར་བརྟེན། ང་ཚོས་ཚད་མཐོའི་གདེང་འཇོག་དང་སྦྲགས་ཡི་རང་བསྔགས་བརྗོད་ཞུ་བཞིན་ཡོད།

༸གོང་ས་མཆོག་དང་བོད་བརྒྱུད་ནང་བསྟན་གྱི་བླ་ཆེན་མང་པོ་ཞིག་ཐེ་ཝན་དུ་ཆིབས་སྒྱུར་བསྐྱངས་གནང་མཛད་པར་བརྟེན། ཐེ་བོད་དབར་མཛའ་བརྩེའི་འབྲེལ་ལམ་གྱི་རྨང་གཞི་སྲ་བརྟན་བཙུགས་ཟིན། ཞེས་འཁོད་པ་མ་ཟད། མཐར་ཚོགས་གཙོ་མཆོག་གིས་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་པའི་ལས་དོན་གང་ཅིར་བྱ་བ་ལམ་ལྷོང་ཡོང་བ་དང་ཐེ་བོད་མི་རིགས་གཉིས་དབར་མཛའ་བརྩེའི་འབྲེལ་ལམ་ཡུན་གནས་ཐུབ་པའི་སྨོན་འདུན་ཞུས་འདུག་པ་བཅས།།