༢༠༡༦ ཟླ་ ༡༠ ཚེས་ ༧ རེས་གཟའ་པ་སངས།

༄༅ ། །ཕྱི་ལོ་ ༢༠༡༦ ཟླ་ ༩ ཚེས་ ༧ ཉིན་རྒྱ་གར་ཧི་མཱ་ལ་ཡ་ཁྱིམ་ཚང་ (Himalaya Pariwar) ཞེས་པའི་ཚོགས་པའི་གོ་སྒྲོག་དང་ཕྱི་དྲིལ་ལས་ཁུངས་ཀྱི་མཐུན་འགྱུར་འོག རྡ་ཤོད་ཉེ་འགྲམ་དུ་ཡོད་པའི་གྲོང་སྡེ་ལས་ཁུངས་ཀྱི་ཚོགས་ཁང་ནང་བོད་སྐོར་གྱི་གཏམ་བཤད་དང་རི་མོ་འགྲན་བསྡུར་སྐབས་རྒྱ་གར་སློབ་མ་ཚོས་ཧུར་བརྩོན་ཆེན་པོས་མཉམ་ཞུགས་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡།༤༥ ཐོག་སྐུ་མགྲོན་གཙོ་བོ་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་དང་། རྡ་ས་ས་གནས་འགོ་འཛིན་ཟླ་བ་རིན་ཆེན་ལགས། རྡ་ཡ་ནནྡཱ་སློབ་གྲྭ། Dayanand School  ཨེས་ཌི་སློབ་གྲྭ།  Sanatan Dharam School བྷ་རཏ་ཧི་མཱ་ལ་ཡ་སློབ་གྲྭ། Bharatya Himalayan Public School སོགས་རྡ་རམ་ས་ལའི་ཉེ་འདབས་ཀྱི་ཡུལ་མིའི་སློབ་གྲྭ་ཆེ་ཆུང་ཁག་དྲུག་གི་སློབ་མ་ ༨༠ ཙམ་གྱིས་འཕགས་བོད་འབྲེལ་ལམ་སྐོར་དང་། རྒྱ་ནག་གཞུང་གིས་བོད་ཀྱི་ཁོར་ཡུག་རྩ་མེད་བཟོ་བཞིན་པ། བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ། བོད་ཀྱི་རིག་གཞུང་ལ་ཉེན་ཁ་ཇེ་ཆེར་འཕྲད་བཞིན་པ།  གངས་རིན་པོ་ཆེའི་སྐོར། བོད་ཀྱི་སྐད་དང་རིག་གཞུང་སོགས་ཀྱི་སྐོར་གཏམ་བཤད་སྐར་མ་ལྔའི་དུས་ཚོད་རྒྱས་བཅད་ཀྱིས་འགྲན་བསྡུར་དང་། དེ་བཞིན་བོད་དོན་སྐོར་རྩོམ་ཡིག་དང་། རི་མོ་འགྲན་བསྡུར་གནང་ཡོད།

དེ་རྗེས་སྐུ་མགྲོན་གཙོ་བོ་རྣམ་གཉིས་ལ་ཕྱག་རྟགས་ཕུལ་བ་དང་ཕྱོགས་མཚུངས། ཐེངས་འདིའི་འགྲན་བསྡུར་ནང་གཟུ་དཔང་གནང་མཁན་རྣམ་པར་ཐུགས་རྗེ་ལེགས་འབུལ་གྱི་ཕྱག་རྟགས་དང་། དེ་རྗེས་སྐུ་མགྲོན་གཙོ་བོས་དེ་ལྟ་བུའི་བོད་དོན་གོ་རྟོགས་ཀྱི་ལས་གཞི་སློབ་གྲྭ་ཁག་གི་གཞོན་སྐྱེས་རྣམས་ལ་གོ་སྒྲིག་གནང་བར་བསྔགས་བརྗོད་དང་སྦྲགས་མ་འོངས་པར་མཐོ་སློབ་ཁག་གི་ནང་དུའང་ལས་རིམ་འདི་ལྟ་བུ་གོ་སྒྲིག་གནང་ཐུབ་ཚེ་དགེ་མཚན་ཆེན་པོ་ཡོད་སྐོར་དང་། བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་དགོངས་དོན་བོད་རྒྱ་གྲོས་མོལ་གྱི་ལམ་ནས་བོད་དོན་བདེན་མཐའ་གསལ་ཐབས་གནང་བཞིན་ཡོད་སྐོར་སོགས་ཀྱི་གསུང་བཤད་གནང་ཡོད། སྐབས་དེར་ཕྱི་དྲིལ་འགྲེམས་སྤེལ་ཚན་པས་བོད་དོན་དང་འབྲེལ་བའི་དཔེ་དེབ་ཁག་གཅིག་དགེ་སློབ་ཡོངས་ལ་འགྲེམས་སྤེལ་གནང་ཡོད་པ་བཅས། །