༢༠༡༦ ཟླ་ ༡༠ ཚེས་ ༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༣ ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་གཞུང་གི་རོགས་རམ་ཐེབས་རྩ་ཁང་ USAID ཞེས་པ་བརྒྱུད་ཨ་སྒོར་ས་ཡ་ཉི་ཤུ་རྩ་གསུམ་ལོ་ལྔའི་རིང་གནང་རྒྱུ་ཞལ་བཞེས་ཐོབ་པའི་སྐོར་གསར་འགོད་ལྷན་ཚོགས་གནང་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༡༢།༣༠ ཐོག་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་དཔལ་འབྱོར་བཀའ་བློན་ཀརྨ་ཡེ་ཤེས་མཆོག དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་དྲུང་ཆེ་ཞིང་ཆེན་དངོས་གྲུབ་རྡོ་རྗེ་ལགས། འཆར་འགོད་འགན་འཛིན་དཀོན་མཆོག་བརྩོན་འགྲུས་ལགས། དབུ་དཀར་ཚང་སྐལ་རྡོར་ལགས། ཕྱི་ནང་གི་གསར་འགོད་པ་བཅས་ཚང་འཛོམས་ཀྱིས་ཐོག་མར་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་དྲུང་ཆེ་ཞིང་ཆེན་དངོས་གྲུབ་རྡོ་རྗེ་ལགས་ཀྱིས་གསར་འགོད་ལྷན་ཚོགས་གནང་དགོས་དོན་སྐོར་ངོ་སྤྲོད་གནང་གྲུབ་མཚམས། དཔལ་ལྡན་སྲིད་སྐྱོང་མཆོག་གིས་གསུང་དོན།
དེ་རིང་གཙོ་བོ་ཞུ་རྒྱུ་ནི་ཨ་རིའི་གཞུང་ནས་ USAID བརྒྱུད་ཨ་སྒོར་ས་ཡ་ཉི་ཤུ་རྩ་གསུམ་ལོ་ལྔའི་རིང་གནང་རྒྱུ་ཞལ་བཞེས་ཐོབ་པ་མ་ཟད། ཡིག་ཐོག་ནས་ཀྱང་འབྱོར་བྱུང་། ལས་གཞི་འདི་ཉིད་ལོ་ལྔའི་རིང་ཡིན་སྟབས། ཕྱི་ཟླ་ ༡༠ ནས་འགོ་འཛུགས་ཀྱི་རེད། ང་ཚོས་འདིའི་ཐོག་འབད་བརྩོན་བྱས་ཏེ་གང་ཙམ་འགྲོ་གི་ཡོད། གཙོ་བོ་ཨ་རིའི་གཞུང་གི་སྔོན་རྩིས་ནས་ཐོན་ཟིན་པ་རེད། འོན་ཀྱང་མཐའ་མ་དེར་ཁོ་རང་ཚོ་འདི་ག་རྡ་སར་ཕེབས་ཏེ་རྟོག་ཞིབ་མང་པོ་གནང་ནས་བོད་མིའི་སྒྲིག་འཛུགས་ནས་ལས་འཆར་ཕུལ་བ་ཁག་ཧ་ཅང་ཡག་པོ་འདུག ཅེས་ལས་འཆར་ཁག་མང་ཆེ་བ་ཞལ་བཞེས་གནང་བར་བརྟེན། ང་ཚོས་ལག་བསྟར་བྱེད་རྒྱུ་འགོ་འཛུགས་ཀྱི་རེད། འདིའི་ནང་གཙོ་ཆེ་ཤོས་ལྷོ་ཤར་ཨེ་ཤི་ཡའི་རྒྱ་བལ་འབྲུག་གསུམ་ནང་ཡོད་པའི་བོད་མིའི་ཆེད་དུ་རེད། དང་པོ་ནི། བོད་མི་དེ་དག་གི་འཚོ་བ་སྐྱེལ་སྟངས་དང་། གཞིས་ཆགས་སྲ་བརྟན་ཡོང་རྒྱུའི་ཆེད་དུ་རེད། གཉིས་པ་ནི། བོད་མི་སྤྱི་ཡོངས་དང་། ལྷག་པར་བོད་མིའི་སྒྲིག་འཛུགས་དང་རྩ་དོན་གྱི་ནུས་སྟོབས་སྤེལ་རྒྱུའི་ Human Resource Development ཆེད་ཆགས་ཡོད། དེ་དང་འབྲེལ་བའི་ལས་འཆར་ཁག་རིག་གཞུང་དང་འབྲེལ་བའི་ཐོག་ནས་བུད་མེད་ནུས་སྟོབས་སྤེལ་རྒྱུ་དེ་དག་གི་ནང་ཚུད་ཡོད། གཙོ་བོ་དོན་ཚན་བརྒྱད་ཡོད་ཀྱང་ཞིབ་ཕྲ་འགྲོ་མི་དགོས་པར་དང་པོ་དེར་འཚོ་བ་བསྐྱལ་རྒྱུ་ཟེར་ནའང་རེད། གཞིས་ཆགས་སྲ་བརྟན་ཡོང་རྒྱུའི་སླད་སྔོན་མ་ཡིན་ན། འཕྲོད་བསྟེན་དང་ཤེས་ཡོན་གྱི་ལས་གཞིའི་སྟེང་འགྲོ་གི་ཡོད། ཐེངས་འདིར་སྔར་དང་མི་འདྲ་བ་གང་ཡོད་ཅེ་ན། གཞིས་ཆགས་གཅིག་གི་ནང་ཤེས་ཡོན་དང་དཔལ་འབྱོར། སྤྱི་ཚོགས། རིག་གཞུང་སོགས་ཆ་ཚང་ཐོག་གཞིས་ཆགས་ནང་ལོ་ལྔའི་རིང་འཆར་གཞི་སྒྲིག་ནས་དེ་དག་བྱས་པ་ཡིན་ན། ད་ལྟའི་གཞིས་ཆགས་ཀྱི་གནས་བབ་ལས་ལོ་ལྔའི་ནང་ཡར་རྒྱས་འགྲོ་གི་རེད། ཅེས་ཕྱོགས་གཅིག་ནས་ integrated development project ཟེར་གྱི་ཡོད་རེད། ཕྱོགས་གཞན་ཞིག་ནས་ community participatory process ཟེར་གྱི་ཡོད།
གཉིས་པ་ནི། དངུལ་ཁང་ལྟ་བུའི་ལས་འཆར་འདི་གལ་ཆེན་པོ་རྩི་གི་ཡོད། གང་ཡིན་ཟེར་ན། ང་ཚོའི་སྤྱི་ཚོགས་ནང་དངུལ་ཁང་ལྟ་བུ་ཞིག་ཡོད་ཐུབ་པ་ཡིན་ན། ཤེས་ཡོན་དང་གཞིས་ཆགས་ཁག་གི་ནང་ཚོང་རྒྱག་མཁན་ཡིན་ན་རེད། དེ་བཞིན་ས་ཞིང་འདེབས་ལས་བྱེད་མཁན་ཡིན་ནའང་རེད། སྤྱི་ཚོགས་སྤྱི་ཡོངས་ནང་དཔལ་འབྱོར་ཐོག་བུན་གཡར་དང་ཚོང་དང་ལྡན་པའི་ལས་འཆར་ཁག་ཡར་རྒྱས་གཏོང་ཆེད་ལས་གཞི་སྤེལ་བཞིན་ཡོད། ཕྱི་ལོ་ ༢༠༡༦།༢༠༡༧ ལོར་རྟོག་ཞིབ་བྱེད་རྒྱུ་དང་། ཕྱི་ལོ་ ༢༠༡༧།༢༠༡༨ ལོར་ལས་གཞི་ཕྲན་བུ་འགོ་འཛུགས་རྒྱུ་ཡིན། ང་ཚོའི་མཐའ་མའི་དམིགས་ཡུལ་དེ་དངུལ་ཁང་འཛུགས་རྒྱུ་ཡིན་པས། དེའི་ཐོག་རྒྱ་གར་གཞུང་ནས་ཕྱི་ལོ་ ༢༠༡༩ ལོར་བཀའ་འཁྲོལ་ཐོབ་རྒྱུའི་རྩིས་རྒྱག་བཞིན་ཡོད། ལས་གཞི་དེ་དག་སྤེལ་ཏེ་མ་འོངས་པར་དངུལ་ཁང་ལ་འགྱུར་ཐུབ་ན་སེམས་བཞིན་ཡོད། ཐོག་མ་དེར་ཨ་རི་གཞུང་ནས་ལོ་ལྔ་གཞིར་བཞག་ཐོག་རོགས་དངུལ་ཕོན་ཆེ་གནང་བར་ངས་བཀའ་ཤག་གི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།
དེ་དང་འབྲེལ་བའི་ཐོག་ནས་རོགས་ཚོགས་ཁག་མང་པོ་ཞིག་ནས་རོགས་དངུལ་གནང་བའི་བཀའ་དྲིན་ལ་བརྟེན་ནས་བོད་པའི་སྤྱི་ཚོགས་ནང་དཔལ་འབྱོར་སོགས་གང་ཅིའི་ཐད་ནས་ཡར་རྒྱས་འགྲོ་བཞིན་ཡོད། དེར་བརྟེན་ཁོང་ཚོ་ཚང་མར་ཐུགས་རྗེ་ཆེ་ཞུ་རྒྱུ་ཡིན།
གཉིས་པ་གལ་ཆེ་ཤོས་ནི་ཕྱི་ལོ་ ༢༠༡༦ དང་ ༢༠༡༧ ནང་རྟོག་ཞིབ་བྱེད་སྐབས་མི་མང་གི་མཉམ་ཞུགས་བྱེད་རྒྱུ་ཧ་ཅང་གལ་ཆེན་པོ་རེད། དཔེར་ན། ཚོང་པ་དང་། རིག་གཞུང་དང་འབྲེལ་བའི་ཐོག་ཕྱག་ལས་གནང་མཁན། བུད་མེད་སོགས་ནས་ཆ་ཤས་བླངས་ཏེ་ལས་འཆར་དེ་དག་བང་སྒྲིག་དགོས་པ་དང་།
སྐབས་དེར་ལས་འཆར་འདི་དགོས་མཁོ་ཡོད་མེད་བཀའ་འདྲི་མང་པོ་གནང་གི་རེད། གཞི་རྩའི་ལས་ཁུངས་ཁག་བརྒྱུད་ནས་ལས་འཆར་དེ་དག་གི་ཐོག་འདྲི་རྩད་དང་རྟོག་ཞིབ་བྱས་རྗེས་ལས་འཆར་དགོས་ངེས་ཅན་རྣམས་གཏན་འཁེལ་ཆགས་ཀྱི་རེད། དེར་བརྟེན་ཆ་ཤས་ལེན་དུས་མ་ལེན་པར་རྗེས་སུ་ང་ཚོར་རོགས་དངུལ་ཕོན་ཆེན་པོ་ཞིག་ཡོད་པ་དེ་ང་ཚོར་ཐོབ་རྒྱུ་མི་འདུག་ཅེས་གསུངས་ན། མི་ཐོབ་པའི་དོན་ནི། གཙོ་བོ་དེ་རྟོག་ཞིབ་བྱེད་སྐབས་ཆ་ཤས་མ་བླང་ན་དགོས་ཀྱི་མེད་པའི་ནང་ཚུད་འགྲོ་གི་རེད། དེར་བརྟེན་ས་གནས་ས་ཐོག་ནས་ཆ་ཤས་བླང་རྒྱུ་ཧ་ཅང་གལ་ཆེན་པོ་རེད། ཕྱི་ལོ་ ༢༠༡༧ ལོའི་སྔོན་རྩིས་ནས་ལག་བསྟར་བྱེད་རྒྱུ་རེད། ལས་གཞི་ཁག་གཅིག་འགྲོ་དང་འགྲོ་བཞིན་པ་རེད། གཙོ་ཆེ་ཤོས་བོད་མིའི་སྒྲིག་འཛུགས་ཀྱི་ནང་འགོ་ཁྲིད་ཀྱི་ནུས་པ་གོང་སྤེལ་གཏོང་དགོས་ཀྱི་ཡོད་སྟབས། ང་ཚོས་ཨོ་པི་ཇིན་དལ་གཙུག་ལག་སློབ་གཉེར་ཁང་དུ་ལས་བྱེད་རྒན་གྲས་ཁག་གཅིག་བཏང་ཟིན་པ་རེད། དེ་དང་ཆབས་ཅིག་བོད་པའི་སྤྱི་ཚོགས་སྤྱི་ཡོངས་ནང་མིའི་ནུས་པ་གོང་སྤེལ་གཏོང་ཐབས་ཆེད་འབད་བརྩོན་བྱེད་བཞིན་ཡོད། དེ་བཞིན་ཤེས་ཡོན་ཐོག་སློབ་ཡོན་མང་དུ་གཏང་རྒྱུ་ལ་སོགས་ལས་འཆར་ཁག་གཅིག་འགོ་བཙུགས་ཟིན་ཡོད། དེར་བརྟེན་ལོ་ལྔའི་ནང་ལས་གཞི་ཁག་མང་པོ་ཞིག་ཡོང་གི་རེད། དེར་བརྟེན་ཚང་མས་ཆ་ཤས་མང་ཙམ་བླང་རོགས་གནང་ཞུ་རྒྱུ་ཡིན།
ཕྱོགས་མཚུངས་སྲིད་སྐྱོང་མཆོག་གིས་ནད་རིགས་སྔོན་འགོག་དང་གཞིས་ཆགས་སྲ་བརྟན། ཤེས་ཡོན་དང་འབྲེལ་བའི་ལས་གཞིའི་སྐོར་གསུང་དོན། བཀའ་ཤག་སྐབས་བཅོ་ལྔ་པས་བོད་མིའི་གཞིས་ཆགས་ཡོངས་ནང་རྩེད་རིགས་འདྲ་མིན་གྱི་རྩེད་ཐང་རྒྱག་རྒྱུ་འགོ་བཙུགས་ཟིན་པ་རེད། གཞིས་ཆགས་ཁག་ནས་སྔོན་རྩིས་ནང་ཞུས་པ་བཞིན་ང་ཚོས་བཀའ་འཁྲོལ་གནང་དང་གནང་མུས་ཡིན། ད་དུང་རྩེད་ཐང་རྒྱག་རྒྱུའི་ལས་གཞི་ཡོད་ན་འདི་ལོའི་སྔོན་རྩིས་ནང་ཕུལ་དགོས་ཀྱི་ཡོད། ལས་གཞི་འདི་འཕྲོད་བསྟེན་སྤྱི་དང་ལྷག་པར་ནད་རིགས་སྔོན་འགོག་དང་འབྲེལ་བ་ཆགས་ཀྱི་ཡོད། བོད་པའི་སྤྱི་ཚོགས་ནང་ཁྲག་ཤེད་དང་། མཆིན་པའི་གཉན་ཚད། གཅིན་སྙི་ན་ཚ་སོགས་འཕྲོད་བསྟེན་ལ་དེ་ཙམ་དོ་སྣང་བྱེད་ཀྱི་མེད་པར་བརྟེན་འབྱུང་བཞིན་ཡོད་སྟབས། རྩེད་ཐང་གང་མང་བརྒྱབ་སྟེ་རྩེད་མོ་རྩེད་མཁན་ཇི་ཙམ་གྱི་མང་དུ་ཕྱིན་ཡང་དེའི་ཚོད་ཀྱི་འཕྲོད་བསྟེན་ཡར་རྒྱས་འགྲོ་གི་རེད།
དེ་དང་ཆབས་ཅིག་གཞིས་ཆགས་སྲ་བརྟན་ལའང་ཕན་གྱི་ཡོད། འབྱུང་འགྱུར་ལོ་ལྔའི་ནང་གཞིས་ཆགས་ཡོངས་ནང་དགོས་མཁོར་གཟིགས་ཏེ་རྩེད་ཐང་དགོས་ཚེ་ཞུས་ན་འགྲིག་གི་ཡོད། གང་ལ་ཞེ་ན་འཕྲོད་བསྟེན་དེ་ཧ་ཅང་གལ་ཆེན་པོ་ཆགས་ཡོད། ད་ཐེངས་འཆར་གཞི་གཞན་ཞིག་གང་ཡོད་ཅེས་ཞུས་ན། གཞིས་ཆགས་ཁག་གི་ནང་དཔེ་མཛོད་རྒྱག་རྒྱུའི་ལས་གཞིའི་ཐོག་མཐུན་འགྱུར་གནང་རྒྱུའི་འཆར་གཞི་ཡོད། དཔེ་མཛོད་བརྒྱག་ཐུབ་ཚེ་གཞོན་སྐྱེས་འཛོམས་རྒྱུ་དང་ཤེས་ཡོན་ལའང་ཕན་ཐོགས་ཡོད། གཞིས་ཆགས་སྲ་བརྟན་ཡོང་རྒྱུར་ཡང་ཕན་ཐོགས་ཡོང་གི་རེད། གཞིས་ཆགས་ཁག་གི་ནང་དཔེ་མཛོད་དགོས་མཁོ་ཡོད་པ་དང་། མི་སྒེར་ངོས་ནས་དཔེ་མཛོད་རྒྱག་རྒྱུའི་འཆར་གཞི་ཡོད་ན། ས་གནས་འགོ་འཛིན་བརྒྱུད་ཞུ་དགོས་ཀྱི་ཡོད། ལས་འཆར་འདིའི་ཐོག་དངུལ་འབོར་འབུམ་ཉི་ཤུ་སུམ་ཅུ་དེ་འདྲ་མེད། འོན་ཀྱང་འབུམ་གཉིས་གསུམ་མམ་བཞི་ལྔ་ཙམ་གྱི་མཐུན་འགྱུར་གནང་རྒྱུའི་འཆར་གཞི་འདིང་བཞིན་ཡོད།
དེ་དང་ཆབས་ཅིག་དཔལ་འབྱོར་ལས་ཁུངས་དང་འབྲེལ་བ་ཡོད་པའི་ཚོང་ལས་དང་འབྲེལ་དཔེ་མཛོད་དང་མཉམ་དྲ་རྒྱ་ཡོད་པའི་ཇ་ཁང་སོགས་འཛུགས་འདོད་ཡོད་ན་དེ་ཚོའི་ཐོག་མཐུན་འགྱུར་གནང་རྒྱུའི་བསམ་བློ་གཏོང་བཞིན་ཡོད། དེ་དག་གཙོ་བོ་འཆར་གཞི་ལ་རགས་ལུས་ཡོད། འཆར་གཞི་གཞན་ཞིག་ནི་ང་ཚོའི་གཞིས་ཆགས་ཁག་གི་ནང་Community Center ཡང་ན་ Exhibition Center འཛུགས་རྒྱུའི་ས་ཆ་གནང་རྒྱུའི་ཐོག་བསམ་བློ་གཏོང་བཞིན་ཡོད། དཔེར་ན། ལྷ་བྲིས་དང་། ཚེམ་བཟོ་བ། ཤིང་བཟོ་བ། དེ་བཞིན་བོད་པའི་ཐུན་མོང་མ་ཡིན་པའི་སྲོལ་རྒྱུན་གྱི་ལག་ཤེས་ཡོད་མཁན་ཚོར་ས་ཆ་ཞིག་གནང་སྟེ་ཁང་པ་དེའི་ནང་བཟོ་སྐྲུན་དང་འགྲེམས་སྟོན་བྱེད་རྒྱུ་ཡོད་པ། ཕྱི་ནས་ཡུལ་སྐོར་སྤྲོ་འཆམ་ཡོང་མཁན་ཡོད་ན་འགྲེམས་སྟོན་ལྟ་བུ་གཟིགས་རྒྱུ་ཡོད་པ་དང་ཆབས་ཅིག་ཅ་དངོས་ཉོ་རྒྱུ་ཡོད་པ་དེ་འདྲ་གནང་འདོད་ཡོད་ན་ཚོང་ལས་དང་སྦྲགས་ང་ཚོའི་སྲོལ་རྒྱུན་གྱི་རིག་གནས་མི་ཉམས་རྒྱུད་འཛིན་ཐོག་ནས་ཕྱི་མི་རྣམས་ལ་འགྲེམས་སྟོན་བརྒྱུད་བོད་པའི་རིག་གཞུང་ངོ་སྤྲོད་ཐུབ་ཀྱི་ཡོད། འདི་འདྲ་ཞིག་ཀྱང་བསམ་བློ་གཏོང་གི་ཡོད། ཅེས་སོགས་གསུངས་ཡོད།
