༢༠༡༦ ཟླ་ ༡༠ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༢༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཅེག་སྤྱི་མཐུན་རྒྱལ་ཁབ་ནང་གི་མཛད་འཕྲིན་ཁག་ཡོངས་སུ་ལེགས་གྲུབ་ཀྱིས་གོང་ཚེས་ཉིན་ཨི་ཊ་ལིའི་གྲོང་ཁྱེར་མི་ལན་ནང་དུ་༸ཞབས་སོར་འཁོད་མཚམས། མི་ལན་ Milan གྲོང་སྡེའི་སྤྱི་ཁྱབ་པ་སྐུ་ཞབས་ཇུ་སེ་པེ་ས་ལ་ Mayor Guiseppe Sala མཆོག་དང་རྣམ་གྲྭ་མཁན་རིན་པོ་ཆེ་ཁྲོམ་ཐོག་རིན་པོ་ཆེ་མཆོག་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག གནམ་ཐང་ནས་༸གོང་ས་མཆོག་སྟོན་འཁོར་ལྷན་རྒྱས་ཐད་ཀར་མི་ལན་གྲོང་ཁྱེར་གྱི་ཡེ་ཤུའི་མཆོད་དཔོན་ཨེན་ཇེ་ལོ་ཤོ་ཁོ་ལ་ Angelo Scola མཆོག་གི་གཟིམ་ཤག་ཏུ་གདན་ཞུས་ལྟར་ཆིབས་སྒྱུར་བསྐྱངས།
སྐབས་དེར་མཆོད་དཔོན་མཆོག་གིས་༸གོང་ས་མཆོག་ལ་གྲོང་ཁྱེར་མི་ལན་དུ་༸ཞབས་སོར་འཁོད་པར་འཚམས་འདྲི་དང་སྦྲགས་ཐུགས་རྗེ་ཆེ་ཞུ་སྐབས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། བཀུར་འོས་ཆོས་ཕྱོགས་དབུ་ཁྲིད་རྣམ་པ་དང་ངོས་ཀྱི་ཆོས་གྲོགས་རྣམ་པ། ངོས་རང་དེ་རིང་འདིར་ཁྱེད་རྣམས་དང་ལྷན་འཛོམས་རྒྱུའི་གོ་སྐབས་ཐོབ་པར་ཧ་ཅང་དགའ་པོ་བྱུང་།
ཕྱི་ལོ་ ༡༩༧༣ ལོར་ངོས་རང་ཡུ་རོབ་ཏུ་ཐེངས་དང་པོ་བསྐྱོད་སྐབས་ཐོག་མར་་ཨི་ཊ་ལིའི་ས་གནས་སུ་གནམ་གྲུ་བབ་ཡོད། སྐབས་དེར་ཡེ་ཤུའི་བླ་ཆེན་པོབ་པོལ་དྲུག་པ་མཆོག་ His Holiness Pope Paul VI ཁོང་རེད། ཁོང་ཨི་ཊ་ལི་རང་ནས་ཡིན་པ་ཡོད། ཐེངས་འདིར་ངོས་རང་སླར་ཡང་ཨི་ཊ་ལིར་འབྱོར་སྐབས་དང་ཐོག་ཁྱེད་རྣམ་དང་ཐུག་འཕྲད་བྱུང་བ་རེད། ཅེས་བཀའ་སློབ་སྩལ་བ་དང་སྦྲགས། ༸གོང་ས་མཆོག་གིས་ཆོས་ལུགས་མཐུན་སྒྲིལ་སྐོར་བཀའ་སློབ་སྩལ་རྗེས་མུ་མཐུད་ཡེ་ཤུའི་བླ་ཆེན་པོབ་པོལ་གཉིས་པ་མཆོག་དང་ཆོས་ལུགས་མཐུན་སྒྲིན་ལྷན་ཚོགས་སྐོར་བཀའ་སློབ་སྩལ་དོན།
ཕྱི་ལོ་ ༡༩༨༦ ལོར་ཨི་ཊ་ལིའི་གྲོང་ཁྱེར་ཨ་སི་སིར་ Assisi འཛམ་གླིང་ཆོས་ལུགས་མཐུན་སྒྲིལ་ཚོགས་ཆེན་ World Day of Prayer for Peace ཐེངས་དང་པོའི་སྐབས་བླ་ཆེན་པོབ་ཇོན་པོལ་གཉིས་པ་ Pope John Paul II མཆོག་གིས་ངོས་ལ་མགྲོན་འབོད་གནང་བ་ལྟར་བསྐྱོད་པ་ཡིན། ལྷན་ཚོགས་དེ་ནི་ཆོས་ལུགས་ཕན་ཚུན་མཐུན་སྒྲིལ་གོང་མཐོར་གཏོང་རྒྱུའི་ཐོག་རླབས་ཆེན་གྱི་ཕན་རླབས་བྱུང་ཡོད།
སྐབས་དེར་ངོས་ཀྱིས་བླ་ཆེན་མཆོག་ལ་ལྷན་ཚོགས་དེ་ལྟ་བུ་ཐེངས་གཅིག་ཚོགས་པ་ལྟ་བུ་མིན་པར་རྒྱུན་མཐུད་ནས་ཚོགས་རྒྱུའི་འགོ་འཛུགས་བྱུང་བ་ལྟ་བུ་ཞིག་ཡོང་ཐུབ་ན་དགེ་ཚན་ཆེ་སྐོར་ཞུས་པ་ཡིན། ཞེས་བཀའ་སློབ་སྩལ་རྗེས་ཚོགས་བཅར་བའི་དྲི་བ་ཁག་གཅིག་ལ་བཀའ་ལན་མཛད། ལྷན་འཛོམས་ལེགས་གྲུབ་རྗེས་ཡེ་ཤུའི་མཆོད་དཔོན་ཨེན་ཇེ་ལོ་ཤོ་ཁོ་ལ་ Angelo Scola མཆོག་གིས་ཚོགས་ཁང་གཞན་ཞིག་ཏུ། ༸གོང་ས་མཆོག་གདན་ཞུས་ཀྱིས་གསར་འགོད་པའི་དྲི་བར་བཀའ་ལན་སྩལ།
སྐབས་དེར་གསར་འགོད་པ་ཞིག་གིས་ཐེངས་འདིར་༸གོང་ས་མཆོག་ཡེ་ཤུའི་བླ་ཆེན་པོབ་ཕ་རན་སི་སི་ Pope Francis མཆོག་མཇལ་འཕྲད་ཞུ་རྒྱུའི་ཐུགས་རེ་མཛད་བཞིན་ཡོད་མེད་ཀྱི་དྲི་བར་༸གོང་ས་མཆོག་གིས་བླ་ཆེན་མཆོག་གི་གདན་ས་བེ་ཊི་ཀན་ Vatican གྱིས་རྒྱ་ནག་ནང་གི་ཡེ་ཤུའི་རྗེས་འབྲང་པ་ཚོའི་གནས་སྟངས་ཐོག་ཐུགས་ཁུར་མཛད་བཞིན་ཡོད་པ་མཁྱེན་རྟོགས་ཡོད་སྟབས། ༸གོང་ས་མཆོག་གིས་བེ་ཊི་ཀན་ལ་མཛད་དཀའ་གང་ཡང་བཟོ་འདོད་མེད་སྐོར་བཀའ་ལན་སྩལ་བ་དང་སྦྲགས།
དེང་སྐབས་ཀྱི་གནས་སྟངས་ལ་མཚོན་ན་འཛམ་གླིང་ནང་པའི་རྒྱལ་ཁབ་དུ་མ་ཡོད་ཀྱང་ངོས་རང་བསྐྱོད་ཐུབ་པའི་རྒྱལ་ཁབ་གཅིག་རང་ཡོད་པ་ནི་ཉི་ཧོང་ཆགས་ཡོད། ཅེས་སོགས་ཀྱི་དྲི་བ་རྣམས་ལ་བཀའ་ལན་སྩལ་བསྟུན་༸གོང་ས་མཆོག་གྲོང་ཁྱེར་མི་ལན་ནང་རྟེན་གཞི་བྱས་པའི་དགེ་འཕེལ་གླིང་ཆོས་ཚོགས་སུ་ཇི་ལྟར་གདན་ཞུས་གསོལ་འདེབས་ཞུས་དོན་ལྟར་ཁུལ་དེར་ཆིབས་སྒྱུར་བསྐྱངས། ཆོས་ཚོགས་ཀྱི་སྒོམ་སྒྲུབ་ཉམས་ལེན་བྱེད་སའི་ཚོགས་ཁང་དུ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་གིས་གཙོས་བོད་རིགས་སོགས་དད་ལྡན་སློབ་མ་རྣམས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། སྐབས་དེར་ཝི་ཐི་ནམ་Vietnam ནང་པའི་དད་ལྡན་པ་ཁག་གཅིག་ཀྱང་ཕེབས་ཡོད། སྐབས་དེར་༸གོང་ས་མཆོག་གིས་བཀའ་སློབ་སྩལ་རྗེས་ཉིན་གུང་ལྗགས་སྨིན་དགྱེས་བཞེས་མཛད།
ཕྱེད་ཡོལ་༸གོང་ས་མཆོག་གིས་མི་ལན་གཙུག་ལག་སློབ་གྲྭར་བཀའ་སློབ་སྩལ་ཡོད་པ་བཅས།།
