༢༠༡༦ ཟླ་ ༡༠ ཚེས་ ༢༤་རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༢༣ ཉིན་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༥༦ འཁོར་བའི་དུས་དྲན་མཛད་སྒོ་སྲུང་བརྩི་གཟབ་རྒྱས་ཞུས་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༡༥ ཡོལ་ཙམ་ཐོག་སྐུ་མགྲོན་གཙོ་བོ་སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དང་། ཆེས་མཐོའི་སྐུ་མགྲོན་བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དགའ་ལྡན་ཕོ་བྲང་ཡིག་ཚང་གི་དྲུང་ཆེ་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་རྒྱུན་ལས་རྣམ་པ། གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམ་པ། སྦྱིན་བདག་དང་སྐུ་མགྲོན་རྣམ་པ། བོད་ཁྱིམ་སློབ་གྲྭ་གཞན་ཁག་ནས་ཕེབས་པའི་དགེ་ལས་སློབ་ཕྲུག་རྣམ་པ། མི་མང་བཅས་ལྷན་འཛོམས་ཀྱིས་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་དང་མི་རིགས་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ལ་རྗེས་དྲན་ཆེད་ངག་བཅད་གུས་འདུད་སྐར་མ་གཅིག་ཞུས་བསྟུན་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་བཏང་།
དེ་རྗེས་བོད་ཁྱིམ་སྤྱི་ཁྱབ་དབུ་འཛིན་ཐུབ་བསྟན་རྡོ་རྗེ་ལགས་ཀྱིས་ཕེབས་བསུའི་གསུང་བཤད་དང་སྦྲགས་ལས་བསྡོམས་སྒྲོགས་སྦྱང་ཞུས། དེ་རྗེས་སྲིད་ཚབ་ཆོས་རིག་བཀའ་བློན་མཆོག་གིས་ཤེས་ཡོན་སྲིད་བྱུས་ཀྱི་བྱུང་རིམ་ཁག་ངོ་སྤྲོད་གནང་བ་དང་ཆབས་ཅིག་གསུང་དོན། སྤྱིར་སྐད་ཡིག་དང་བྱེ་བྲག་ཏུ་ཨིན་ཇི་ལ་སོགས་པ་སྐད་ཡིག་གཉིས་པའི་ཚུལ་དུ་སློབ་ཁྲིད་བྱེད་སྟངས་ཐོག་ཤུགས་སྣོན་བརྒྱབ་སྟེ་ད་ཆ་གང་ལ་གང་ཙམ་ཚོད་ལྟ་དང་དེ་འདྲའི་སྒང་འགྲོ་བཞིན་ཡོད། དེ་བཞིན་ཚན་རིག་ལ་སོགས་པའི་སློབ་ཚན་དེ་དག་སློབ་ཁྲིད་བྱེད་སྟངས་དེ་སྔོན་མ་ང་ཚོ་སློབ་གྲྭར་ཡོད་པའི་གནས་སྟངས་ལྟར་མིན་པར། སློབ་དེབ་དང་དགེ་རྒན་གྱིས་སློབ་ཁྲིད་གནང་བའི་ཐོག་སློབ་ཕྲུག་སོ་སོའི་བསམ་བློ་གཏོང་རྒྱུ་དང་ཉམས་ཞིབ་བྱེད་རྒྱུ་སོགས་མདོར་ན་རྒྱུ་མཚན་ལ་བརྟེན་ནས་གང་ཐུབ་ཤེས་ཐུབ་པ་བྱ་རྒྱུའི་ལམ་སྲོལ་ཐོག་བསྐྱོད་བཞིན་ཡོད། དེ་ཚོའི་ཐོག་མུ་མཐུད་ཤུགས་སྣོན་བརྒྱབ་དགོས་རྒྱུ་ཆགས་ཡོད། དེ་དང་འབྲེལ་བའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོའི་རིགས་ལམ་གྱི་རྣམ་གཞག་དེ་སློབ་གྲྭ་ཁག་གི་སློབ་ཚན་ནང་ཁྲིད་ཐུབ་ན། སློབ་ཚན་གཞན་ཚང་མ་ཤེས་རྟོགས་ཐུབ་རྒྱུར་ཕན་ཁྱད་ཆེན་པོ་ཡོང་རྒྱུའི་བཀའ་སློབ་སྔ་ཕྱི་རིམ་པ་ཕེབས་ཡོད། དེ་དག་བོད་ཁྱིམ་གྱིས་གཙོས་བོད་སློབ་ཁག་གི་ནང་ལག་བསྟར་གང་ཐུབ་གནང་བཞིན་ཡོད། འོན་ཀྱང་དེའི་ཐོག་སྐུ་མདུན་གྱི་དགོངས་བཞེད་སྙིང་པོ་དེ་གང་ཡིན་བསྒྲུབ་ཐབས་གནང་རྒྱུ་ཧ་ཅང་གལ་ཆེན་པོ་མཐོང་བཞིན་ཡོད། གལ་ཆེ་ཤོས་ནི་རིགས་ལམ་གྱི་རྣམ་གཞག་ཐོག་ནས་སློབ་ཕྲུག་ཚོའི་རིག་པ་གྲུང་པོ་དང་རྣོ་པོ་ཆགས་རྒྱུ་དེ་གཙོ་གནད་བཏོན་དགོས་ཀྱི་ཡོད། གལ་ཏེ་སློབ་ཕྲུག་ཚོའི་རིག་པ་ཡག་ཏུ་འགྲོ་རྒྱུར་ཕན་ཁྱད་མེད་ན་རིགས་ལམ་སློབ་ཁྲིད་བྱེད་དགོས་རེད་ཅེས་པའི་བཀའ་སློབ་ཀྱི་སྙིང་དོན་དེ་བསྒྲུབས་ཀྱི་མེད་པ་དྲན་མཁན་ཞིག་ཡིན། ལྷག་པར་ཚན་རིག་ལ་སོགས་པའི་སློབ་ཚན་གང་དང་གང་ཡིན་རུང་སློབ་ཕྲུག་སོ་སོས་དཔྱད་པ་དང་ཉམས་ཞིབ་བྱས་ཏེ་བསམ་བློ་གཏོང་རྒྱུའི་ཐོག་དེང་རབས་ཀྱི་ཤེས་ཡོན་སྒོ་ནས་ཐབས་བྱུས་སྨད་དུ་བྱུང་བ་མང་པོ་ཞིག་ཡོད་ཀྱང་། དེའི་ཐོག་སྲོལ་རྒྱུན་གྱི་ཤེས་ཡོན་ཐོག་ནས་ཐོས་བསམ་སྒོམ་གསུམ་གྱི་རྣམ་གཞག་ཡོད་པ་དེ་དག་ཟུང་འབྲེལ་ཐོག་ནས་བྱེད་ན་གྲུབ་འབྲས་ཡག་པོ་ཞིག་ཡོང་རྒྱུ་ཡིན་སྟབས་དེའི་ཐོག་ཤུགས་སྣོན་སྐྱོན་དགོས་པ་དང་། གང་ལྟར་མདོ་དོན་བཀའ་སློབ་དགོངས་དོན་སྙིང་པོ་དེ་ལག་ལེན་འཁེལ་ཐབས་སུ་སློབ་གྲྭའི་སྡེ་ཚན་ཚང་མས་ཤུགས་སྣོན་བརྒྱབ་རྒྱུ་གལ་ཆེན་པོ་རེད་ཅེས་ཞུ་རྒྱུ་ཡིན། ཞེས་དང་།
དེ་རྗེས་སྲིད་ཚབ་མཆོག་གིས་གསུང་དོན། ཆོལ་ཁ་ཆོས་ལུགས་ཀྱི་ཆིག་སྒྲིལ་ནི་བོད་མིའི་སྒྲིག་འཛུགས་ཀྱི་སྲིད་བྱུས་ཙམ་མིན་པར་བོད་མིའི་རྩ་དོན་གྱི་སྲོག་རྩ་ཡིན་པ་ངོས་འཛིན་གསལ་པོ་གནང་དགོས་པ་དང་། ཆོལ་ཁ་དང་ལུང་ཚན། ཆོས་བརྒྱུད་ནང་ཁུལ་མཐུན་ལམ་དང་དམ་ཚིག་རྡོག་རྩ་ཆིག་སྒྲིལ་དགོས། ང་ཚོས་སྐབས་འཕྲལ་གནས་སྟངས་གཅིག་པུ་མིན་པར་བོད་མི་རིགས་ཀྱི་ལོ་རྒྱུས་ཀྱི་གནས་སྟངས་དང་རྒྱལ་རབས་ཆོས་འབྱུང་། སྐད་ཡིག ཆོས་དང་རིག་གཞུང་། བླ་མ་དང་སློབ་མའི་གནས་སྟངས་སོགས་རྒྱུ་མཚན་མང་པོ་ཞིག་གི་ཐོག་ནས་སྒྲུབ་བྱེད་དམ་གཞི་རྩ་མཐའ་མ་དགག་པའི་རྣམ་གྲངས་མང་པོ་དང་གཞི་རྩ་བརྟན་པོ་ཡོད་པ་ཐུགས་ལ་བཅངས་དགོས་རེད་ཅེས་འབོད་སྐུལ་དང་སྦྲགས་ཞུ་རྒྱུ་ཡིན། བར་སྐབས་འོས་བསྡུའི་ལས་རིམ་སྐབས་ཀྱི་གནས་ཚུལ་རིགས་སླར་ཡང་མི་ཡོང་བར་དམ་བཅའ་བརྟན་པོ་བྱེད་དགོས་རྒྱུ་གལ་ཆེན་པོ་མཐོང་གི་འདུག ལྷག་པར་ཆིག་སྒྲིལ་དང་ཆིག་སྒྲིལ་གྱི་ངོ་བོ་དང་རྣམ་པ་གཉིས་ཀ་མཚོན་བྱེད་ང་ཚོའི་ཤེས་ཡོན་དང་ཆོས་དང་རིག་གཞུང་གི་སྡེ་ཚན་ཆེ་ཁག་ནང་འཐེན་འཁྱེར་གྱི་དུག་ངན་པ་དེ་ཚོ་མི་ཡོང་བར་དམིགས་བསལ་ཡིད་གཟབ་བྱེད་དགོས་རྒྱུ་གལ་ཆེན་ནང་ནས་ཆེན་པོ་ཞིག་མཐོང་གི་འདུག་ཅེས་དེ་རིང་འདིར་གོ་སྐབས་བཟུང་སྟེ་འབོད་སྐུལ་ཞུ་འདོད་བྱུང་། ཞེས་གསུངས་རྗེས་བཀའ་ཤག་ནས་ནད་རིགས་སྔོན་འགོག་དང་དབུལ་ཕོངས་ཉམ་ཐག་ལ་ལྟ་སྐྱོང་ཐད་བོད་མིའི་སྒྲིག་འཛུགས་བཀའ་ཤག་ནས་ཆེས་མཐོའི་ཚོགས་ཆུང་ཁག་གཉིས་ཆེད་འཛུགས་དང་དབུལ་ཕོངས་ཉམ་ཐག་ཚོགས་ཆུང་གིས་སྙན་ཐོ་འབྱོར་ཡོད་པ་དེ་དག་གི་ཐོག་ཞིབ་འཇུག་གྲུབ་རྗེས་ལག་བསྟར་བྱེད་དགོས་པའི་བཀོད་ཁྱབ་བཏང་ཟིན་པ་དང་། ནད་རིགས་སྔོན་འགོག་ཚོགས་ཆུང་གི་སྙན་ཐོའི་ཐོག་ཞིབ་འཇུག་གནང་བཞིན་ཡོད་སྐོར། དེ་བཞིན་༸གོང་ས་མཆོག་གི་བཀའ་སློབ་ལམ་སྟོན་ལྟར་ཆོས་ལུགས་དང་མ་འབྲེལ་བའི་ཡ་རབས་བཟང་སྤྱོད་བསྐྲུན་ཐབས་དང་བོད་པའི་སྲོལ་རྒྱུན་ལ་ཡོད་པའི་ཆོས་ལུགས་དང་འབྲེལ་བའི་བཟང་སྤྱོད་གོམས་གཤིས་བྱེད་ཐབས་གང་འདྲ་ཡོད་མེད་ཀྱི་ཐོག་ཉམས་ཞིབ་བྱས་པའི་ཐོག་ནས་གང་ཐུབ་ལག་ལེན་འཁེལ་ཐུབ་རྒྱུ་དང་ཕན་ཐོགས་ཐུབ་ཐབས་གནང་དགོས་རྒྱུ་གལ་ཆེན་པོ་ཞིག་མཐོང་གི་ཡོད་པ། དེ་བཞིན་བོད་ཕྲུག་ཁྱིམ་སྡེ་འདི་སློབ་གྲྭའི་སྡེ་ཚན་ཆེ་གྲས་ཤིག་ཆགས་ཡོད་སྟབས་དེ་ཚོའི་ཐོག་སྣེ་ཁྲིད་ཐུབ་པ་དང་མདུན་ལ་ཐོན་རོགས་ཞེས་སོགས་ཀྱི་གསུང་བཤད་གནང་ཡོད། དེ་རྗེས་བོད་མི་མང་སྤྱི་འཐུས་ཚོགས་གཙོ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་གྲུབ་བསྟུན་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་བཀའ་སློབ་གནང་།
དེ་རྗེས་སྐུ་མགྲོན་གཙོ་བོ་མཆོག་གིས་བོད་ཁྱིམ་ལས་བྱེད་ཞབས་ལོ་ཉི་ཤུ་འཁོར་བའི་ལས་བྱེད་གྲངས་ ༣༥ ཡོད་པ་རྣམས་ལ་གཟེངས་བསྟོད་དང་། དེ་བཞིན་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ཕྱི་ལོ་ ༢༠༡༦ ལོའི་རྡ་སྟེང་བོད་ཁྱིམ་གྱི་བུ་དང་བུ་མོའི་སློབ་མ་རྩེ་ཕུད་བུའི་སྤྱི་ཁྱབ་རྒན་བདག་ཤ་བོ་རྡོ་རྗེ་ལགས་དང་བུ་མོའི་སྤྱི་ཁྱབ་རྒན་བདག་བསྟན་འཛིན་ཚེ་དཔལ་ལགས་རྣམ་གཉིས་ལ་ལེགས་སྐྱེས་གཟེངས་བསྟོད། རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཆེན་མོའི་ནང་བོད་ཁྱིམ་སློབ་ཕྲུག་ཡོངས་ནས་བོད་ཡིག་བརྒྱ་ཆ་མཐོ་ཤོས་སེ་ལ་ཀུའི་བོད་ཁྱིམ་གྱི་སློབ་མ་ཚེ་རིང་བསོད་ནམས་ལགས་ལ་བརྒྱ་ཆ་ ༩༧ དང་། རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཆེན་མོའི་ནང་བརྒྱ་ ༩༠ ཡན་ལོན་མཁན་སུ་ཇ་བོད་ཁྱིམ་གྱི་སློབ་མ་བསྟན་འཛིན་བུ་ཁྲིད་ལགས་བརྒྱ་ཆ་ ༩༤། ༨ དང་། སེ་ལ་ཁུའི་བོད་ཁྱིམ་གྱི་སློབ་མ་བསྟན་འཛིན་མཚོ་མོ་ལགས་བརྒྱ་ཆ་ ༩༤།༢ སུ་ཇ་བོད་ཁྱིམ་གྱི་སློབ་མ་བསྟན་འཛིན་ནོར་ལྡན་ལགས་བརྒྱ་ཆ་ ༩༤།༦ སུ་ཇ་བོད་ཁྱིམ་གྱི་སློབ་མ་སྐལ་བཟང་ཚེ་བརྟན་ལགས་བརྒྱ་ཆ་ ༩༡ སུ་ཇ་བོད་ཁྱིམ་གྱི་སློབ་མ་ནོར་བུ་སྒྲོལ་མ་ལགས་བརྒྱ་ཆ་ ༩༡ གྷོ་པལ་པུར་བོད་ཁྱིམ་གྱི་སློབ་མ་བསྟན་འཛིན་དབང་མོ་ལགས་བརྒྱ་ཆ་ ༩༠།༤ ། གྷོ་པལ་པུར་བོད་ཁྱིམ་གྱི་སློབ་མ་བསྟན་འཛིན་ནོར་འཛོམས་ལགས་བརྒྱ་ཆ་ ༩༠།༢ ལོན་པ་བཅས་ལ་ཤེས་ཡོན་གྱི་གཟེངས་རྟགས་གནང་ཡོད། དེ་བཞིན་ཤེས་ཡོན་དང་འབྲེལ་བའི་དཔེ་དེབ་ཁག་གཅིག་དབུ་འབྱེད་གནང་ཡོད་པ་མ་ཟད། བོད་ཁྱིམ་སློབ་ཟུར་རྣམས་ཀྱིས་བོད་ཁྱིམ་སྤྱི་ཁྱབ་གཙོ་འཛིན་ཟུར་པ་བཀའ་ཟུར་རྗེ་བཙུན་པདྨ་མཆོག་ལ་བཀའ་དྲིན་རྗེས་དྲན་མཚོན་བྱེད་གཟེངས་རྟགས་དང་། བཀའ་ཟུར་རྗེ་བཙུན་པདྨ་མཆོག་གི་ཐེབས་རྩའི་ཆེད་ཧིན་སྒོར་སྟོང་ཕྲག་ལྔ་བཅུ་ཕུལ་ཡོད། མཐར་སློབ་ཕྲུག་རྣམས་ཀྱིས་གཞས་སྣ་འཁྲབ་སྟོན་དང་ལུས་རྩལ་སོགས་རྩེད་རྗེས་རྡ་སྟེང་བོད་ཁྱིམ་གྱི་འགན་འཛིན་དངོས་གྲུབ་དབང་འདུས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས།།
