༢༠༡༦ ཟླ་ ༡༠ ཚེས་ ༢༦ རེས་གཟའ་ལྷག་པ།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཕྱི་ལོ་ ༢༠༡༦ ཟླ་ ༡༠ ཚེས་ ༢༨ ནས་ཕྱི་ཟླ་ ༡༡ ཚེས་ ༧ བར་རྒྱ་གར་གྱི་རྒྱལ་ས་ལྡི་ལི། གྷོ་ཝ། ཨིན་ཡུལ་རྒྱལ་ས་ལོན་ཌོན་བཅས་སུ་གནད་ཡོད་མི་སྣ་ཁག་གཅིག་མཇལ་འཕྲད་སོགས་ཀྱི་གཞུང་འབྲེལ་ཕྱོགས་ཕེབས་གནང་གཏན་འཁེལ་འདུག དེ་ཡང་དཔལ་ལྡན་སྲིད་སྐྱོང་མཆོག་ཟླ་འདིའི་ཕྱི་ཚེས་ ༢༧ ཉིན་ཐོག་མར་པ་ཐན་ཀོཊ་ནང་རྟེན་གཞི་བྱས་པའི་ Partap World School ཞེས་པའི་སློབ་གྲྭ་དབུ་བརྙེས་པའི་དུས་དྲན་མཛད་སྒོར་ཕེབས་རྒྱུ་དང་།

ཕྱི་ཚེས་ ༢༨ ཉིན་ལྡི་ལིར་རྒྱ་གར་དབུས་གཞུང་གི་ཆེས་མཐོའི་མི་སྣ་མཇལ་འཕྲད་གནང་རྗེས་ཕྱི་ཚེས་ ༢༩ ཉིན་ལྡི་ལི་ནས་ཨིན་ཡུལ་རྒྱལ་ས་ལོན་ཌོན་དུ་ཕེབས་ཐོན་གྱིས་ཕྱི་ཚེས་ ༣༠ ནས་ཕྱི་ཟླ་ ༡༡ ཚེས་ ༣ བར་ལོན་ཌོན་ London དུ་ས་གནས་བོད་རིགས་རྣམས་དང་ཐུག་འཕྲད་ཀྱིས་གསུང་བཤད་གནང་རྒྱུ་མ་ཟད། ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གཅིག་དང་ཐུག་འཕྲད་གནང་རྒྱུ་དང་། དེ་བཞིན་ཁུལ་དེར་རྟེན་གཞི་བྱས་པའི་ཝེ་སི་མིན་སི་ཊར་མཐོ་སློབ་ཁང་ University of Westminster དུ་གསུང་བཤད་གནང་རྒྱུ་ཡིན་འདུག ཕྱོགས་མཚུངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་རྒྱུ་དང་། འཛམ་གླིང་ནང་གི་གྲགས་ཅན་མཐོ་སློབ་ཨོག་སི་ཕོཌ་ Oxford དུ་ཕེབས་རྒྱུ་ཡིན་འདུག

ཕྱི་ཚེས་ ༣ ཉིན་ལོན་ཌོན་ནས་གྲོང་ཁྱེར་མུམ་བྷེ་བརྒྱུད་གྷོ་ཝར་ Goa ཕེབས་འབྱོར་གྱིས་ཕྱི་ཚེས་ ༥ ནས་ ༦ བར་ས་གནས་སུ་ཤེས་ལྡན་མི་སྣའི་འདུ་འཛོམས་ཨིན་ཌི་ཡ་ཀོན་ཀེ་ལེབ་ ༢༠༡༦ India Ideas Conclave 2016 ཞེས་པའི་འདུ་འཛོམས་སུ་ཕེབས་ནས་གསུང་བཤད་གནང་རྒྱུ་མ་ཟད། གནད་ཡོད་མི་སྣ་ཁག་དང་མཇལ་འཕྲད་གནང་རྒྱུ་དང་། དེ་རྗེས་ཕྱི་ཚེས་ ༦ ཉིན་གྷོ་ཝ་ནས་ལྡི་ལི་བརྒྱུད་ཕྱི་ཚེས་ ༧ ཉིན་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས།།