༢༠༡༦ ཟླ་ ༡༠ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༢༨ རེས་གཟའ་པ་སངས་ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གཙོས་ཕྱག་སྦྲེལ་བཀའ་བློན་རྣམ་པས་ཇི་ལྟར་སྔོན་ནས་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྨིན་སྩལ་གྱིས་གཟིམ་ཆུང་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཇལ་ཁ་དང་ལམ་སྟོན་བཀའ་སློབ་སྩལ་གནང་མཛད་འདུག
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་པའི་སྙིང་དོན་དུ། ད་ཆ་མགོན་པོ་གང་ཉིད་མཆོག་གིས་བོད་མིའི་ཆབ་སྲིད་དང་འཛིན་སྐྱོང་གི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱུང་བའི་སྲིད་སྐྱོང་ལ་རྩིས་སྤྲོས་མཛད་ཟིན་སྟབས། དེའི་ཐོག་བཀའ་སློབ་གང་ཡང་སྩལ་གནང་མཛད་རྒྱུ་མིན་ནའང་། དེང་འཛམ་གླིང་ནང་དུ་མདོ་སྔགས་ཟུང་འབྲེལ་ཐོག་དཔལ་ན་ལེནྡྲའི་གཞུང་ལུགས་ལ་སློབ་གཉེར་མཐིལ་ཕྱིན་པ་ཞིག་གནང་དགོས་ཚེ་བོད་སྐད་ལས་ལྷག་པའི་སྐད་ཡིག་གཞན་གཅིག་ཀྱང་མེད་པ་དང་། སྤྱིར་པཱ་ལི་དང་ལེགས་སྦྱར་སྐད་ནང་དུ་ནང་པའི་གཞུང་ཡོད་ཀྱང་དེང་སྐབས་སྐད་ཡིག་དེ་གཉིས་དུས་ཚོད་ཡོལ་ཟིན་པའི་སྐད་ཡིག་ཞིག་ལ་ངོས་འཛིན་བྱེད་བཞིན་ཡོད་སྟབས། བོད་སྐད་ཁོ་ནའི་ཐོག་ནས་ནང་པའི་གཞུང་ལུགས་སྤྱི་དང་།
ལྷག་པར་ནང་ཆོས་ནས་གསུངས་པའི་སེམས་ཁམས་རིག་པ་དང་ཚད་མ་རིག་པའི་རྣམ་གཞག་ཐོག་ཕྱི་རྒྱལ་སེམས་ཁམས་རིག་པ་བ་དང་ཚན་རིག་པ་སོགས་ཀྱིས་གཙོས་མཁས་དབང་དང་། ཤེས་ལྡན་མི་སྣ་ཧ་ཅང་མང་པོའི་ཡིད་དབང་འཕྲོག་ནས་དེར་དོ་སྣང་ཧ་ཅང་བྱེད་བཞིན་པའི་དུས་ཚོད་གཅིག་ལ་བསླེབས་ཡོད་པར་བརྟེན། བོད་མི་ཚོའི་ལག་ཏུ་དེ་ལྟ་བུའི་འཛམ་གླིང་གཅེས་ནོར་ཞིག་ཡོད་པ་དེ་དག་བོད་མི་རང་ཉིད་ཀྱིས་འགྲེལ་བཤད་བརྒྱབ་ནས་འཇིག་རྟེན་ཀུན་ལ་ཕན་པ་ཞིག་ཇི་ལྟར་བྱེད་དགོས་མིན་ཐད་ངེས་པར་དུ་བསམ་བློ་ཤུགས་ཆེ་ཙམ་གཏོང་དགོས་པ་དང་། བོད་མིའི་ལ་ཞེན་ཟེར་ནའང་འདྲ། བོད་བསྟན་པ་ཆབ་སྲིད་ལ་ཞབས་འདེགས་ཟེར་ནའང་དེ་ཡིན་པར་བརྟེན། དགོན་པ་གྲྭ་ཚང་ཁག་ལ་མཚོན་ན་༸གོང་ས་མཆོག་གིས་སྔ་མོ་ནས་བཀའ་སློབ་དེ་ལྟར་བརྩལ་གནང་མཛད་ཡོད་ཀྱང་། བོད་མིའི་ཐུན་མིན་རིག་གཞུང་རྩ་ཆེ་དེ་དག་དགོན་པ་གྲྭ་ཚང་ཁག་གཅིག་པུས་སྲུང་སྐྱོབ་བྱེད་དགོས་པའི་གནས་སྟངས་ཤིག་རྩ་བ་ནས་མིན་སྟབས། ནང་པ་སངས་རྒྱས་པའི་ལྟ་གྲུབ་འདི་ང་ཚོ་བོད་རིགས་ནང་པ་ཡོད་དོ་ཅོག་གིས་འགན་ཁུར་བླངས་ནས་མི་སྐྱ་ཕོ་མོ་ཚོས་ཀྱང་ནང་ཆོས་ལ་སློབ་གཉེར་བྱ་རྒྱུ་ཧ་ཅང་གལ་ཆེན་པོ་ཡིན་པ་དང་། སློབ་གྲྭ་ཁག་གི་ནང་དུའང་ནང་པའི་ལྟ་གྲུབ་དང་འབྲེལ་བའི་སེམས་ཁམས་རིག་པ་དང་ཚད་མ་རིག་པའི་རྣམ་གཞག་དེ་དག་སློབ་ཁྲིད་བྱ་རྒྱུ་ཧ་ཅང་གལ་ཆེ་ཡིན་སྐོར། ཉེ་ལམ་བཙན་བྱོལ་བོད་མིའི་སློབ་གྲྭ་ཁག་གི་ནང་དུ་ཆོས་དགེ་ཞེས་པའི་ཚབ་ཏུ་ལྟ་གྲུབ་སློབ་དཔོན། ཞེས་མིང་སྒྱུར་དགོས་པའི་ལམ་སྟོན་མཛད་ཚུལ་བཅས་ཟབ་གསལ་གསུང་གི་བདུད་རྩིས་ཡིད་ཚིམས་པར་མཛད།
སྐབས་དེར་སྲིད་སྐྱོང་མཆོག་གིས་ཉེ་ལམ་བཀའ་ཤག་ནས་བཙན་བྱོལ་བོད་མིའི་གཞིས་ཆགས་ཁག་གཙོ་བོར་གྱུར་བའི་བོད་མི་འདུ་སྡོད་ཀྱི་ས་ཁུལ་ཁག་ཏུ་ཉམ་ཐག་ཞིབ་འཇུག་དང་ནད་རིགས་སྔོན་འགོག་ལས་དོན་ཞིབ་འཇུག་ཚོགས་ཆུང་བཙུགས་ནས་ཚོགས་ཆུང་གི་རྒྱབ་གཉེར་སྙན་ཐོ་ལྟར་བཀའ་ཤག་གིས་ལས་དོན་སྤེལ་ཕྱོགས་སྙིང་བསྡུས་ལྷ་སྙན་སྒྲོན་འབུལ་ཞུས་པར་མགོན་པོ་གང་ཉིད་མཆོག་ཐུགས་ཧ་ཅང་དགྱེས་ཚོར་དང་སྦྲགས་བསྔགས་བརྗོད་ཀྱང་མཛད་འདུག མཇལ་བཅར་སྐབས་བཀའ་དྲུང་རྫོང་ཁ་སྟོབས་རྒྱལ་ཚེ་རིང་མཆོག་ཀྱང་ལྷན་བཅར་ཞུས་འདུག་པ་བཅས།།
