༢༠༡༦ ཟླ་ ༡༠ ཚེས་ ༢༠ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༦ ཟླ་ ༡༠ ཚེས་ ༢༠ ཉིན་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ནང་དུ་ཡུལ་དེའི་གྲོས་ཚོགས་གོང་མའི་ཚོགས་ཁང་དུ་ཆིབས་སྒྱུར་བསྐྱངས་ནས་ཁུལ་དེར་༸ཞབས་སོར་བདེ་བར་འཁོད་སྐབས། གྲོས་ཚོགས་ཀྱི་ཚོགས་གཞོན་ལྕམ་སྐུ་མི་ལུ་སེ་ཧོར་ས་ཀ་ Miluse Horska མཆོག་གིས་གཙོས་གྲོས་ཚོགས་གོང་མའི་འཐུས་མི་ ༡༤ དང་གྲོས་ཚོགས་འོག་མའི་འཐུས་མི་གྲངས་ ༣༤ ཕེབས་བསུའི་སྣེ་ལེན་གཟབ་རྒྱས་ཞུས་འདུག སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། འདིར་མི་མང་གི་སྐུ་ཚབ་ཁྱེད་རྣམས་དང་མཇལ་བར་ངོས་ལ་ཆེས་མཐོང་ཧ་ཅང་ཐོབ་པ་ཞིག་བྱུང་། ངོས་རང་ཆུང་དུས་སྐབས་ནས་མང་གཙོའི་ལམ་ལུགས་ལ་དོ་སྣང་དང་གུས་བརྩི་ཆེན་པོ་ཡོད། ངོས་རང་བོད་ནང་དུ་ཡོད་སྐབས་ལེགས་བཅོས་ལས་ཁུངས་བཙུགས་ནས་ལམ་ལུགས་རྙིང་པ་དེར་བཅོས་འགྱུར་བྱེད་ཐབས་བྱས་ཀྱང་རྒྱ་ནག་གཞུང་གིས་དེར་མོས་མཐུན་མ་བྱས་པར་ཁོ་པ་ཚོའི་ལངས་ཕྱོགས་ལྟར་བཅོས་འགྱུར་གཏོང་དགོས་པའི་རྣམ་འགྱུར་བསྟན་པར་བརྟེན་ང་ཚོའི་བསམ་ཚུལ་ལྟར་བོད་ནང་དུ་བཅོས་འགྱུར་བཏང་ཐུབ་མེད།
དེ་རྗེས་ཕྱི་ལོ་ ༡༩༥༩ ལོར་རྒྱ་གར་དུ་བྲོས་བྱོལ་ལ་འབྱོར་མཚམས་སྐབས་འགྱུར་བཅོས་བཏང་འགོ་བཙུགས་ཐུབ་པ་བྱུང་། ང་ཚོས་བཙན་བྱོལ་དུ་གྲོས་ཚོགས་ལམ་ལུགས་གསར་གཏོད་ཐུབ་པ་མ་ཟད། ཕྱི་ལོ་ ༡༩༦༣ ལོར་བཅའ་ཁྲིམས་གཏན་འབེབས་བྱས་ནས་གྲོས་ཚོགས་འཐུས་མི་ངོ་ཡོད་གསུམ་ཆ་གཉིས་ཀྱི་རྒྱབ་སྐྱོར་ཐོག་ནས་ཏཱ་ལའི་བླ་མའི་དབང་ཆ་ཕྱིར་བསྡུ་བྱེད་ཆོག་པའི་ཆ་རྐྱེན་བཀོད་ཡོད། ཕྱི་ལོ་ ༢༠༠༡ ལོ་ནས་བཟུང་ངོས་རང་བོད་མིའི་ཆབ་སྲིད་འགོ་ཁྲིད་ནས་ཕྱེད་རྒས་ཡོལ་དང་དེ་རྗེས་ཕྱི་ལོ་ ༢༠༡༡ ལོ་ནས་བཟུང་ངོས་ཀྱིས་བོད་མིའི་ཆབ་སྲིད་ཀྱི་ལས་འགན་ནས་རྒས་ཡོལ་ཆ་ཚང་ཞུས་པ་མ་ཟད། ཏཱ་ལའི་བླ་མས་གཞུང་འཛིན་ལམ་ལུགས་དེ་མཇུག་བསྒྲིལ་བ་ཡིན། ཞེས་བཀའ་སློབ་སྩལ།
སྐབས་དེར་ཚོགས་གཞོན་ལྕམ་སྐུ་མི་ལུ་སེ་ཧོར་ས་ཀ་ Miluse Horska མཆོག་གིས་༸གོང་ས་མཆོག་ལ་གྲོས་ཚོགས་འཐུས་མི་རྣམ་པར་བཀའ་སློབ་གསོལ་འདེབས་ཞུས་པར་༸གོང་ས་མཆོག་གིས་བཀའ་སློབ་སྩལ་དོན། སོ་སོའི་ལྟ་གྲུབ་ལངས་ཕྱོགས་གང་ཡིན་པ་བརྟན་བཟུང་ཐོག་སྲིད་བྱུས་ཇི་འདྲ་ཞིག་ལག་བསྟར་བྱེད་མིན་གྱི་ཐབས་ལམ་དེ་སོ་སོས་ཐག་གཅོད་བྱས་འགྲོ་རྒྱུ་རེད། ཡུལ་འདིར་མཚོན་ན། དམར་ཤོག་སྦོ་ལུག་རྗེས་སྲིད་འཛིན་ཧ་ཝེལ་ Havel མཆོག་གིས་དབུ་ཁྲིད་འོག་མང་གཙོ་ཐོག་མར་འཛུགས་མཁན་གྲས་ཤིག་ཡིན། ངོས་ཀྱི་རྒྱུན་དུ་མི་མང་ཚོར་གང་བརྗོད་བཞིན་ཡོད་ཅེ་ན། ང་ཚོ་ཚང་མ་ལུས་སེམས་དང་སེམས་ཚོར་སོགས་གང་གི་ཆ་ནས་འགྲོ་བ་མི་གཅིག་མཚུངས་ཤིག་ཡིན། ང་ཚོར་གཞན་ལ་ཕན་གནོད་བྱེད་པའི་ནུས་པ་གཉིས་ཀ་ལྡན་ཡོད། ཆོས་ཁས་ལེན་མིན་ཇི་ལྟར་ཡང་གཞི་རྩའི་ཆ་ནས་ང་ཚོ་ཚང་མ་འགྲོ་བ་མི་རིགས་གཅིག་གྱུར་ཡིན། རང་གི་རྣམ་དཔྱོད་ཐོག་ནས་ཁོང་ཁྲོ་དང་ཕྲག་དོག རང་གཅེས་འཛིན་སོགས་བློ་མ་རུང་པ་དེ་དག་གིས་རང་ལ་གྱོང་གུན་ཇི་ཙམ་བཏང་མིན་དང་། དེ་ལས་ལྡོག་སྟེ་བྱམས་བརྩེ་དང་གཞན་གཅེས་འཛིན་གྱི་བློ་དེ་དག་གིས་རང་ཉིད་ལ་ཕན་ཐོགས་ཇི་ཙམ་བསྒྲུབ་ཐུབ་མིན་རྟོགས་ཐུབ། ངོས་ཀྱིས་རྒྱུན་ལྡན་མི་སུ་འདྲ་ཞིག་དང་ཐུག་ཀྱང་འགྲོ་བ་མི་རིགས་གཅིག་གྱུར་ཡིན་བསམས་པའི་ཐོག་ནས་སྐད་ཆ་འདི་བཤད་པ་ལས་ངོས་རང་ནང་པ་ཞིག་དང་ཏཱ་ལའི་བླ་མ་ཡིན་བསམས་པའི་ཐོག་ནས་སྐད་ཆ་འདི་བཤད་པ་ཞིག་མིན། གལ་ཏེ་སོ་སོའི་ལྟ་གྲུབ་ལངས་ཕྱོགས་གང་ཡིན་པ་དེ་རྐང་འཛིན་བྱས་ནས་ཕྱིན་པ་ཡིན་ན། ཕྱི་གསལ་ནང་གསལ་དྲང་པོ་དྲང་གཞག་ཐོག་ནས་འགྲོ་ཐུབ། ཁྱད་ཆོས་འདི་རྣམས་ཁྱེད་ཚོ་མང་ཚོགས་ཀྱིས་འོས་འདེམས་བྱས་པའི་ཆབ་སྲིད་མི་སྣ་ཚོར་གལ་ཆེན་པོ་རེད། དེ་སྔ་ཡུལ་འདི་དམར་པོའི་འོག་ནས་བཅིངས་གྲོལ་ཐོབ་མཚམས་ངོས་རང་འདིར་བསླེབས་པ་རེད།
སྐབས་དེ་དུས་ངོས་ཀྱིས་བསམ་འཆར་བཏོན་པའི་ནང། དཔལ་འབྱོར་ལམ་ལུགས་ཐོག་ལ་ཆ་མཚོན་ན། དཔལ་འབྱོར་ཡར་རྒྱས་ཀྱི་ཁེ་ཕན་དེ་སྤྱི་ཚོགས་རིང་ལུགས་ཀྱི་ལམ་སྲོལ་ལྟར་མི་མང་ཉམ་ཐག་དབུལ་ཕོངས་རྣམས་ལ་ཐོབ་ཐུབ་པ་དང་། དཔལ་འབྱོར་འཛུགས་སྐྲུན་གྱི་ལམ་ལུགས་དེ་མ་རྩའི་རིང་ལུགས་ཀྱི་ལམ་སྲོལ་ལྟར་འཁྲུག་ཆ་དོད་པོ་དགོས། ཞེས་ཞུ་རྒྱུ་བྱུང་། ཉེ་ལམ་ངོས་ཀྱིས་ཨུ་རུ་སུའི་ཤེས་ལྡན་པ་ཁག་གཅིག་དང་ཐུག་པ་ཡིན། དེང་སྐབས་ཨུ་རུ་སུའི་ནང་དམ་བསྒྲགས་ཆེ་རུ་ཕྱིན་ཡོད་སྐོར་བརྗོད་བྱུང་། དེར་བརྟེན་ཁྱེད་ཚོས་གོ་སྐབས་ནམ་བྱུང་སྐབས་ཨུ་རུ་སུའི་ཡུལ་སྐོར་སྤྲོ་འཆམ་པ་དང། སློབ་ཕྲུག་བཅས་དང་ཐུག་ནས་ཅེག་སྤྱི་མཐུན་རྒྱལ་ཁབ་ཀྱི་རང་དབང་དང་མང་གཙོའི་རིན་ཐང་དེ་དག་ངོ་སྤྲོད་གནང་ཐུབ་པ་དགོས།
ཉིན་ཤེས་སྔོན་ངོས་ཀྱི་སུ་ལོ་ཝ་ཀི་ཡའི་སྲིད་འཛིན་སྐུ་ཞབས་ཨན་དེ་རེ་ཇི་ཀི་སི་ཀ་ Andrej Kiska མཆོག་དང་མཇལ་རྒྱུ་བྱུང་། ཁོང་ནི་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་སྐུ་གཤེགས་ཧ་ཝེལ་ Havel མཆོག་གི་རྗེས་འབྲང་གཤའ་མ་ཞིག་རེད་འདུག ངོས་རང་ཁོང་ལ་ངོ་མཚར་སྐྱེས་བྱུང་། ཕྱོགས་མཚུངས་གླེང་སྟེགས་ ༢༠༠༠ བགྲོ་གླེང་ལྷན་ཚོགས་སྐབས་མཉམ་ཞུགས་གནང་མཁན་ཨི་ཇིབ་ Egypt དང་སོ་དི་ཨ་རབ། Saudi Arabia དེ་བཞིན་ཨི་སི་རེལ་ Israel བཅས་ཀྱི་སྐུ་ཚབ་རྣམས་དང་ཐུག་པ་ཡིན། ཧ་ཅང་ཡག་པོ་འདུག འོན་ཀྱང་ཁོང་རྣམས་དང་ལྷན་སྐད་ཆ་ཤོད་རྒྱུའི་དུས་ཚོད་དེ་ཙམ་མ་བྱུང་། དངོས་གནས་བྱས་ན་བགྲོ་གླེང་ནང་དེང་སྐབས་སློབ་ཕྲུག་ཁག་དང་། ལྷག་པར་དམག་འཁྲུག་ཤོར་བཞིན་པའི་ཡུལ་གྲུ་ཁག་ནས་དངོས་སུ་དཀའ་སྡུག་མྱོང་མཁན་གྱི་སློབ་ཕྲུག་དེ་འདྲ་མགྲོན་འབོད་ཐོག་མྱོང་ཚོར་བརྗེ་ལེན་བྱེད་ཐུབ་པ་ཡིན་ན། བགྲོ་གླེང་ཏོག་ཙམ་རྒྱ་ཆེ་རུ་ཡོང་ཐུབ། དེ་སྔ་སྐབས་ཤིག་ལ་ཨ་རའི་ཞི་བདེའི་བསྟི་གནས་ཁང་ United States Institute of Peace གིས་གོ་སྒྲིག་འོག་སློབ་ཕྲུག་ཚོགས་ཁག་གཅིག་རྡ་སར་ངོས་དང་ཐུག་འཕྲད་བྱུང་། ཞེས་བཀའ་སློབ་སྩལ།
ཉིན་གུང་ལྗགས་སྨིན་གྲུབ་བསྟུན་༸གོང་ས་མཆོག་གིས་ལུ་ཁར་ན་གསོལ་མགྲོན་ཁང་ Lucerna Palace དུ་མང་ཚོགས་ ༢༨༠༠ བརྒལ་བར་བཀའ་སློབ་སྩལ།།
