ཕྱི་ལོ་ ༢༠༡༦ ཟླ་ ༡༠ ཚེས་ ༡༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཅེག་སྤྱི་མཐུན་རྒྱལ་ Czech Republic ཁབ་ཀྱི་རྒྱལ་ས་པ་རག་ Prague ནང་དུ་གླེང་སྟེགས་ ༢༠༠༠ Forum 2000 ཞེས་པའི་ཞི་བདེའི་ལྷན་ཚོགས་སུ་འགན་ཁུར་གྱི་སྙིང་སྟོབས། ཞེས་པའི་བརྗོད་གཞིའི་ཐོག་བཀའ་སློབ་སྩལ་འདུག
དེ་ཡང་ཡུལ་དེའི་རིག་གཞུང་བློན་ཆེན་སྐུ་ཞབས་ཌེ་ནི་ཡལ་ཧར་མན་ Mr Daniel Herman མཆོག་གིས་གཙོས་གྲོས་ཚོགས་འཐུས་མི་ཁག་གཅིག་གིས་༸གོང་ས་མཆོག་ཅེག་སྤྱི་མཐུན་རྒྱལ་ཁབ་ཀྱི་རིག་གཞུང་ལས་ཁུངས་སུ་ཕེབས་བསུའི་སྣེ་ལེན་གཟབ་རྒྱས་ཞུས། གྲོས་ཚོགས་འཐུས་མི་ཁོང་རྣམས་ཡུལ་དེའི་ཡི་ཤུ་དང་མང་གཙོ་ཆིག་སྒྲིལ་གྱི་མི་མང་ཚོགས་པ། Christian and Democratic Union- Czechoslovak People’s Party ཞེས་པའི་ཆབ་སྲིད་ཚོགས་པའི་འཐུས་མི་ཡིན་འདུག
དེ་རྗེས་ལས་ཁུངས་ཀྱི་ཉེ་འགྲམ་དུ་ཡོད་པའི་ཡི་ཤུའི་ལྷ་ཁང་དུ་དབུ་ཁྲིད་རྣམས་ཆིབས་སྒྱུར་བསྐྱངས་ནས་གནས་གཟིགས་མཛད་གྲུབ་བསྟུན། ལས་ཁུངས་དེའི་ནང་རིག་གཞུང་བློན་ཆེན་མཆོག་དང་གྲོས་ཚོགས་འཐུས་མི་བཅས་ལྷན་བཞུགས་ཐོག་༸གོང་ས་མཆོག་གིས་བཀའ་སློབ་སྩལ་དོན། སྐྱེ་འགྲོ་ཡོངས་ལ་སེམས་ཁུར་བྱེད་ཐུབ་པ་ནི་མིའི་ཐུན་མིན་ཁྱད་ཆོས་ཞིག་ཡིན། ཚན་རིག་པས་བརྟག་དཔྱད་བྱས་འབྲས་སུ་གཞི་རྩའི་འགྲོ་བ་མིའི་ལྷན་སྐྱེས་རང་བཞིན་ནི་བྱམས་བརྩེ་ལྡན་པ་ཞིག་ཡིན་པ་ར་སྤྲོད་ཐུབ་ཡོད།
སྤྱིར་འཇིག་རྟེན་བྱེད་པོ་འདོད་མཁན་ཚོས། བྱམས་བརྩེའི་བདག་ཉིད་ཅན་གྱི་དཀོན་མཆོག་འདོད་པར་བརྟེན། ཁོང་གིས་བཀོད་པའི་སེམས་ཅན་རྣམས་ཀྱང་བྱམས་བརྩེ་ལྡན་པ་རེད། ཅེས་བརྗོད་ན་མཐུན་པ་ཞིག་ཆགས་ཡོད། འགྲོ་བ་མི་ཐེར་འབུམ་བདུན་ཡོད་པའི་ཁྲོད་དཀའ་ངལ་མེད་མཁན་གཅིག་ཀྱང་མེད། དཀའ་ངལ་འཕྲད་སྐབས་གཞན་ལ་བྱམས་བརྩེ་སྒོམ་དགོས། དེ་འདྲ་བྱུང་ཚེ་རང་རྒྱུད་འཁྲུག་བཞིན་པ་དེ་ཏོག་ཙམ་ལྷོད་དུ་ཕྱིན་ནས་བསམ་བློ་ཞི་བདེ་ལྡན་པ་ཞིག་ཡོང་ཐུབ། ཆོས་ལ་མིའི་བསམ་བློ་ཞི་བདེ་བག་ཕེབས་བཟོ་རྒྱུ་དང་། དེའི་ཐོག་ནས་འཚེ་བ་ཉུང་དུ་གཏོང་རྒྱུའི་འགན་ཞིག་ཡོད། ཁོང་ཁྲོ་དང་ཞེ་སྡང་། འཇིགས་སྣང་སོགས་ལས་འཚེ་བ་ཡོང་བཞིན་ཡོད། དེང་འཛམ་གླིང་ནང་མི་ཁག་གཅིག་གིས་ཁ་ཙམ་ལས་ངོ་ཐོག་ལག་ལེན་སྐབས་ཆོས་མེད་སྨྲ་མཁན་ཚོ་དང་ཧ་ལམ་གཅིག་པ་ལྟ་བུ་བྱེད་མཁན་ཡོད། ཆོས་ཁས་བླངས་ཟིན་རྗེས་ཉམས་ལེན་བྱ་རྒྱུར་བསམ་བློ་ཤུགས་ཆེ་ཙམ་གཏོང་དགོས། ཞེས་བཀའ་སློབ་སྩལ།
སྐབས་དེར་རིག་གཞུང་བློན་ཆེན་མཆོག་གིས་༸གོང་ས་མཆོག་གིས་བཀའ་སློབ་ལམ་སྟོན་མཛད་པར་བཀའ་དྲིན་ཆེ་ཞུས་པ་དང་སྦྲགས། ཕྱག་སྦྲེལ་རྣམས་ཀྱིས་གང་ཐུབ་བཀའ་སློབ་དེ་དག་ལག་ལེན་གནང་ཐབས་ཞུ་རྒྱུ་ཡིན་སྐོར་སྙན་སེང་ཞུས་པར་མགོན་པོ་གང་ཉིད་མཆོག་གིས་སླར་ཡང་མུ་མཐུད་བཀའ་སློབ་སྩལ་དོན། དེང་སྐབས་ཕྱི་དངོས་པོའི་མཐུན་རྐྱེན་ཡར་རྒྱས་ལ་དགའ་མོས་ཧ་ཅང་བྱེད་བཞིན་པའི་དུས་སྐབས་ཤིག་རེད། འོན་ཀྱང་ཕྱི་དངོས་པོས་ལུས་ཀྱི་བདེ་བ་ཙམ་ལས་དོན་དམ་ནང་གི་བསམ་བློ་ཞི་བདེ་བག་ཕེབས་དང་སྙིང་སྟོབས་དེ་དག་བྱམས་བརྩེས་སྐྲུན་ཐུབ། གཞན་ལ་བྱམས་བརྩེའི་བསམ་པ་ལྡན་ཡོད་ན་དབུལ་ཕྱུག་སུ་འདྲ་ཞིག་ཡིན་རུང་གང་ཟག་རང་ཉིད་མི་ཚེ་བདེ་ཞིང་སྐྱིད་པ་ཞིག་ཐོག་ནས་བསྐྱལ་ཐུབ།
དེ་མིན་ལྷ་ཁང་ནང་ཕྱིན་པ་ཙམ་ལས་མི་ཚེ་སྐྱེལ་སྐབས་ཆོས་ཀྱི་བསླབ་བྱའི་ཐོག་བསམ་བློ་གང་ཡང་མི་གཏོང་མཁན་དེ་འདྲ་ཡོད།
དེ་སྔ་ཕྱི་ལོ་ ༡༩༨༦ ལོར་ཡི་ཤུའི་བླ་ཆེན་པོབ་ཇོན་པོལ་ཁྲི་ཐོག་གཉིས་པ་ Pope John Paul II མཆོག་གིས་ཨི་ཊ་ལིའི་གྲོང་ཁྱེར་ཨ་སི་སིའི་ Assisi ནང་དུ་ཆོས་ལུགས་འདྲ་མིན་གྱི་སྐུ་ཚབ་གདན་ཞུས་ཐོག་རྒྱལ་སྤྱིའི་རང་བཞིན་ལྡན་པའི་ཆོས་ལུགས་མཐུན་སྒྲིལ་གྱི་ལྷན་ཚོགས་ཤིག་གོ་སྒྲིག་གནང་ཡོད། བསམ་གྱིས་མི་ཁྱབ་པ་རེད། སྐབས་དེར་ངོས་ནས་བླ་ཆེན་པོབ་མཆོག་ལ་ལས་འགུལ་དེ་ནི་ཆོས་ལུགས་ཕན་ཚུན་གོ་རྟོགས་སྤེལ་རེས་ཀྱིས་ལམ་ནས་མཐུན་སྒྲིལ་གོང་མཐོར་གཏོང་རྒྱུའི་ལས་འགུལ་ཐོག་མར་དབུ་འཛུགས་གནང་བ་ལྟ་བུ་ཞིག་ལ་གཟིགས་དགོས་སྐོར་ཞུ་རྒྱུ་བྱུང་། ཞེས་བཀའ་སློབ་སྩལ་བསྟུན། དབུ་ཁྲིད་རྣམས་ཀྱིས་༸གོང་ས་མཆོག་ལ་དེབ་ཆུང་ཁག་གཅིག་ལ་མཚན་རྟགས་སྐྱོན་ཆེད་གསོལ་འདེབས་ཞུས་པ་མ་ཟད། སྐུ་པར་ལྷན་སྒྲོན་མཛད་ཆེད་གསོལ་འདེབས་ཞུས་དོན་ལྟར་བཀའ་བཞེས་བཟང་པོས་ཁོང་རྣམས་ཡིད་ཚིམ་པར་མཛད།།
