༢༠༡༦ ཟླ་ ༡༠ ཚེས་ ༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་གྱི་ཆོས་ཞུ་བ་གཙོ་བོར་གྱུར་བའི་དད་ལྡན་ཆོས་ཞུ་བ་རྣམས་ལ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སློབ་དཔོན་འཕགས་པ་ལྷས་མཛད་པའི་དབུ་མ་བཞི་བརྒྱ་པའི་བཀའ་ཆོས་དང་དགེ་བསྙེན་གྱི་སྡོམ་པ་འབོག་ཆོག་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༨ ཐོག་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་བསྐྱངས་ཏེ་བཞུགས་ཁྲིར་༸ཞབས་སོར་འཁོད་གྲུབ་མཚམས་རྒྱའི་སྐད་ཡིག་ཐོག་ནས་ཤེས་རབ་སྙིང་པོ་གསུང་འདོན་དང་རྒྱལ་སྲས་སྤྱོད་ལ་འཇུག་པར་ཤོག །ཅེས་པའི་ཚིགས་སུ་བཅད་པའི་ཐོག་ནས་རྒྱལ་སྲས་ཀྱི་སྤྱོད་པ་ལ་འཇུག་ཚུལ་སྐོར་བཀའ་སློབ་མཛད་རྗེས། དགེ་བསྙེན་གྱི་བསླབ་སྡོམ་སྩལ། དེ་ནས་བྱང་ཆུབ་སེམས་དཔའི་སྡོམ་པ་འབོག་ཆོག་གིས་སྔོན་འགྲོའི་བྱང་ཆུབ་ཀྱི་སེམས་སྒོམ་ཚུལ་དང་། དགོས་པ་གང་གི་ཆེད་དུ་སྒོམ་མིན། རང་ལ་བདེ་སྐྱིད་དགོས་ན་བྱམས་བརྩེ་སྒོམ་དགོས་པ། དེ་ལྟར་བསྒོམས་པའི་ཕན་ཡོན་སྐོར་བཀའ་ཁྲིད་རྒྱས་པར་སྩལ་རྗེས་བྱང་སེམས་ཀྱི་སྡོམ་པ་འབོག་ཆོག་མཛད་གྲུབ་བསྟུན། ཐུབ་པའི་མཚན་སྔགས་དང་། སྤྱན་རས་གཟིགས་ཀྱི་གཟུངས་སྔགས་ཡིག་དྲུག འཇམ་དབྱངས་ཀྱི་མཚན་སྔགས། སྒྲོལ་མའི་གཟུངས་སྔགས་བཅས་ཀྱི་ལྗགས་ལུང་སྩལ།།
