༢༠༡༦ ཟླ་ ༡༠ ཚེས་ ༡༨ རེས་གཟའ་མིག་དམར།

༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༡༨ ཉིན་གྱི་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་བཞུགས་སྒར་རྡ་སའི་ཉེ་འགྲམ་དུ་ཡོད་པའི་སཱ་ར་བོད་ཀྱི་མཐོ་རིམ་སློབ་གཉེར་ཁང་དུ་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་གཉིས་པ་ཚོགས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ཚོགས་འདུ་དབུ་འབྱེད་ཀྱི་མཛད་སྒོའི་ཐོག་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། དམིགས་བསལ་སྐུ་མགྲོན་ཇ་ཡ་དེ་བ་ར་ན་དྲེ་ Jayadeva Ranade མཆོག རྡ་ས་རིགས་ལམ་སློབ་གཉེར་ཁང་གི་སྤྱི་ཁྱབ་འགན་འཛིན་སྤྱི་ཟུར་དགེ་བཤེས་སྐལ་བཟང་དགྲ་འདུལ་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསོད་ནམས་བསྟན་འཛིན་ལགས། ཚོགས་བཅར་བ་བོད་ཀྱི་ན་གཞོན་ཉམས་ཞིབ་པ་དང་། ཟུར་ཉན་པ། གསར་འགོད་པ་བཅས་ལྷན་འཛོམས་ཀྱིས་ཐོག་མར་སྐུ་མགྲོན་གཙོ་བོ་མཆོག་དང་དམིགས་བསལ་སྐུ་མགྲོན་བཅས་ནས་སྣང་གསལ་ཞལ་ཕྱེ་གནང་གྲུབ་མཚམས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསོད་ནམས་བསྟན་འཛིན་ལགས་ཀྱིས་དགའ་བསུའི་གསུང་བཤད་གནང་།

དེ་རྗེས་དམིགས་བསལ་སྐུ་མགྲོན་མཆོག་གིས་དེང་སྐབས་བོད་དང་རྒྱ་ནག་གི་ས་ཁུལ་ཁག་གི་ནང་ཡར་རྒྱས་ཇི་ཙམ་འགྲོ་བཞིན་པའི་ཐོག་རྒྱ་གར་གྱི་མཁས་དབང་དང་ཉམས་ཞིབ་པ་ཚོའི་དོ་སྣང་སླེབས་ཐབས་སུ་རྒྱ་ནག་གཞུང་གིས་དམིགས་བསལ་འབད་བརྩོན་བྱེད་བཞིན་ཡོད་སྐོར་དང་། མ་འོངས་པར་བོད་དང་བོད་དོན་འཐབ་རྩོད་ཀྱི་གནས་སྟངས་ཇི་འདྲ་ཞིག་ཆགས་མིན་སྐོར་ཚོད་དཔག་ཐུབ་ཆེད། དང་ཐོག་འདས་པའི་ལོ་ཤས་ནང་རྒྱ་ནག་ནང་གི་གནས་སྟངས་དང་། རྒྱ་ནག་གཞུང་གི་སྲིད་བྱུས་སོགས་ཀྱི་ཐོག་ཉམས་ཞིབ་བྱ་རྒྱུ་གལ་ཆེན་པོ་ཡིན་སྐོར། ཞི་ཅིང་ཕིན་རྒྱ་ནག་གི་སྲིད་འཛིན་དུ་འཁོད་རྗེས་རྒྱ་ནག་ས་ཁུལ་ཁག་སྤྱི་དང་། ལྷག་པར་བོད་དང་ཡུ་གུར་གཉིས་ཀྱི་ནང་ལག་བསྟར་བྱེད་བཞིན་པའི་སྲིད་བྱུས་ལ་འགྱུར་བ་ཇི་བཏང་ངོ་སྤྲོད་གནང་བ་མ་ཟད། རྒྱ་ནག་གཞུང་གིས་བོད་ནང་འཛུགས་སྐྲུན་ཡར་རྒྱས་ཀྱི་ཐོག་ནས་ཞི་བདེ་ལྷིང་འཇགས་ཡོང་ཐབས་བྱས་ཀྱང་། སྲིད་བྱུས་དེ་ལམ་ལྷོངས་མ་བྱུང་བར་བརྟེན། དགོན་སྡེ་ཁག་གི་ནང་སྔར་ལྷག་དམ་བསྒྲགས་བྱེད་འགོ་བཙུགས་པ་དང་། གསར་འགྱུར་བརྒྱུད་ལམ་ཁག་ཀྱང་རྒྱ་ནག་གཞུང་གིས་སྟངས་འཛིན་བྱེད་བཞིན་པ། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་རྒྱལ་སྤྱིའི་ནང་གི་མཛད་འཕྲིན་ཁག་ལ་འགོག་རྐྱེན་བཟོ་གང་ཐུབ་བྱེད་ཀྱི་ཡོད་པ་བོད་དོན་འཐབ་རྩོད་རྒྱུན་ཁྱོངས་ནས་གནས་ཐུབ་པ་བྱ་རྒྱུ་དེ་བོད་མིའི་གདོང་ལེན་བྱེད་དགོས་པའི་གནད་དོན་གལ་ཆེ་ཞིག་རེད་ཅེས་སོགས་ཀྱི་གསུང་བཤད་གནང་།

དེ་ནས་སྐུ་མགྲོན་གཙོ་བོ་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན། ཚོགས་འདུ་འདི་ལྟ་བུ་བསྐོང་ཚོགས་གནང་དགོས་དོན་ནི། ང་ཚོར་དམིགས་ཡུལ་འཕྲལ་ཕུགས་རྒྱང་གསུམ་དང་ཆེ་ཕྲ་ཆུང་གསུམ་ཡོད། ཆུང་ས་ལྟ་བུར་མཚོན་ན།  རྒྱ་གར་ནང་ཉམས་ཞིབ་གནང་མཁན་དང་། འབུམ་རམས་པ་གནང་མཁན་མཐོ་སློབ་ཁག་གང་དུ་ཡོད་ཀྱང་ང་ཚོས་ལོ་རེར་སྡིངས་ཆ་བསྐྲུན་ནས་འདིར་ཉིན་གྲངས་གསུམ་བཞིའི་རིང་ཚོགས་འདུ་ཚོགས་ནས་བསམ་ཚུལ་བརྗེ་ལེན་བྱུང་ཐུབ་པ་ཡིན་ན། སྤྲོ་སྣང་དང་སེམས་ཤུགས་སྐྱེ་རྒྱུ་མ་ཟད། ལྷག་པར་བསམ་ཚུལ་བརྗེ་རེས་བྱེད་པའི་སྐབས་སུ་ཡར་རྒྱས་འགྲོ་རྒྱུར་ཕན་གྱི་ཡོད། 

གཉིས་ནས་ཉམས་ཞིབ་པ་རྣམས་འཛོམས་ནས་རིམ་བཞིན་རྒྱ་གར་དང་དེ་ནས་རིམ་བཞིན་རྒྱལ་སྤྱིའི་སྡིངས་ཆ་ཐོག་ཕེབས་ཏེ་བོད་དང་བོད་དོན་དང་འབྲེལ་བའི་ཉམས་ཞིབ་གང་གནང་བ་ཡིན་ནའང་། རྒྱལ་སྤྱིའི་གནས་ཚད་དང་བསྡུར་ཐུབ་པའི་ཉམས་ཞིབ་པ་བྱུང་ན་བསམས་པའི་ཐོག་ནས་ཉམས་ཞིབ་པ་རྣམས་འདིར་ཕེབས་ཡོད། ཉམས་ཞིབ་གནང་བའི་བརྗོད་གཞིའི་ཐོག་བསམ་ཚུལ་བརྗེ་རེས་ཇི་ཙམ་གནང་ཐུབ་པ་ཡིན་ན། དེ་ལ་དཔགས་པའི་ཡར་རྒྱས་འགྲོ་གི་ཡོད། དེར་བརྟེན་འདི་ལྟ་བུའི་ཚོགས་འདུ་ཞིག་སྔ་ལོ་རྡ་སར་ཚོགས་པ་རེད། ད་རེས་སླར་ཡང་ཚོགས་པ་རེད། ལོ་རྗེས་མར་ཡང་བོད་ཀྱི་སྲིད་བྱུས་ཉམས་ཞིབ་ཁང་ནས་མཐུན་རྐྱེན་བསྐྲུན་ཏེ་ཚོགས་ཐུབ་ན། ཞེས་འབད་བརྩོན་ཞུ་གི་ཡོད། 

དེ་བཞིན་ཉེ་ཆར་ནོར་ཝེ་ཨོ་སོ་ལོར་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་ཆེན་ཚོགས་པ་རེད། དེ་སྔ་ང་ཡང་འགྲོ་མྱོང་ཡོད། བཙན་བྱོལ་ནས་བོད་མི་ཉུང་ཤས་ལས་མེད། རྒྱ་ནག་ནས་མི་ལྔ་བཅུ་དྲུག་ཅུ་ལྷག་ཡོང་གི་རེད། ཁོ་པ་ཚོས་ང་ཚོར་བོད་གཞུང་གི་སོ་ལྟ་རེད། ཅེས་ཟེར་གྱི་རེད། གང་ཡིན་བརྗོད་ན་ང་ཚོ་ཟུར་ཉན་ལ་ཡོང་མཁན་མ་གཏོགས་ཚོགས་འདུར་དངོས་སུ་ཕེབས་ཏེ་རྩོམ་འགྲེམས་སྤེལ་བྱས་ནས་བསམ་ཚུལ་བརྗེ་རེས་བྱེད་ཐུབ་མཁན་དཀོན་པོ་ཆགས་ཀྱི་ཡོད། དེ་ལྟར་མི་ཡོང་བའི་ཆེད་དུ་ལོ་གསུམ་ཙམ་གྱི་སྔོན་ལ་སོག་པོར་ཚོགས་འདུ་ཚོགས་པ་རེད། ཅེས་དང་ཡང་སྲིད་སྐྱོང་མཆོག་གིས་མུ་མཐུད་གསུང་དོན།

དེ་བཞིན་འབུམ་རམས་པ་སློབ་སྦྱོང་གནང་མཁན་ཚོ་རྒྱལ་སྤྱིའི་ཚོགས་འདུ་ཐོག་ཕེབས་དགོས་ཀྱི་ཡོད་པར་བརྟེན། ལམ་གྲོན་དགོས་ཀྱི་ཡོད། འབུམ་རམས་པ་སློབ་སྦྱོང་གནང་མཁན་ཚོ་རྒྱལ་སྤྱིའི་ཚོགས་འདུ་ཐོག་ཕེབས་ཐུབ་མཁན་ཡོད་ན། དེ་དག་གི་གནམ་གྲུའི་གླ་ང་ཚོས་འབུལ་གྱི་ཡིན། ག་ཚོད་ཕེབས་མཁན་ཡོད་ན་ཕེབས་རོགས། ཞེས་བཀའ་ཤག་ནང་ཆེད་བསྔགས་བཀའ་བསྡུར་བྱུང་། ངེས་པར་དུ་བོད་དོན་སྐོར་བཤད་དགོས་མེད། བོད་དོན་སྐོར་བཤད་རྒྱུ་ཡོད་ན་ཡག་ཤོས་རེད། བོད་དོན་སྐོར་བཤད་རྒྱུ་མེད་ནའང་རྒྱལ་སྤྱིའི་ཚོགས་འདུ་སྙན་གྲགས་ཆེ་བ་ཁག་གི་ནང་འབུམ་རམས་པ་བྱེད་མཁན་ཞིག་ཡིན་ན་ངེས་པར་དུ་ཕེབས་དགོས་ཀྱི་འདུག རྒྱལ་སྤྱིའི་སྡིངས་ཆ་ཐོག་ཕེབས་ནས་སོ་སོའི་གནས་ཚད་དེ་རྟོགས་རོགས། སོ་སོའི་གནས་ཚད་རྟོགས་པ་གཞིར་བཟུང་ཡར་རྒྱས་གཏང་རྒྱུའི་འབད་བརྩོན་གནང་རོགས། ཞེས་དང་།

གཞན་ཡང་དཔལ་ལྡན་སྲིད་སྐྱོང་མཆོག་གིས་དེང་སྐབས་རྒྱལ་ཁབ་མང་ཆེ་བའི་ནང་རྒྱལ་སྤྱིའི་ལྟ་གྲུབ་འཛིན་མཁན་ཇེ་ཉུང་དུ་འགྲོ་གི་ཡོད་པ་དང་། རྒྱལ་ཞེན་རིང་ལུགས་ཀྱི་ལྟ་བ་འཛིན་མཁན་ཕོན་ཆེན་རུ་འགྲོ་གི་ཡོད་པ། རྒྱ་ནག་ནང་དུའང་རྒྱལ་ཞེན་འཛིན་མཁན་མང་པོ་ཡོད་པར་བརྟེན། དེ་འདྲའི་གནས་སྟངས་འོག་བོད་ནང་དམིགས་བསལ་འགྱུར་བ་གང་འདྲ་འགྲོ་སྲིད་པའི་ཐོག་ཉམས་ཞིབ་གནང་རྒྱུ་གལ་ཆེན་པོ་ཡིན་པ་དང་། བོད་རིགས་ཉམས་ཞིབ་པ་ཚོས་རྒྱ་ནག་དང་རྒྱལ་སྤྱིིའི་གནས་བབ་ལ་གཞིགས་པའི་བོད་མིའི་སྒྲིག་འཛུགས་ཀྱི་ལངས་ཕྱོགས་དང་སྲིད་བྱུས་གང་འདྲ་འཛིན་ན་ལེགས་པའི་སྐོར་ཉམས་ཞིབ་གནང་ནས་བསམ་འཆར་སྙན་ཐོ་དེ་འདྲ་བཀའ་ཤག་ལ་ཕུལ་ཐུབ་ན་དགེ་ཚན་ཆེན་པོ་ཡོང་རྒྱུ་ཡིན་པ། རྒྱལ་སྤྱིའི་ཉམས་ཞིབ་བསྟི་གནས་ཁང་སོགས་ལའང་འབྲེལ་བ་བྱ་རྒྱུ་དེ་གནད་འགག་ཆེན་པོ་ཞིག་ཡིན་པ། བོད་པའི་ཉམས་ཞིབ་པ་ཚོ་མ་འོངས་པར་རྒྱལ་སྤྱིའི་སྡིངས་ཆའི་སྟེང་སླེབས་ཐུབ་པའི་རེ་བ་ཡོད་ཅེས་དང་དེའི་ཐད་བཀའ་ཤག་ནས་མཐུན་འགྱུར་གང་ཐུབ་གནང་རྒྱུ། རྒྱ་ནག་གཞུང་གིས་བོད་ཐོག་བཏོན་པའི་རྒྱབ་ཤ་དཀར་པོར་ལན་འདེབས་ཀྱང་གང་མགྱོགས་བཏོན་རྒྱུ་ཡིན་སྐོར་སོགས་ཀྱི་གསུང་བཤད་གནང་ཡོད་པ་བཅས།།