༢༠༡༦ ཟླ་ ༡༠ ཚེས་ ༡༢ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༡༠ ཚེས་ ༩ ནས་ ༡༣ བར་ཉིན་གྲངས་ལྔ་རིང་གྷོ་པལ་པུར་བོད་ཁྱིམ་དུ་ཤེས་རིག་ལས་ཁུངས་ཀྱི་གོ་སྒྲིག་འོག བོད་མིའི་སློབ་གྲྭ་ཁག་གི་གཞི་རིམ་འོག་མའི་དགེ་རྒན་རྣམས་ལ་བྱིས་པའི་ཀློག་རྩལ་ཁྲིད་ཐབས་ཀྱི་ཟབ་སྦྱོང་གནང་བཞིན་ཡོད་འདུག དེ་ཡང་ཐེངས་འདིའི་ཟབ་སྦྱོང་ནང་རྡ་སྟེང་བོད་ཁྱིམ་དང་། མ་སུ་རི་བོད་ཁྱིམ། སཾ་བྷོ་ཊ་བོད་སློབ་ཚོགས་པའི་ཁྱབ་ཁྱོངས་སློབ་གྲྭ་བཅས་ནས་ཁྱོན་དགེ་རྒན་གྲངས་བཅུ་དགུས་མཉམ་ཞུགས་གནང་ཡོད།
ཟབ་སྦྱོང་གི་དགོས་དམིགས་གཙོ་བོ་ནི། བོད་མིའི་སློབ་གྲྭ་ཁག་གི་གཞི་རིམ་འོག་མའི་དགེ་རྒན་ཚོར་བྱིས་པའི་ཀློག་རྩལ་ཡར་རྒྱས་གཏོང་ཕྱོགས་ཐད་རྒྱུས་མངའ་ལྡན་པ་ཞིག་ཡོང་རྒྱུ་དང་། བྱིས་པ་ཆུང་ཆུང་ཚོར་ཡི་གེ་བཀླག་རྒྱུའི་གོམས་གཤིས་རྒྱུད་ལ་འཇགས་ཐབས་དང་བྱིས་པའི་ཀློག་རྩལ་གོང་འཕེལ་གཏོང་ཐབས་ཆེད་ཡིན་འདུག
ཐེངས་འདིའི་ཟབ་སྦྱོང་ནང་སློབ་ཚན་འདྲ་མིན་ཐོག་སློབ་ཁྲིད་གནང་མཁན་གྱི་དགེ་རྒན་རྣམ་པར་སློབ་ཕྲུག་ཚོར་མི་ཚེ་ཧྲིལ་པོར་ཡི་གེ་བཀླག་རྒྱུའི་ལས་ལ་གོམས་འདྲིས་ཡོང་ཐབས་ཇི་ལྟར་བྱ་དགོས་པའི་སྐོར་ཟབ་ཁྲིད་གནང་ཡོད་པ་དང་། སྐབས་དེར་དགེ་རྒན་རྣམས་ནས་དོ་སྣང་ཆེན་པོས་མཉམ་ཞུགས་གནང་བ་མ་ཟད། ཟབ་སྦྱོང་ཐོག་སྦྱངས་པའི་ཐབས་ལམ་དེ་དག་འབྲེལ་ཡོད་སློབ་གྲྭ་ཁག་གི་སློབ་ཕྲུག་ཚོར་ལག་བསྟར་གནང་རྒྱུའི་འདུན་པ་ཤུགས་ཆེ་ཡོད་པ་མངོན་གསལ་ཐུབ་ཡོད།
ཟབ་སྦྱོང་གི་ཆ་ཤས་ལྟར་ཟབ་ཁྲིད་པས་བོད་པའི་སློབ་གྲྭ་ཁག་གི་ནང་ཆེད་ཕེབས་ཀྱིས་ཨིན་ཇི་དང་བོད་དགེ་རྣམས་ཀྱི་སློབ་ཁྲིད་བྱེད་སྐབས་ བྱིས་པའི་ཀློག་རྩལ་ཁྲིད་ཐབས་ཀྱི་ཟབ་སྦྱོང་སྤྲད་པ་དེས་ཕན་ཐོགས་ཇི་ཙམ་བྱུང་མིན་ཐད་རྟོག་ཞིབ་གནང་རྒྱུ་ཡིན་འདུག
ཐེངས་འདིའི་ཟབ་སྦྱོང་ནང་ཟབ་ཁྲིད་གནང་མཁན་ལྡི་ལི་གཙུག་ལག་སློབ་གཉེར་ཁང་གི་ལྕམ་སྐུ་ལ་ཏི་ཀ་གུཔྟཱ་ Dr. Latika Gupta ལགས་ཡིན་འདུག་པ་དང་། ཟབ་སྦྱོང་འདི་བཞིན་ཨ་རི་བོད་ཀྱི་ཐེབས་རྩ་བརྒྱུད་ཨ་རི་ USAID རོགས་ཚོགས་ནས་མཐུན་འགྱུར་གནང་བ་ཞིག་ཡིན་འདུག་པ་བཅས། །
.
