༢༠༡༦ ཟླ་ ༩ ཚེས་ ༢༩ རེས་གཟའ་ཕུར་བུ།

༄༅། །ཕི་ལི་པིན་ Philippines གྱི་གྲོས་ཚོགས་གོང་མའི་འཐུས་མི་ལྕམ་སྐུ་མི་རི་ཡམ་ཌི་ཕེན་སོར་སན་ཏི་ཡ་གོ་ Senator Miriam Defensor-Santiago མཆོག་འདས་གྲོངས་སུ་གྱུར་བར་སྲིད་སྐྱོང་མཆོག་གིས་མྱ་ངན་གུས་འདུད་དང་སྦྲགས། ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེ་ཞུས་འདུག  དེ་ཡང་གྲོས་ཚོགས་འཐུས་མི་ཁོང་ཕྱི་ཚེས་ ༢༩ ཉིན་གློ་བའི་འབྲས་ནད་ཀྱི་རྐྱེན་པས་འདས་གྲོངས་སུ་གྱུར་བ་དང་། དམ་པ་ཁོང་ནི་དགུང་གྲངས་ ༧༡  ཡིན་འདུག  དེ་ཡང་སྲིད་སྐྱོང་མཆོག་གི་ཐུགས་གསོའི་འཕྲིན་ཡིག་ནང་འཁོད་དོན།   ངས་བོད་མིའི་སྒྲིག་འཛུགས་ཀྱི་ཚབ་ཞུས་ནས་གྲོས་ཚོགས་གོང་མའི་འཐུས་མི་ལྕམ་སྐུ་མི་རི་ཡམ་ཌི་ཕེན་སོར་སན་ཏི་ཡ་གོ་མཆོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་སྙིང་ཐག་པ་ནས་བློ་ཕམ་བྱུང་ཞུ་རྒྱུ་དང་། དམ་པ་ཁོང་ནི་༸གོང་ས་༸སྐྱབས་མགོན་ཆེན་པོ་མཆོག་དང་ཐུགས་འདྲིས་ཆེ་ཞིང་བོད་མིའི་ཞི་བའི་འཐབ་རྩོད་ལ་ཡུན་རིང་ནས་རྒྱབ་སྐྱོར་གནང་མཁན་ཞིག་ཡིན་པ་མ་ཟད།  ཕི་ལི་པེན་ཡུལ་དུ་བོད་དོན་རྒྱབ་སྐྱོར་ཚོགས་པ་ཐོག་མར་གསར་འཛུགས་གནང་མཁན་ཞིག་ཀྱང་ཡིན།

དེར་བརྟེན་དམ་པ་ཁོང་གིས་སྐུ་འཚོ་བཞུགས་རིང་རྒྱལ་ནང་དང་རྒྱལ་སྤྱིའི་སྡིངས་ཆ་འདྲ་མིན་ཐོག ཚོར་ཤུགས་ཆེན་པོས་བོད་དོན་རྒྱབ་སྐྱོར་གནང་བར་ང་ཚོ་བོད་མི་རྣམས་ཀྱིས་བཀའ་དྲིན་སྙིང་བཅངས་ཞུ་རྒྱུ་མ་ཟད། ད་ལྟ་ཤུལ་ལུས་ནང་མི་རྣམས་དཀའ་ངལ་ཧ་ཅང་ཆེ་བའི་དུས་སྐབས་འདིར་ང་ཚོ་བོད་མི་ཚོས་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་འཁོད།

དམ་པ་ཁོང་སེན་ལུག་སྨན་ཁང་ St. Luke’s Medical Center དུ་མཚན་མོ་གཉིད་ནང་འདས་གྲོངས་སུ་གྱུར་བ་དང་། ཁོང་ལ་སྐུ་ཟླ་དང་ཕྲུ་གུ་བུ་གཅིག་ཡོད་འདུག སྤྱིར་དམ་པ་ཁོང་གིས་ཕྱི་ལོ་ ༡༩༩༥ ནས་ ༢༠༠༡ བར་དང་། དེ་རྗེས་ཕྱི་ལོ་ ༢༠༠༤ ནས་ ༢༠༡༦ བར་ཕི་ལི་པེན་ཡུལ་གྱི་གྲོས་ཚོགས་གོང་མའི་འཐུས་མི་གནང་ཡོད་པ་མ་ཟད། ཕྱི་ལོ་ ༢༠༡༦ ནང་ཡུལ་དེའི་སྲིད་འཛིན་གྱི་འོས་མིར་བཞེངས་མྱོང་ཡོད།།