༢༠༡༦ ཟླ་ ༩ ཚེས་ ༢༠ རེས་གཟའ་མིག་དམར།

༄༅། །བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་ཕྱི་ལོ་ ༢༠༡༦ ཟླ་ ༩ ཚེས་ ༢༠ ནས ༢༩ བར་ཉིན་གྲངས་དགུའི་རིང་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་གྲོས་ཚོགས་ཀྱི་ཚོགས་ཁང་ཆེན་མོའི་ནང་དབུ་འཛུགས་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག བོད་མིའི་སྒྲིག་འཛུགས་ཀྱི་ཆབ་སྲིད་དབུ་ཁྲིད་སྲིད་སྐྱོང་བློ་བཟང་སེངྒེ་མཆོག་གིས་དབུས་བཀའ་བློན་རྣམ་པ། ཆོལ་གསུམ་ཆོས་ལུགས་དང་བཅས་པའི་བོད་མི་མང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་རྣམ་པ། ཟུར་ཉན་པ་རྣམ་པ། གསར་འགོད་པ་བཅས་ཚང་འཛོམས་ཐོག་གྲོས་ཚོགས་ཚོགས་དུས་གཉིས་པ་དབུ་འཛུགས་ཀྱིས་ཐོག་མར་རྟེན་འབྲེལ་གསོལ་ཇ་དང་། འབྲས་སིལ་ཕུལ་གྲུབ་རྗེས་ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་ གླུ་བཏང་སྟེ། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་དབུ་འཛུགས་ཀྱི་གསུང་བཤད་གནང་དོན། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོ་གྲོལ་བའི་རྗེས་སུ་བཀུར་འོས་སྤྱི་ཐུས་རྣམ་པ་བོད་མི་འདུས་སྡོད་ཀྱི་ས་གནས་ཁག་ལ་འཚམས་གཟིགས་བཅར་རྒྱུའི་ཐོག་ཚོགས་གཙོ་གཉིས་ཀྱིས་ལམ་སྟོན་ནང་འཚམས་གཟིགས་སུ་བཅར་བའི་སྐབས་མི་མང་ལ་གོ་རྟོགས་སྤེལ་དགོས་པ་གཙོ་བོ་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་ཁག་དང་། བོད་ནང་གི་ཛ་དྲག་གནས་སྟངས། བོད་དང་འབྲེལ་བའི་རྒྱལ་སྤྱིའི་ཆབ་སྲིད་ཀྱི་གནས་བབ། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ལས་རིམ་ཁག་ངོ་སྤྲོད་གནང་རྒྱུ་དང་། ཞོར་དུ་བོད་མི་འདུས་སྡོད་ཀྱི་ས་གནས་ཁག་ཏུ་གནས་སྟངས་གཟིགས་ཞིབ་གནང་རྒྱུ་དང་། དེ་བཞིན་ཤེས་ཡོན་དང་འཕྲོད་བསྟེན་ཐོག་ཡིན་ནའང་འདྲ། དེ་མིན་བདེ་སྡུག་གནས་སྟངས་གང་ཡིན་ནའང་གཟིགས་རྟོགས་གནང་དགོས་པའི་ལམ་སྟོན་ཞུས་པ་གཞི་བཟུང་འདས་པའི་ཟླ་བ་ཁ་ཤས་ནང་བཀུར་འོས་སྤྱི་འཐུས་རྣམ་པས་འཚམས་གཟིགས་ཡོངས་སུ་རྫོགས་པ་གྲུབ་ཡོད།

དེར་བརྟེན་འཚམས་གཟིགས་ཀྱི་ལས་རིམ་ནང་སྤྱི་འཐུས་རེ་གཉིས་ཙམ་སྒེར་གྱི་གནད་དོན་ཐོག་བཅར་ཐུབ་མེད་པ་མ་གཏོགས་དེ་མིན་སྤྱི་འཐུས་མང་ཆེ་བ་བཅར་ནས་ལྷག་བསམ་རྣམ་དག་ཐོག་ནས་ཕྱག་ལས་འབུར་དུ་ཐོན་པ་ཡག་པོ་གནང་འདུག་པར་བརྟེན་དེ་རིང་གི་གོ་སྐབས་འདི་བརྒྱུད་ཚོགས་གཙོ་གཉིས་ཀྱི་ངོས་ནས་བཀུར་འོས་སྤྱི་འཐུས་རྣམ་པར་ཐུགས་རྗེ་ཆེ་དང་བསྔགས་བརྗོད་ཞུ་རྒྱུ་ཡིན།

དེ་ནས་བོད་ནང་གི་ཛ་དྲག་གནས་སྟངས་ཐོག་རེད། ང་ཚོ་ཚང་མས་ཤེས་བཞིན་པ་རེད། རྒྱ་ནག་གིས་མཁྲེགས་འཛིན་ཅན་གྱི་སྲིད་བྱུས་འོག་འདས་པའི་ལོ་ ༥༧ ལྷག་ཙམ་རིང་བོད་ནང་བཙན་བཟུང་དང་། བཙན་གནོན། དམ་བསྒྲགས་འོག་གནས་བཞིན་པ་གསལ་པོ་རེད། འོན་ཀྱང་དུས་ཚོད་རེ་རེའི་ནང་ཛ་དྲག་ཆེ་རུང་དང་ཉེན་ཁ་ཆེ་རུ་འགྲོ་བཞིན་པ་ནི་གསལ་པོ་རེད་འདུག དཔེར་ན། མེ་འཁོར་ལྕགས་ལམ་ལྟ་བུར་མཚོན་ན། དེ་སྔོན་གོར་མོ་ནས་ལྷ་ས་བར་དང་། ལྷ་ས་ནས་གཞིས་ཀ་རྩེ་བར་རྒྱ་སྐྱེད་བཏང་ཡོད། ད་ཆ་མངའ་སྡེ་བཅུ་གསུམ་གྱི་ལས་འཆར་ནང་རྒྱ་ནག་གི་གྲོང་ཁྱེར་ཁྲན་ཏུ་ནས་འགོ་འཛུགས་ཏེ་དཀར་མཛེས་སོགས་དང་། དེ་བཞིན་ཆབ་མདོ་དང་ཉིང་ཁྲི་ས་ཁུལ་བརྒྱུད་ལྷ་སར་གཏུག་རྒྱུ་དང་། གཞིས་ཀ་རྩེ་ནས་ས་མཚམས་སྐྱིད་གྲོང་བར། དེ་བཞིན་གྲོ་མོ་བར་ལྕགས་ལམ་གསར་འཛུགས་བྱ་རྒྱུའི་ལས་འཆར་སྒྲིག་བཞིན་པ། དེ་མིན་ཡུ་ནན་དང་ཞིང་ཅིང་ནས་བོད་ནང་ཐད་ཀར་ལྕགས་ལམ་འཛུགས་རྒྱུའི་ཞིབ་འཇུག་འགྲོ་བཞིན་པའི་གནས་སྟངས་དེ་འདྲ་ཆགས་ཀྱི་འདུག

དེ་ཚོའི་ཐོག་ནས་ལྟ་དུས་རྒྱ་ནག་གིས་ལྕགས་ལམ་འཛུགས་སྐྲུན་བྱ་རྒྱུ་དེ་ཕྱོགས་གཅིག་ནས་བོད་དེ་ཡར་རྒྱས་གཏོང་དགོས་ཡོད། ཅེས་བསྒྲགས་གཏམ་བཤད་ཀྱི་ཡོད། བོད་ལ་ཉེན་ཁ་ཇི་ཙམ་འཕྲད་ཀྱི་ཡོད་མེད་ཉེན་ཁའི་གནས་སྟངས་དེ་རྒྱ་ནག་གི་ཞིབ་འཇུག་བྱེད་ཀྱི་མེད་པར་བརྟེན་ད་ལྟའི་ཆར་གྲོང་ཁྱེར་གྱི་མེ་འཁོར་ལྕགས་ལམ་འབབ་ཚུགས་ཡོད་སའི་གྲོང་རྡལ་དེ་ཚོ་གྲོང་ཁྱེར་གྱི་རྣམ་པར་འགྱུར་རྒྱུའི་གནས་སྟངས་རང་བཞིན་གྱི་ཆགས་ཀྱི་འདུག དེ་འདྲའི་ཐོག་ནས་བོད་དེ་གྲངས་ཉུང་མི་རིགས་ཀྱི་གནས་སྟངས་དང་། ས་ཁྱོན་ཆེན་པོ་ཡིན་པར་བརྟེན། མི་འབོར་སྤོ་བཞུད་བྱ་རྒྱུར་ལས་སླ་བ་ཞིག་དང་། དེ་བཞིན་བྱེད་བདེ་བའི་གནས་སྟངས་རང་བཞིན་གྱི་ཆགས་ཡོང་དུས་བོད་ཀྱི་ཐུན་མོང་མ་ཡིན་པའི་རིག་གཞུང་དང་། སྐད་ཡིག ཁོར་ཡུག་གི་གནས་སྟངས་བཅས་ཧ་ཅང་ཛ་དྲག་ངང་ལྷུང་ཡོད།

བོད་ནང་གི་བོད་མི་ཚོས་རྒྱ་ནག་གཞུང་གིས་འདས་པའི་ལོ་ ༥༧ ནང་སྲིད་བྱུས་བཏིངས་པ་དེ་ཚོར་འདོད་པ་མེད་པ་གསལ་པོ་རེད། ཕྱི་ལོ་ ༡༩༨༧ ནས་འགོ་བརྩམས་ཏེ་ཕྱི་ལོ་ ༢༠༠༨ ནས་བཟུང་བོད་ཆོལ་ཁ་གསུམ་གྱི་ནང་ཞི་བའི་ངོ་རྒོལ་བྱུང་བ་མ་ཟད། ལྷག་པར་ཕྱི་ལོ་ ༢༠༠༩ ནས་འདི་ལོ་བར་བོད་མི་ ༡༤༤ རང་ལུས་མེར་སྲེག་གནང་བ་དེའི་ཐོག་ནས་ཁོང་རྣམ་པའི་མངོན་འདོད་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནང་གདན་འདྲེན་ཞུ་དགོས་པ་དང་། བོད་མིར་རང་དབང་དགོས་སྐོར་བཅས་ཡིན། དེ་ནི་འདས་པོའི་ཞལ་ཆེམས་བཞག་སྟེ་གསལ་འདོན་གནང་ཡོད།

འོན་ཀྱང་རྒྱ་ནག་གཞུང་གིས་དེ་ལས་ལྡོག་སྟེ་དྲིལ་བསྒྲགས་འདྲ་མིན་བྱས་པ་དང་། དེ་བཞིན་རང་ལུས་མེར་སྲེག་གནང་མཁན་ཚོ་དང་ཁོང་ཚོའི་ཁྱིམ་ཚང་གི་ཤུལ་ལུས་ནང་མི་སྤུན་མཆེད་རྣམས་ལ་དཀའ་ངལ་དང་དམ་བསྒྲགས་ཚད་མེད་བྱས་དང་བྱེད་མུས་ཡིན།  འོན་ཀྱང་རྒྱལ་སྤྱིའི་སྤྱི་ཚོགས་ཐོག་ནས་བོད་ནང་གི་བོད་མིའི་མངོན་འདོད་གང་ཡིན་པ་དེ་གསལ་སྟོན་བྱེད་ཐུབ་ཀྱི་ཡོད། དེ་ནི་ང་ཚོའི་རྒྱལ་ཁ་ཞིག་ལ་རྩི་ཆོག

འོན་ཀྱང་ད་ལྟ་རྒྱ་ནག་གཞུང་གིས་བོད་ཐོག་འཛིན་བཞིན་པའི་སྲིད་བྱུས་དང་། བོད་ཀྱི་ཐོག་ལ་བཞུགས་མོལ་ཚོགས་འདུ་རིམ་པ་ཚོགས་ཡོད། རྒྱབ་ཤ་དཀར་པོ་རིམ་པར་བཏོན་ཡོད། དེ་ཚོའི་གནད་དོན་ཐོག་ལ་ལྟ་སྐབས་བོད་ཀྱི་གནད་དོན་ཐོག་ལ་འགྱུར་བ་གཏོང་རྒྱུ་དང་། བཟང་ཕྱོགས་ཀྱི་འགྱུར་བ་འགྲོ་རྒྱུའི་རྣམ་པ་གང་ཡང་མཐོང་གི་མེད། འོན་ཀྱང་རྒྱ་ནག་གི་འགོ་ཁྲིད་ནང་བསམ་ཚུལ་མི་མཐུན་པ་ཡོད་པ་གསལ་པོ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་འབྲེལ་མོལ་བསྐྱར་མཐུད་ཡོང་རྒྱུའི་དགོངས་པ་བཞེས་དགོས་རྒྱུ་གལ་ཆེན་པོ་རེད།  ཅེས་དེ་རིང་གི་གྲོས་ཚོགས་ཀྱི་བརྒྱུད་ལམ་འདི་བརྒྱུད་ནས་འབོད་སྐུལ་ཞུ་འདོད་བྱུང་།

བཙན་བྱོལ་སྒྲིག་འཛུགས་ཀྱི་ངོས་ནས་བཅའ་ཁྲིམས་ཀྱི་འགན་དབང་བསྐུར་བཞག་པ་གཙོ་བོ་དེ་བོད་དོན་བདེན་མཐའ་གསལ་ཐབས་དང་བཙན་བྱོལ་སྤྱི་ཚོགས་བདེ་ཐབས། དེ་བཞིན་བོད་ནང་གི་ཁོར་ཡུག་གནས་སྟངས་ཐོག་ལ་དོ་སྣང་དང་ལས་འཆར་བསྒྲུབ་དགོས་རྒྱུའི་འགན་དབང་བསྐུར་ཡོད།  དེར་བརྟེན་འདས་པའི་ཟླ་བའི་ནང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་རྒྱལ་སར་ཆིབས་སྒྱུར་བསྐྱངས་པ་དང་། ཕོ་བྲང་དཀར་པོར་ཆིབས་སྒྱུར་གྱིས་ཨ་རིའི་སྲིད་འཛིན་མཆོག་དང་ལྷན་མཇལ་འཕྲད་མཛད་པ། དེ་བཞིན་ཨ་རིའི་གྲོས་ཚོགས་ཀྱི་ཚོགས་གཙོ་མཆོག་དང་མཇལ་འཕྲད་མཛད་པ།

དེང་སྐབས་༸གོང་ས་མཆོག་ཡུ་རོབ་ཁུལ་དུ་མཛད་འཕྲིན་བསྐྱངས་བཞིན་ཡོད་སྟབས། ཡུ་རོབ་གྲོས་ཚོགས་ཀྱི་ཚོགས་གཙོས་མཚོན་གནད་ཡོད་མི་སྣ་མང་པོ་ཞིག་དང་མཇལ་འཕྲད་མཛད་པ་སོགས་མཛད་འཕྲིན་ཧ་ཅང་རྒྱ་ཆེ་བསྐྱངས་དང་སྐྱོང་བཞིན་ཡོད་པ་ནི། ང་ཚོ་བོད་མིའི་བསོད་ནམས་རེད།   དེ་བཞིན་འཛིན་སྐྱོང་བཀའ་ཤག་བརྒྱུད་ཕྱི་དྲིལ་ལས་ཁུངས་ཀྱིས་གོ་སྒྲིག་འོག་ཉེ་ཆར་སྦར་སིལ་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་ཐེངས་བདུན་པ་ཚོགས་ཡོད།  སྐབས་དེར་ཚོགས་གཙོ་བཅར་བ་ཡིན། རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་བའི་ཚོགས་ཆེན་ནང་ལ་ཚོགས་མི་ཉིས་རྒྱ་ལྔ་བཅུ་དང་། དེ་བཞིན་རྒྱལ་ཁབ་ཁག་མི་འདྲ་བ་ལྔ་བཅུ་ནས་ཕེབས་ཏེ་དོ་སྣང་ཆེན་པོའི་ཐོག་ནས་བོད་ཀྱི་གནད་དོན་ཐོག་བགྲོ་གླེང་དང་གོ་བསྡུར་གནང་ཡོད། ཉིན་གྲངས་གསུམ་གྱི་རིང་ལ་དོན་དང་ལྡན་པ་ཞིག་བྱུང་སོང་བསམ་པའི་ཚོར་སྣང་བྱུང་སོང་།  ཞེས་སོགས་ཀྱི་གསུང་བཤད་གནང་རྗེས་ཚོགས་གཙོའི་ལས་ཚབ་དང་། ལས་རིམ་ཚོགས་ཆུང་གི་ཚོགས་མི་བསྐོ་གཞག་གནང་། དེ་རྗེས་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་རྣམ་གཉིས་ཀྱིས་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་འཆར་རིམ་བཞིན་སྒྲོགས་སྦྱང་གནང་གྲུབ་མཚམས་ཚང་མ་སྐུ་བཞེངས་ཐོག་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་ཡོད་པ་བཅས། །