༢༠༡༦ ཟླ་ ༩ ཚེས་ ༢༠ རེས་གཟའ་མིག་དམར།
༄༅། །འདི་གར་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་ཀྱི་ཐེབས་རྩའི་རྒྱུན་ལས་འགན་འཛིན་བཀའ་ཟུར་བློ་བཟང་སྙན་གྲགས་ལགས་ཀྱིས་གོ་སྒྲིག་འོག་བོད་མིའི་ཚོང་ལས་བདེ་ཚོགས་ཀྱི་ཚོགས་མི་བཅོ་ལྔ་ཨ་རིའི་རྒྱལ་ས་ཝ་ཤིང་ཀྲོན་དུ་རྟེན་གཞི་བྱས་པའི་བྱང་ཨ་རིའི་སྐུ་ཚབ་དོན་གཅོད་ཁང་དུ་ཕེབས་ཤིང་། སྐབས་དེར་སྐུ་ཚབ་དོན་གཅོད་སྤེན་པ་ཚེ་རིང་ལགས་ནས་བྱང་ཨ་རིའི་སྐུ་ཚབ་དོན་གཅོད་ཁང་ཐོག་མར་ཚུགས་སྟངས་དང་། སྐུ་ཚབ་དོན་གཅོད་ཁང་གི་ལས་འགན། ལས་ཀའི་ངོ་བོ། བྱང་ཨ་རིའི་བོད་མིའི་གནས་སྟངས། སྐུ་ཚབ་དོན་གཅོད་ཁང་གི་མ་འོངས་ལས་དོན་བྱེད་ཕྱོགས་བཅས་ཕྱོགས་ཡོངས་ནས་ངོ་སྤྲོད་སྙིང་བསྡུས་གནང་བ་མ་ཟད། བཀའ་ཟུར་བློ་བཟང་སྙན་གྲགས་ལགས་ནས་བོད་མིའི་ཚོང་ལས་བདེ་ཚོགས་ཀྱི་གལ་ཆེའི་རང་བཞིན་དང་། ཚོང་ལས་བདེ་ཚོགས་ལ་གོ་སྐབས་ཇི་ཡོད་སྐོར་ངོ་སྤྲོད་གནང་བ་དང་སྦྲགས། འབྱུང་འགྱུར་ཨ་རིའི་སྐུ་ཚབ་དོན་ཁང་ནས་བོད་མིའི་ཚོང་ལས་བདེ་ཚོགས་ལ་གང་ཅིའི་རོགས་རམ་གནང་སྐྱོང་ཡོང་བའི་རེ་སྐུལ་ཡང་གནང་འདུག
དེ་ཡང་བོད་མིའི་ཚོང་ལས་བདེ་ཚོགས་ནི་ ༢༠༠༥ ལོར་གསར་འཛུགས་གནང་ཞིང་། ཚོང་ལས་བདེ་ཚོགས་ཐེངས་འདིར་ཨ་རིར་ཕེབས་དོན་གཙོ་བོ་ནི་ཨ་མེ་རི་ཀའི་ཚོང་འབྲེལ་སྡེ་ཚན་དང་འབྲེལ་བ་མཐུད་ཐབས་ཀྱིས་བོད་མིའི་ཚོང་ལས་བདེ་ཚོགས་ཀྱི་ནུས་པ་གོང་མཐོར་གཏོང་ཐབས་ཆེད་ཡིན་འདུག བོད་མིའི་ཚོང་ལས་སྡེ་ཚོགས་ཝ་ཤིང་ཀྲོན་དུ་བཞུགས་རིང་ཨ་རིའི་ཕྱི་སྲིད་ལས་ཁུངས་ཀྱི་བོད་དོན་དམིགས་བསལ་འབྲེལ་མཐུད་ལས་ཁུངས་ཀྱི་འབྲེལ་ཡོད་ལས་བྱེད་དང་མཇལ་འཕྲད་གནང་ཡོད་པ་དང་། དེ་བཞིན་ཕོ་བྲང་དཀར་པོ་དང་། འཛམ་གླིང་དངུལ་ཁང་ལ་ཡང་གཟིགས་སྐོར་གནང་ཡོད། རྒྱལ་སྤྱིའི་བོད་དོན་ལས་འགུལ་ཁང་ནས་བོད་མིའི་བདེ་ཚོགས་ཀྱི་ཚོགས་མི་ཡོངས་ལ་སྣེ་ལེན་དང་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གི་ལས་ཀའི་ངོ་བོ་དང་། རྒྱུན་ལྡན་གྱི་ལས་འགན་གཙོ་བོ་ག་རེ་ཡིན་པ་ངོ་སྤྲོད་གནང་།
