༢༠༡༦ ཟླ་ ༩ ཚེས་ ༣ རེས་གཟའ་སྤེན་པ།
༄༅། །ཕྱི་ལོ་ ༢༠༡༦ ཟླ་ ༨ ཚེས་ ༢༨ ནས་ ༣༠ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་མཐུན་འགྱུར་གོ་སྒྲིག་འོག རྒྱ་གར་མ་ཧཱ་རཱཤཀྲ་ Maharashtra མངའ་སྡེའི་གྲོང་ཁྱེར་འཇམ་ཁེ་དིར་ Jamkhed བོད་མིའི་གཞིས་ཆགས་ཁག་གི་ནང་འཕྲོད་བསྟེན་གོ་རྟོགས་སྤེལ་ཐབས་ཀྱི་ཟབ་སྦྱོང་ཐེངས་གཉིས་པའི་ཐོག འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་གཙོས་འཕྲོད་བསྟེན་ལས་ཁུངས་ཀྱི་དྲུང་ཆེ་དང་ཟུང་དྲུང་། བོད་མིའི་གཞིས་ཆགས་ནང་ཡོད་པའི་སྨན་ཁང་ཁག་བདུན་གྱི་འཕྲོད་བསྟེན་འབྲེལ་མཐུད་པ་དང་འཛིན་སྐྱོང་དྲུང་ཆེ་བཅས་མཉམ་ཞུགས་གནང་འདུག
དེ་ཡང་ཟབ་སྦྱོང་ཐོག་བོད་མིའི་གཞིས་ཆགས་ཁག་གི་ས་གནས་མང་ཚོགས་རྣམས་ལ་འཕྲོད་བསྟེན་གོ་རྟོགས་ཀྱི་ལས་གཞི་ཇི་ལྟར་བརྙབ་ཐུབ་མིན་ཐད་ལམ་སྟོན་དང་། དུད་ཚང་སོ་སོའི་ནང་གི་ནང་མིའི་གྲངས་ཐོ་དང་ནང་མིའི་གནས་སྟངས་རྒྱུས་ལོན་བྱེད་ཕྱོགས། དེ་བཞིན་གཞིས་ཆགས་ཁག་ནང་མང་ཚོགས་ཀྱི་འཕྲོད་བསྟེན་གནས་སྟངས་དང་སྟངས་འཛིན་གནང་ཕྱོགས་སོགས་ངོ་སྤྲོད་གནང་ཡོད་པ་མ་ཟད། གྲོང་གསེབ་ཀྱི་འཕྲོད་བསྟེན་ལས་གཞི་ཁག་ལག་བསྟར་གནང་ཕྱོགས་དང་མང་ཚོགས་ཀྱི་བཟའ་འཐུང་གི་སྤྱོད་ལམ་སོགས་ཀྱི་ཐོག་རྒྱུས་ལོན་ཡོང་སླད་གྲོང་གསེབ་ཁག་ཏུ་དངོས་སུ་འཁྲིད་འདུག
སྤྱིར་འཇམ་ཁེ་དེ་ས་ཁུལ་དུ་འཕྲོད་བསྟེན་ཟབ་སྦྱོང་བསྟི་གནས་ཁང་དེས་ད་བར་གྲོང་གསེབ་ས་ཁུལ་ཁག་དང་། ལྷག་པར་ཧ་ཅང་གནས་སྟངས་ཞན་པའི་གྲོང་གསེབ་ཁུག་སྐྱོག་ཁག་གི་མང་ཚོགས་རྣམས་ལ་འཕྲོད་བསྟེན་གྱི་སློབ་གསོ་ཇི་ལྟར་སྤེལ་དགོས་པའི་ཟབ་སྦྱོང་གནང་ཕྱོགས་དེར་རྒྱལ་ནང་ཙམ་མ་ཟད། རྒྱལ་སྤྱིས་བསྔགས་བརྗོད་ཤུགས་ཆེ་ཐོབ་མྱོང་ཡོད་པ་མ་ཟད། གཟེངས་རྟགས་སོགས་མང་པོ་ཐོབ་མྱོང་ཡོད་འདུག ཟབ་སྦྱོང་འདི་བཞིན་ཨ་རིའི་ USAID རོགས་ཚོསག་ཀྱིས་མཐུན་འགྱུར་གནང་བ་ཞིག་ཡིན་འདུག་པ་བཅས།།
བོད་སྒྱུར།
