༢༠༡༦ ཟླ་ ༩ ཚེས་ ༡༦ རེས་གཟའ་པ་སངས།

༄༅། །འདི་གར་ཆོས་རིག་ལས་ཁུངས་ནས་བཏང་འབྱོར་ནང་འཁོད་དོན། ཕྱི་ལོ་ ༢༠༡༦ ཟླ་ ༩ ཚེས་ ༡༦ ཉིན་དཔལ་དུས་ཀྱི་འཁོར་ལོའི་དབང་ཆེན་ཐེངས་སོ་བཞི་པའི་གོ་སྒྲིག་ཚོགས་ཆུང་ནས་གཞུང་འབྲེལ་དྲྭ་རྒྱ་ www.kalachakra2017.net དང་། www.kalachakra2017.org སྒོ་འབྱེད་གནང་ཡོད། དྲ་རྒྱ་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༡༧ ཟླ་ ༡ ཚེས་ ༣ ནས་ ༡༤ བར་འཕགས་ཡུལ་གནས་མཆོག་རྡོ་རྗེ་གདན་དུ་བཀའ་དྲིན་ཆེ་རྒྱུའི་དཔལ་དུས་ཀྱི་འཁོར་ལོའི་དབང་ཆེན་དང་འབྲེལ་བས་མཚོན། ཚོགས་ཆུང་ནས་གྲ་སྒྲིག་ཞུས་པའི་མི་དམངས་ཀྱི་དབུ་གུར་དང་། སྨན་བཅོས། གཙང་སྦྲ་འཕྲོད་བསྟེན་སྐོར་གྱི་གནས་ཚུལ་ཡོད་པ་མ་ཟད། ཕྱི་རྒྱལ་བ་དང་། དགེ་འདུན་པ། ཧི་མ་ལ་ཡའི་རི་རྒྱུད་པའི་ཆོས་ཞུ་བ་རྣམས་ཀྱིས་དྲ་རྒྱ་དེ་བརྒྱུད་ནས་ཐོ་འགོད་དེབ་སྐྱེལ་ཡང་གནང་ཆོག་པ་ཡིན། །