༢༠༡༦ ཟླ་ ༩ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༩ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྦེལ་ཇམ་གྱི་རྒྱལ་ས་སྦར་སེལ་གྱི་གནམ་ཐང་དུ་༸ཞབས་སོར་བདེ་བར་འཁོད་སྐབས་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། དགའ་ལྡན་ཕོ་བྲང་གི་དྲུང་ཆེ་ཆོས་སྐྱབས་པ་ཚེ་བརྟན་བསམ་གྲུབ་ལགས། སེམས་དང་སྲོག་གི་ལྷན་ཚོགས་གོ་སྒྲིག་གནང་མཁན་གྱི་གཙོ་འཛིན་རྣམ་པས་ཕེབས་བསུའི་སྣེ་ལེན་ཞུས་ཡོད་པ་དང་། དེ་རྗེས་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས་བོད་མི་ ༣༥༠ བརྒལ་བས་ལག་ཏུ་དཀར་གཙང་མཇལ་དར་དང་། ས་གནས་བོད་རིགས་ན་གཞོན་ཕོ་མོ་གཉིས་ཀྱིས་ཕྱེ་མར་ཆང་ཕུད་འདེགས་འབུལ་ཞུས་པ་མ་ཟད། བཀྲ་ཤིས་ཞོལ་པ་འཁྲབ་སྟོན་གྱི་ལམ་ནས་ཕེབས་བསུ་གཟབ་རྒྱས་ཞུས་ཡོད།
ཕྱི་ཚེས་ ༨ ཉིན་༸གོང་ས་མཆོག་སྦར་སེལ་ཁུལ་དུ་མཛད་འཆར་གྱིས་ཐོག་མར། སྦེལ་ཇམ་གྱི་བརྙན་འཕྲིན་གསར་འགྱུར་བརྒྱུད་ལམ་ RTBF ཞེས་པའི་སྤྱི་ཁྱབ་རྩོམ་སྒྲིག་པ་ Francois Mazure ལགས་ཀྱིས་མགོན་པོ་གང་ཉིད་མཆོག་ལ་ཁུལ་དེར་འཚོགས་རྒྱུའི་སེམས་དང་སྲོག་གི་ལྷན་ཚོགས་ཀྱི་བརྗོད་གཞི་ནུས་སྟོབས་དང་གཅེས་སྐྱོང་གཉིས་དང་འབྲེལ་བའི་སྐོར་བཀའ་འདྲི་ཞུ་སྐབས་༸གོང་ས་མཆོག་གིས་བཀའ་ལན་སྩལ་དོན། ནུས་སྟོབས་ནི་གཙོ་བོ་ནུས་པར་རག་ལུས་ཡོད་པ་དང། ནུས་པ་ལྡན་པ་བྱ་རྒྱུ་དེ་ཡང་ཕན་པ་དང་གནོད་པ་གཉིས་ཀ་ཡོང་སྲིད། འོན་ཀྱང་གཅེས་སྐྱོང་ནི་མི་གཞན་གྱི་སྲོག་དང་། ཐོབ་ཐང་། བདེ་དོན་ལ་གུས་བརྩི་ཞུ་རྒྱུ་དེ་ཡིན། གལ་ཏེ་ནུས་པ་དེ་ཕན་པའི་རང་བཞིན་ལ་བཀོལ་ཐུབ་ཚེ་ཡག་པོོ་ཡོད།
བྱམས་བརྩེ་ནི་འགྲོ་བ་མིའི་མི་ཚེ་དང་། འཚོ་གནས། སྤྱི་ཚོགས་དང་འབྲེལ་བ་ཆགས་ཀྱི་ཡོད་སྟབས། ཆོས་ལུགས་ཚང་མས་བྱམས་བརྩེའི་བསླབ་བྱ་གསུང་བཞིན་ཡོད། དེང་སྐབས་ང་ཚོའི་ཤེས་ཡོན་ལམ་ལུགས་དང་མི་ཚེ་སྐྱེལ་སྟངས་དེ་ཕྱི་དངོས་པོར་བརྟེན་དྲགས་པར་བརྟེན། འཛམ་གླིང་ནང་གི་མི་ཐེར་འབུམ་བདུན་ཡོད་པ་རྣམས་ལ་དཀའ་ངལ་མང་པོ་ཞིག་འཕྲད་བཞིན་ཡོད། ནང་སེམས་ཀྱི་རིན་ཐང་གོང་སྤེལ་གཏོང་རྒྱུའི་ཚོར་བ་དེ་ཆོས་ལུགས་གཅིག་པུའི་སྦྱིན་ཐུབ། འོན་ཀྱང་མི་ཚང་མ་ཆོས་ལ་དོ་དབྱིངས་མེད་པ་དང་ཡོད་པའི་ཁོངས་ནས་མང་པོ་ཞིག་གིས་དེ་ཙམ་དོ་སྣང་ཡང་བྱེད་ཀྱི་མེད། དེར་བརྟེན་ང་ཚོས་ཤེས་ཡོན་གྱི་ལམ་ལུགས་ཡར་རྒྱས་གཏོང་རྒྱུ་ཁོ་ན་ལས་གཞན་ཐབས་ལམ་གང་ཡང་མེད། ཅེས་བཀའ་ལན་སྩལ།
ཡང་༸གོང་ས་མཆོག་ལ་ཉེ་ཆར་སྦེལ་ཇམ་ཐེ་བའི་ཡུ་རོབ་ནང་འཇིགས་སྐུལ་དྲག་སྤྱོད་པས་འཚེ་བའི་བྱ་སྤྱོད་སྤེལ་བར་བརྟེན། མང་ཚོགས་ཁྲོད་ཁོང་ཁྲོ་ཟ་མཁན་ཚོར་བཀའ་སློབ་ཅི་ཞིག་ཡོད་སྐོར་བཀའ་འདྲི་ཞུས་པར་བཀའ་སྩལ་དོན། བོད་པ་ཚོར་ཡང་དཀའ་ངལ་མང་དག་ཅིག་འཕྲད་ཡོད་པར་བརྟེན་བོད་མི་འགས་ཁོང་ཁྲོ་བྱེད་ཀྱི་ཡོད། འོན་ཀྱང་ངོས་ཀྱིས་ཁོང་ཚོར་ཁོང་ཁྲོས་དཀའ་ངལ་སེལ་མི་ཐུབ་པ་མ་ཟད། དེས་སེམས་ནང་གི་ཞི་བདེ་དཀྲུག་གི་ཡོད། ཅེས་བརྗོད་ཀྱི་ཡོད།
དེ་སྔ་ཨ་རིར་ཕྱི་ཟླ་དགུ་པའི་ཚེས་བཅུ་གཅིག་གི་དོན་རྐྱེན་བྱུང་ནས་ཉིན་གཅིག་རྗེས་ངོས་ཀྱིས་སྐབས་དེ་དུས་ཨ་རིའི་སྲིད་འཛིན་ངའི་གྲོགས་པོ་ཇོར་ཇི་བྷུ་ཤི་མཆོག་ལ་ཐུགས་གསོ་ཞུས་པ་དང་སྦྲགས་ཡ་ལན་ཅི་འདྲ་ཞིག་ཡིན་རུང་འཚེ་བ་མེད་པའི་ཐོག་ནས་གནང་རྒྱུའི་རེ་བ་ཡོད་སྐོར་བརྗོད་པ་ཡིན། གལ་ཏེ་ཨི་རཁ་ནང་གི་དཀའ་ངལ་དེ་དག་འཚེ་མེད་ཞི་བའི་སྒོ་ནས་སེལ་ཐབས་གནང་ཡོད་ན་ད་ལྟ་གནས་སྟངས་དེ་ལས་བཟང་བ་ཞིག་ཆགས་ཡོད་སྲིད། དྲག་ཤུགས་ཀྱིས་དཀའ་ངལ་སེལ་བའི་ཚབ་ཏུ་གནས་སྟངས་ཇེ་སྡུག་ཏུ་གཏོང་གི་ཡོད། ཅེས་དང་། དེ་བཞིན་མགོན་པོ་གང་ཉིད་མཆོག་གིས་ཁ་ཆེའི་འཇིགས་སྐུལ་དྲག་སྤྱོད་པ་དང་ནང་པའི་འཇིགས་སྐུལ་དྲག་སྤྱོད་པ་ཞེས་ཐ་སྙད་བེད་སྤྱོད་བྱེད་རྒྱུ་དེ་འགྲིག་གི་མེད་པ་དང་། མི་སུ་འདྲ་ཞིག་གིས་དྲག་སྤྱོད་ཀྱི་ལས་རིགས་སྤེལ་ཚེ་མི་དེ་ཁ་ཆེའམ་ནང་པ་ཡང་ན་ཆོས་པ་ཡང་དག་པ་ཞིག་ཆགས་ཀྱི་མེད། ཅེས་སོགས་བཀའ་ལན་སྩལ་རྗེས་སྐུའི་ཡང་སྲིད་བུད་མེད་ཀྱི་ལུས་རྟེན་ཕེབས་ཀྱི་ཡོད་མེད་སྐོར་དང་། ཆབ་སྲིད་ཀྱི་སྐུ་དབང་རྩིས་སྤྲོད་མཛད་པ་སོགས་ཀྱི་དྲི་བར་བཀའ་ལན་སྩལ་ཡོད།
དེ་རྗེས་༸གོང་ས་མཆོག་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་དུ་དབུ་བཞུགས་ཀྱིས་བཀའ་སློབ་སྩལ་ཡོད་པ་མ་ཟད། ཕྱེད་ཡོལ་མགོན་པོ་གང་ཉིད་མཆོག་གིས་སྦར་སེལ་ནང་རྟེན་གཞི་བྱས་པའི་ཡུ་རོབ་མཐུན་ཚོགས་ཀྱི་འབྲེལ་ཡོད་ལས་བྱེད་ཁག་གཅིག་དང་དེ་བཞིན་སྦེལ་ཇམ་གྱི་ཕྱི་མི་གནས་སྤོ་ལས་ཁུངས་ཀྱི་ལས་བྱེད་དང་ལྷན་མཇལ་འཕྲད་གནང་ཡོད།
༸གོང་ས་མཆོག་དེ་རིང་ཕྱི་ཚེས་ ༩ ཉིན་སྦེལ་ཇམ་གྱི་རྒྱལ་ས་སྦར་སེལ་གྱི་བྷོ་ཛར་སྒྱུ་རྩལ་བསྟི་གནས་ཁང་Bozar Center for Fine Art དུ་ཡུ་རོབ་སེམས་དང་སྲོག་གི་ཚོགས་པའི་གོ་སྒྲིག་འོག་ཉིན་གྲངས་གཉིས་དང་ཕྱེད་ཀའི་རིང་ཚན་རིག་པ་དང་དཔལ་འབྱོར། ཆོས་ལུགས་བཅས་ཀྱི་མཁས་ལས་མི་སྣ་དང་ལྷན། ནུས་སྟོབས་དང་གཅེས་སྐྱོང་། ཞེས་པའི་བརྗོད་གཞིའི་ཐོག་སེམས་དང་སྲོག་གི་མཁས་པའི་བགྲོ་གླེང་གི་ཚོགས་མགོན་དུ་ཆིབས་སྒྱུར་བསྐྱངས་ཡོད་པ་བཅས།།