ཕྱི་ལོ་ ༢༠༡༦ ཟླ་ ༩ ཚེས་ ༡༣ རེས་གཟའ་མིག་དམར།

༄༅། །ཕྱི་ལོ་ ༢༠༡༦ ཟླ་ ༩ ཚེས་ ༡༡ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉིན་གྲངས་གཉིས་དང་ཕྱེད་ཀའི་རིང་གི་སེམས་དང་སྲོག་གི་མཁས་པའི་བགྲོ་གླེང་མཇུག་སྒྲིལ་སྐབས་བཀའ་སློབ་དང་། ཕྱེད་ཡོལ་མང་ཚོགས་ཆིག་ཁྲི་བརྒལ་བར་མི་སྒེར་གྱི་ལས་འགན་དང་འཇིག་རྟེན་ཀུན་ཁྱབ་ཀྱི་འགན་ཁུར་Individual Commitment and Global Responsibility ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཐོག་མར་༸གོང་ས་མཆོག་གིས་ཕི་ལེ་མིཤ་བརྙན་འཕྲིན་གསར་འགྱུར་བརྒྱུད་ལམ་ Flemish TV News གྱི་གསར་འགོད་པས་སྦེལ་ཇམ་དང་ཡུ་རོབ་ཁུལ་དུ་ཆིབས་སྒྱུར་སྐབས་སྤྲོ་བོ་བྱུང་ཡོད་མེད་སྐོར་གྱི་དྲི་བར་བཀའ་ལན་སྩལ་སྐབས། མགོན་པོ་གང་ཉིད་མཆོག་ཕྱི་ལོ་ ༡༩༧༣ ལོར་ཐོག་མར་ནུབ་ཕྱོགས་རྒྱལ་ཁབ་ཏུ་ཆིབས་སྒྱུར་བསྐྱངས་སྐབས་བྷི་བྷི་སི་གསར་ཁང་གི་ Mark Tully ལགས་ཀྱི་ཆེད་དོན་དྲི་བར་བཀའ་ལན་སྩལ་བ་ཐུགས་དྲན་གསོ་མཛད་པ་སྦྲགས། ༸གོང་ས་མཆོག་འཛམ་གླིང་འདིའི་མི་སེར་གཅིག་ཡིན་པ་དང་གང་ཉིད་མཆོག་རེ་བ་བཟང་ས་ནས་རྒྱག་མཁན་ཞིག་ཡིན་པ། དེ་བཞིན་ད་ལྟའི་ཤེས་ཡོན་ལམ་ལུགས་ནང་བཟང་སྤྱོད་དང་འབྲེལ་བའི་ཤེས་ཡོན་སློབ་གསོ་གཏན་འབེབས་གནང་རྒྱུའི་ཐོག་འབད་བརྩོན་ཡང་དག་ཅིག་བྱས་ཚེ་དུས་རབས་འདིའི་ནང་འཛམ་གླིང་འདི་ཞི་བདེ་དང་བདེ་སྐྱིད་ལྡན་པ་ཞིག་ཆགས་ཐུབ་ངེས་ཡིན་སྐོར་བཀའ་ལན་སྩལ་ཡོད།

དེ་རྗེས་༸གོང་ས་མཆོག་ཡུ་རོབ་རྒྱལ་ཁབ་སྦེལ་ཇམ་གྱི་རྒྱལ་ས་སྦར་སེལ་ནང་འཚོགས་བཞིན་པའི་སེམས་དང་སྲོག་གི་ཚོགས་འདུའི་མཇུག་བསྒྲིལ་ཐོག་ལྷན་ཞུགས་ཀྱིས་བཀའ་སློབ་བཀའ་དྲིན་སྩལ་ཡོད། གོང་ཚེས་ཉིན་གྱི་ཕྱེད་ཡོལ་མགོན་པོ་གང་ཉིད་མཆོག་གིས་སྦར་སེལ་གྱི་མཐའ་རུ་ཡོད་པའི་ Brussels Expo ཞེས་པར་མང་ཚོགས་ཆིག་ཁྲི་བརྒལ་བར་མི་སྒེར་གྱི་ལས་འགན་དང་འཇིག་རྟེན་ཀུན་ཁྱབ་ཀྱི་འགན་ཁུར་ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད། སྐབས་དེར་ཡུ་རོབ་སེམས་དང་སྲོག་བསྟི་གནས་ཁང་གི་འགན་འཛིན་སན་ཌར་ཊཡེ་ཌི་མེན་ Sander Tideman ལགས་ཀྱིས་༸གོང་ས་མཆོག་སྡིངས་ཆའི་སྟེང་གདན་ཞུས་བ་དང་སྦྲགས། སྦར་སེལ་གྲོས་ཚོགས་ཀྱི་ཚོགས་གཙོ་ Charles Picqué མཆོག་དང་ཕེ་ལེ་མིཤ་གྲོས་ཚོགས་ཀྱི་ཚོགས་གཙོ་ Jan Peumans མཆོག་རྣམ་གཉིས་ལ་ལས་རིམ་ངོ་སྤྲོད་ཡོང་བའི་འབོད་སྐུལ་ཞུས་འདུག དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། དུས་རྒྱུན་ངོས་ཀྱིས་མི་གཞན་དང་ཐུག་འཕྲད་བྱེད་སྐབས་ང་ཚོ་ཚང་མ་འགྲོ་བ་མིའི་རིགས་གཅིག་གྱུར་ཡིན་པའི་འདུ་ཤེས་འཛིན་གྱི་ཡོད། ང་ཚོ་ཐོག་མར་མ་ནས་སྐྱེ་སྟངས་དང་མཐར་འཆི་སྟངས་སོགས་གཅིག་མཚུངས་ཆགས་ཡོད། ང་ཚོ་ཚང་མ་སྤུན་ཟླ་ཕོ་མོ་ཆགས་ཡོད། དེང་སྐབས་ང་ཚོར་འཕྲད་བཞིན་པའི་དཀའ་ངལ་མང་དག་ཅིག་ནི་ང་ཚོས་ཕན་ཚུན་གཅིག་གྱུར་གྱི་འདུ་ཤེས་དེ་དོར་ཏེ། རིམ་པ་གཉིས་པའི་ཐོག་ནས་མི་ཕན་ཚུན་མི་འདྲ་བའི་ཁྱད་པར་ཡོད་པ་དེ་དག་ལ་གཙིགས་ཆེར་འཛིན་པར་བརྟེན་དཀའ་ངལ་དེ་དག་འབྱུང་བཞིན་ཡོད། ང་ཚོས་ངའི་རྒྱལ་ཁབ་དང་ཁོ་པ་ཚོའི་རྒྱལ་ཁབ། ང་ཚོ་དང་ཁོ་པ་ཚོ། ཞེས་པའི་འཐེན་ཁྱེར་གྱི་བསམ་བློ་ཤུགས་ཆེ་དྲགས་པའི་རྐྱེན་གྱིས་དུས་རབས་ ༢༠ ནང་རྩོད་རྙོག་དང་དྲག་སྤྱོད་སོགས་བྱུང་བའི་རྗེས་འབྲས་སུ་དམག་ཆེན་གཉིས་པོ་བྱུང་བ་རེད། དེང་སྐབས་གོ་ལའི་གནམ་གཤིས་འགྱུར་ལྡོག་དང་འབྲེལ་འབྱུང་བའི་གོད་ཆག་སོགས་ཇེ་མང་དུ་འགྲོ་བཞིན་པ་དེ་དག་ནི་མིས་བཟོས་པའི་དཀའ་ངལ་ཤ་སྟག་རེད།

སྐབས་རེ་མི་ཁག་གཅིག་གིས་བྱམས་བརྩེ་ཉམས་ལེན་བྱེད་རྒྱུ་དེ་ཞན་ཆ་ཞིག་ཏུ་ངོས་འཛིན་བྱེད་བཞིན་པ་དེ་ནོར་འཁྲུལ་རེད། དེ་ལས་ལྡོག་ཏེ་བརྩེ་བ་ནི་ནུས་སྟོབས་ཀྱི་མཚོན་རྟགས་ཤིག་ཡིན་པ་དང་ཁོང་ཁྲོ་དེ་ཞན་ཆ་ཞིག་ཡིན། དེ་བཞིན་མི་འགས་བྱམས་བརྩེ་བྱེད་རྒྱུ་ནི་མི་གཞན་ཁོ་ནར་ཕན་ཐོགས་ཡོད་པར་ངོས་འཛིན་བྱེད་རྒྱུ་དེ་ཡང་ནོར་བ་རེད། སེམས་པ་བཟང་པོ་དང་བྱམས་བརྩེ་སོ་སོའི་རྒྱུད་ལ་སྐྱེ་ཚེ་དེའི་ཁེ་ཕན་དེ་ཐོག་མ་རང་ཉིད་སོ་སོར་ཡོང་གི་ཡོད། དེང་དུས་ཀྱི་ཤེས་ཡོན་ལམ་ལུགས་ནང་ཕྱི་དངོས་པོའི་འཛུགས་སྐྲུན་ཡར་རྒྱས་གཙོ་བཟུང་བྱས་པ་ལས་ནང་བསམ་བློའི་རིན་ཐང་ཐོག་དོ་སྣང་བྱེད་ཀྱི་མེད་པར་བརྟེན། དེང་དུས་ཀྱི་ཤེས་ཡོན་དེ་ནང་སེམས་ཀྱི་རིན་ཐང་གོང་མཐོར་གཏོང་རྒྱུའི་སློབ་གསོ་འདང་ངེས་ཤིག་མེད། གལ་ཏེ་ང་ཚོས་མིའི་རྣམ་དཔྱོད་དེ་ཉིད་བེད་སྤྱོད་བྱས་ཚེ་ནང་བསམ་བློའི་རིན་ཐང་གི་ནུས་པ་གོང་མཐོར་གཏང་ཐུབ། དེར་བརྟེན་འགྲོ་བ་མིའི་རྒྱུད་ལ་ཡོད་པའི་བཟང་པོའི་ཡོན་ཏན་གོང་འཐོར་གཏོང་སྟེ་འགྲོ་བ་མིའི་རིགས་ལ་བདེ་སྐྱིད་བསྐྲུན་ཐབས་བྱ་རྒྱུ་ནི་ངོས་ཀྱི་འགན་འཁུར་དང་པོ་དེ་ཡིན།

ངོས་རང་ནང་པའི་དགེ་སློང་དང་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་གྱི་སློབ་ཕྲུག་ཅིག་ཡིན་པའི་ཆ་ནས་ཆོས་ལུགས་ཕན་ཚུན་དབར་མཐུན་སྒྲིལ་གོང་སྤེལ་གཏོང་ཐབས་བྱ་རྒྱུ་ནི་ངོས་ཀྱི་འགན་འཁུར་གཉིས་པ་དེ་ཡིན། རྒྱ་གར་ནང་འདས་པའི་ལོ་ངོ་སྟོང་ཕྲག་རིང་ནས་ཆོས་ལུགས་གཙོ་ཆེ་འདྲ་མིན་འཆམ་མཐུན་ངང་འཚོ་གནས་བྱེད་བཞིན་ཡོད་པ་ནི་ཆོས་ལུགས་འདྲ་མིན་ཞི་མཐུན་ངང་གནས་ཐབས་ཡོད་པའི་མིག་དཔེ་ལྟ་བུར་གྱུ་ཡིན། ངོས་ཀྱི་འགན་འཁུར་གསུམ་ནི་ངོས་རང་བོད་མི་ཞིག་ཡིན་པའི་ཆ་ནས་དང་ལྷག་པར་བོད་ཕྱི་ནང་གཉིས་སུ་གནས་པའི་བོད་མི་སེར་སྐྱ་ཡོངས་ཀྱིས་ངོས་ལ་ཡིད་ཆེས་བློ་གཏད་ཆེན་པོ་བྱེད་བཞིན་ཡོད་སྟབས། བོད་དོན་ཐོག་དམིགས་བསལ་འགན་འཁུར་ཡོད། ཅེས་སོགས་ཀྱི་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་མཛད་ཡོད།

དེ་རྗེས་༸གོང་ས་མཆོག་གིས་སྦེལ་ཇམ་ཁུལ་དུ་གནས་སྡོད་བོད་རིགས་ ༣༥༠༠ ཙམ་ལ་རང་མི་རིགས་ཀྱི་ཐུན་མོང་མ་ཡིན་པའི་ངོ་བོ་དང་ཡ་རབས་བཟང་སྤྱོད་མི་ཉམས་རྒྱུན་འཛིན་བྱ་དགོས་པ་དང་། དེ་བཞིན་ནང་ཆོས་ལ་སློབ་གཉེར་ཡག་པོ་བྱས་ཏེ་དུས་རབས་ ༢༡ པའི་ནང་པ་ཞིག་ཆགས་ཐབས་བྱ་དགོས་སྐོར་སོགས་ཀྱི་བཀའ་སློབ་སྩལ་ཡོད།།