༢༠༡༦ ཟླ་ ༩ ཚེས་ ༢༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༦ ཟླ་ ༩ ཚེས་ ༢༩ རེས་གཟའ་ཕུར་བུའི་ཉིན་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ཉིན་མཐའ་མར་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཇུག་བསྡོམས་གསུང་བཤད་གནང་དོན། དེ་རིང་སྐབས་ ༡༦ གྲོས་ཚོགས་ཚོགས་དུས་གཉིས་པ་དེ་ལས་ཉིན་དགུའི་རིང་ཚོགས་ཡོད། གཙོ་བོ་གྲོས་ཚོགས་ཀྱི་ལས་རིམ་ནང་མྱ་ངན་གུས་འདུད་ཀྱི་གྲོས་ཆོད་གྲོས་འཆར་གཅིག་དང་། དེ་བཞིན་གཞུང་འབྲེལ་གདུང་སེམས་མཉམ་སྐྱེའི་གྲོས་ཆོད་གྲོས་འཆར། ཁྲིམས་སྒྲིག་བསྐྱར་བཅོས་ཁག་གཅིག དེ་བཞིན་བཀའ་ཤག་གི་གསལ་བཤད། སྐར་རྟགས་ཅན་གྱི་དྲི་བ་རིགས་གཅིག ལས་ཉིན་མང་བ་དེ་ལྷན་ཁང་ཁག་གི་ལས་བསྡོམས་ཀྱི་ཐོག་དུས་ཚོད་བཏང་ཡོད། དེར་བརྟེན་ཚོགས་གཙོ་གཉིས་ཀྱི་ངོས་ནས་ལས་རིམ་གྱི་ནང་ཆ་ཤས་ལེན་ཕྱོགས་ཀྱི་ཐོག་ནས་དཔལ་ལྡན་སྲིད་སྐྱོང་མཆོག་གིས་དབུས་བཀའ་བློན་རྣམ་པ་དང་། བཀུར་འོས་གྲོས་ཚོགས་ཀྱི་འཐུས་མི་ཚང་མས་འགན་ཁུར་མཉམ་བཞེས་ཀྱིས་ཚད་དང་ལྡན་པའི་མང་གཙོའི་འགྲོ་སྟངས་ཤིག་ཐོག་ནས་ཆ་ཤས་བླངས་ཐུབ་སོང་བསམ་པ་དྲན་བཞིན་ཡོད། དེར་བརྟེན་དེ་རིང་འདིར་གྲོས་ཚོགས་ཀྱི་ཚོགས་མི་ཡོངས་ལ་ཚོགས་གཙོ་གཉིས་ཀྱི་ངོས་ནས་བསྔགས་བརྗོད་དང་ཐུགས་རྗེ་ཆེ་ཞེས་ཞུ་རྒྱུ་ཡིན། འོན་ཀྱང་གྲོས་ཚོགས་ཀྱི་ལས་རིམ་སྐབས་མཚམས་རེ་འགྲོ་སྟངས་ཀྱི་ཐོག་ནས་ཏག་ཏག་བསྡད་མ་བསྡད་ཡོང་གི་འདུག དེ་རིང་གི་གྲོས་ཚོགས་ལྟ་བུར་མཚོན་ན་བཀུར་འོས་སྤྱི་འཐུས་ནང་ཕན་ཚུན་ཚིག་རྒྱག་ཞུ་རྒྱུ་ལྟ་བུ་དང་། བཀའ་མོལ་གསུང་སྐབས་དང་པོ་བཀའ་མོལ་གསུང་མཁན་དེའི་ཞལ་ལ་གཟིགས་ནས་ཐད་ཀར་གསུངས་གནང་བ་དེ་འདྲའི་སྤྱོད་ལམ་བསྟེན་ཕྱོགས་ཀྱི་ཐོག་ཚོགས་གཙོར་སེམས་འཚབ་ཕྲན་བུ་བྱུང་།
འོན་ཀྱང་ང་རང་ཚོ་གྲོས་ཚོགས་ཀྱི་འཐུས་མི་ཡིན་པ་དང་། གང་ཟག་དེས་བོད་བསྟན་པ་ཆབ་སྲིད་ཀྱི་ཐོག་འགན་ཁུར་ཞུ་རྒྱུ་ཡིན་ཞེས་དམ་བཅའ་ཞུས་པའི་ཆ་ནས་རེད། ང་རང་ཚོ་བསམ་ཚུལ་མ་མཐུན་པ་སྤྱི་དང་། དེ་བཞིན་བསམ་ཚུལ་མ་མཐུན་པའི་ཐོག་ནས་བགྲོ་གླེང་གི་ཆ་ཤས་ལེན་ཕྱོགས་ལའང་གཏམ་བཤད་གཅིག་གྱུར་ཡོང་གི་མེད་པ་ཚོགས་གཙོས་ཤེས་ཀྱི་ཡོད། འོན་ཀྱང་ང་རང་ཚོ་བོད་སྤྱི་པའི་མི་གཅིག་ཡིན་པའི་ཆ་ནས་ང་ཚོས་ལས་དོན་གང་འདྲ་ཞིག་བརྩམས་པ་ཡིན་ནའང་མཐའ་མ་དེ་བོད་མི་རིགས་ལ་ཕན་ཐོགས་དགོས་རྒྱུ་དང་། འབྱུང་འགྱུར་བོད་མི་རིགས་གསར་པ་དེ་ཚོས་ང་ཚོའི་དུས་ཚོད་འདིར་ཕྱི་མིག་བལྟ་སྐབས་དེ་ཚོ་གྲས་དངོས་གནས་ཀྱི་ཚད་དང་ལྡན་པ་ཞིག་དང་ཡིད་ཆེས་ཆ་འཇོག་ཞུ་ས་ཞིག་རེད་འདུག་བསམ་པའི་ལོ་རྒྱུས་ཀྱི་སྟོང་ཆ་དེ་བསྐང་དགོས་རྒྱུ་ཧ་ཅང་གལ་ཆེན་པོ་རེད། དེར་བརྟེན་ད་ཐེངས་གྲོས་ཚོགས་ཀྱི་ཚོགས་དུས་གཉིས་པ་རེད། ད་དུང་དུས་ཚོད་མང་བ་ཞིག་ལྷག་བསྡད་ཡོད། དེ་ཚོའི་ནང་འགན་ཁུར་བཞེས་ཕྱོགས་དེ་ཚད་དང་ལྡན་པ་ཞིག་གནང་དགོས་རྒྱུ་གལ་ཆེན་པོ་རེད། དེ་བོད་མི་མང་གིས་འགན་བསྐུར་བའི་ཐོག་ནས་གནང་དགོས་པ་ཞིག་རེད་མ་གཏོགས་སོ་སོའི་བསམ་ཚུལ་གང་བྱུང་གནང་སའི་སྡིངས་ཆ་ཞིག་མིན་སྟབས་དེ་ཚོ་གྲས་ཕྲན་བུ་དགོངས་པ་བཞེས་རྒྱུ་གལ་ཆེན་པོ་མིན་ནམ་བསམ་བྱུང་།
དེ་བཞིན་སྤྱི་འཐུས་སྒེར་གྱི་གསལ་བཤད་གཅིག་ཕེབས་པ་རེད། སྤྱི་འཐུས་སྒེར་གྱི་གསལ་བཤད་ཕེབས་ཆོག་རྒྱུ་དེ་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞིའི་དགོངས་དོན་ཆགས་ཡོད། དེར་བརྟེན་ཚོགས་གཙོ་གཉིས་ཀྱི་ངོས་ནས་གོ་སྐབས་ཕུལ་བ་རེད། དེའི་རྗེས་ལ་གསལ་བཤད་ཀྱི་ཐོག་འཛིན་སྐྱོང་གི་དཔལ་ལྡན་སྲིད་སྐྱོང་གི་ངོས་ནས་བཀའ་ཤག་གི་གསལ་བཤད་ལན་འདེབས་འཕྲོས་དེ་ལྷག་ཡོད། དེ་དང་མཉམ་དུ་གསུང་སྐབས། ཟང་ཟིང་གི་རྣམ་པ་ཕྲན་བུ་བྱུང་བའི་ཚོར་སྣང་ཡོང་སྐབས་ཕྲན་བུའི་སེམས་འཚབ་བྱུང་། འོན་ཀྱང་ཚོགས་གཙོས་སྟངས་འཛིན་བྱེད་ཕྱོགས་དེ་བཙན་བྱོལ་བོད་མིའི་བཅའ་ཁྲིམས་དང་མཐུན་པ། ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དང་མཐུན་པ་འགྲོ་ཡོད་ཅེས་ཞུ་འདོད་བྱུང་།
འོན་ཀྱང་དཔལ་ལྡན་སྲིད་སྐྱོང་མཆོག་གིས་གསལ་བཤད་གནང་སྐབས་གཅིག་བྱས་ན་ཚོར་བའི་ཐོག་ནས་ཕེབས་མིན་ནམ་བསམ་པའི་ཚོར་སྣང་ཞིག་བྱུང་། དེ་གང་རེད་བརྗོད་ན། གྲོས་ཚོགས་ར་བ་འདིའི་ནང་༸གོང་ས་༸སྐྱབས་མགོན་ཆེན་པོ་མཆོག་ལ་དད་པ་བྱེད་མཁན་ང་ལས་ལྷག་པ་སུ་ཡོད། ཅེས་པའི་བཀའ་མོལ་ཞིག་གསུངས་སོང་། དེ་ཚོགས་གཙོས་ཏག་ཏག་བསྡད་མ་སོང་བསམས་བྱུང་། དེ་སོ་སོས་ངོས་འཛིན་བྱེད་ཕྱོགས་དང་བསམ་བློ་གཏོང་ཕྱོགས་ཤིག་ཡོད། འདིར་ད་ལྟ་གཙོ་སྐྱོང་བྱེད་མཁན་ཚོགས་གཙོ་ཡིན་ནའང་༸སྐྱབས་མགོན་རིན་པོ་ཆེ་ལ་མི་ཕྱེད་པའི་དད་པ་ཡོད་པ་ཙམ་མ་ཟད། ད་ལྟ་འདིར་ཞུ་ན་འགྲིག་གི་ཡོད་མེད་མི་ཤེས། གང་ལྟར་རྨི་ལམ་ཚུན་ཆད་ལ་རྨི་ལམ་གཏོང་བ་ཙམ་མ་ཟད། རྗེས་སུ་འཛིན་པའི་ཐོག་ནས་བཀའ་སློབ་གསུང་བཞག་པ་དེ་འདྲ་ཡང་བྱུང་། དེ་ཚོ་གྲས་ལ་བསམ་བློ་གཏོང་སྐབས་མིག་ཆུ་ཤོར་རྒྱུ་དེ་འདྲ་ཡང་ཡོང་གི་ཡོད། དེ་བཞིན་གྲོས་ཚོགས་འཐུས་མི་ཚང་མ་ལའང་དེ་ལྟ་བུའི་ཚོར་བ་དེ་ཡོད་རེད་བསམ་གྱི་ཡོད།
དེར་བརྟེན་ང་ཚོས་གསུང་སྐབས་གྲོས་ཚོགས་ནང་སྤྱི་མོས་དང་མང་མོས་གནང་བ་དེ་དག་གྲོས་ཚོགས་དང་འཛིན་སྐྱོང་གི་འགན་འཁུར་དགོས་པ་ཆགས་ཀྱི་ཡོད། གྲོས་ཚོགས་འཐུས་མི་དང་བཀའ་བློན་རེ་འགའ་བ་གཅིག་གིས་གཏམ་བཤད་དེ་ང་ཚོས་འགན་འཁུར་དགོས་པ་ཆགས་ཀྱི་མེད། གཏམ་བཤད་གནང་མཁན་གང་ཟག་སོ་སོའི་ངོས་ནས་འགན་འཁུར་དགོས་པ་ཆགས་ཀྱི་ཡོད། དེར་ཁུངས་སྐྱེལ་དགོས་ཀྱི་ཡོད། དེར་བརྟེན་དེ་ལྟ་བུའི་ཐོག་གཅིག་ཞུ་ན་བསམས་བྱུང་། དེར་བརྟེན་ཐེངས་འདིར་ང་ཚོའི་གདུང་སེམས་མཉམ་སྐྱེའི་གྲོས་ཆོད་གྲོས་འཆར་དང་བཀའ་ཤག་གི་གསལ་བཤད་ཐོག་བགྲོ་གླེང་གནང་སྐབས་ལས་འགུལ་སྤེལ་དགོས་འདུག ཅེས་མང་པོ་ཞིག་གིས་གསུངས་སོང་། ལས་འགུལ་སྤེལ་དགོས་པ་ངེས་ཅན་རེད། ལས་འགུལ་སྤེལ་དགོས་པ་ཞིག་ལ་ངོས་འཛིན་ཞུ་གི་ཡོད། གཞུང་འབྲེལ་གྱི་ཐོག་ནས་ལས་འགུལ་སྤེལ་ནའང་འཛིན་སྐྱོང་གི་ཐོག་ནས་དཔལ་འབྱོར་གྱི་མཐུན་འགྱུར་ལ་དཀའ་ངལ་མེད་གསུངས་པ་དེ་ཡང་ང་ཚོར་ཧ་ཅང་གཏམ་བཟང་རེད། དེར་བརྟེན་ང་ཚོས་ལས་འགུལ་སྤེལ་རྒྱུའི་བང་སྒྲིག་དགོས་རྒྱུ་དེ་གལ་ཆེན་པོ་ཞིག་རེད། འོན་ཀྱང་ལས་འགུལ་སྤེལ་བའི་སྐབས་འཛིན་སྐྱོང་བཀའ་ཤག་གི་གསུངས་པ་བཞིན་འཚེ་མེད་ཞི་བ་དང་། ཁྲིམས་དང་མཐུན་པ། ཆེ་མཐོང་ལྡན་པའི་ཐོག་ནས་སྤེལ་དགོས་པའི་ཆ་རྐྱེན་གསུམ་བཏོན་ཡོད། དེའི་ཐོག་དེ་སྔ་སྤྱི་འཐུས་སྐབས་ ༡༥ དང་བཀའ་ཤག་སྐབས་ ༡༤ སྐབས་སུ་བཀའ་སྤྱི་གཉིས་ལྷན་རྒྱས་ཀྱི་ཐོག་ནས་ཆ་རྐྱེན་གསུམ་དེར་མོས་མཐུན་ཞུས་པའི་ཐོག་ནས་གཏན་འབེབས་གནང་ཡོད།
དེར་བརྟེན་ང་ཚོས་སྤྱི་ཚོགས་ནང་གཞུང་འབྲེལ་གྱི་ཐོག་ནས་ལས་འགུལ་སྤེལ་བ་ཡིན་ནའང་འདྲ་གཞུང་འབྲེལ་མ་ཡིན་པའི་ཐོག་ནས་ལས་འགུལ་སྤེལ་བ་ཡིན་ནའང་གང་ལྟར་ཆ་རྐྱེན་གསུམ་དེ་ལྡན་དགོས་པ་གལ་ཆེན་པོ་ཆགས་ཡོད། ལས་འགུལ་སྤེལ་སྐབས་རྒྱལ་སྤྱིའི་ཆབ་སྲིད་ཀྱི་གནས་བབ་རེད། རྒྱ་ནག་གི་ཆབ་སྲིད་ཀྱི་གནས་བབ། བོད་ནང་གི་གནས་སྟངས་བཅས་ཕྱོགས་མང་པོ་ཞིག་གི་གནས་སྟངས་ལ་སྐབས་དང་དུས་ཀྱི་དགོངས་པ་བཞེས་དགོས་པ་བཞེས་ནས་ལས་འགུལ་སྤེལ་དགོས་པ་ཧ་ཅང་གལ་ཆེན་པོ་རེད། དེ་མིན་སོ་སོའི་ལངས་ཕྱོགས་རྩལ་དུ་འདོན་རྒྱུ་དང་གནས་སྟངས་གཞན་ལ་དེ་ཙམ་གྱི་བསམ་ཤེས་བྱེད་མ་ཐུབ་པའི་ཐོག་ནས་ལས་འགུལ་སྤེལ་བའི་རིགས་དེ་འདྲ་ཡོང་བཞིན་ཡོད། གཙོ་བོ་བོད་ནང་གི་བོད་མིའི་མངོན་འདོད་དང་ལྷག་བསམ་རེད། ཁོང་ཚོའི་སེམས་ཤུགས་གཞི་ལ་བཞག་ནས་ང་ཚོས་ལས་འགུལ་སྤེལ་དགོས་པ་ངེས་ཅན་རེད། དེར་བརྟེན་གྲོས་ཚོགས་ངོས་ནས་ཀྱང་འབྱུང་འགྱུར་ཟླ་དྲུག་ནང་ང་ཚོ་སླར་ཡང་འདིར་འཛོམས་རྒྱུ་རེད། སྐབས་དེར་ལས་འགུལ་སྤེལ་ཕྱོགས་ཐད་བཞུགས་མོལ་ཚོགས་འདུའི་ཐོག་ནས་ང་ཚོ་དེའི་ཐོག་བང་སྒྲིག་ཆོག ད་ལྟའི་ཆར་སྤྱི་འཐུས་རྒྱུན་ལས་ཐོག་ནས་ཆབ་སྲིད་རང་གི་ཐོག་ལ་ང་ཚོས་ཡིག་ཆ་ཞིག་གཏན་འབེབས་བྱས་ཡོད། ཡིག་ཆ་དེ་བཀུར་འོས་སྤྱི་འཐུས་ཚང་མར་འབུལ་ཐུབ་མིན་ཤེས་མ་སོང་། ཉེ་ལམ་སྤྱི་འཐུས་ཚོགས་གཞོན་མཆོག་གིས་དབུས་རྒྱུན་ལས་སྐུ་ཚབ་གཅིག་ལྡི་ལིར་ཕེབས་ནས་རྒྱ་གར་གྲོས་ཚོགས་གོང་འོག་གི་འཐུས་མི་དང་བློན་ཆེན་ཁག་མཇལ་ནས་བོད་དོན་ཞུ་གཏུག་གནང་བ་ཙམ་མ་ཟད། རྗེས་སུ་རྒྱ་གར་གྲོས་ཚོགས་བོད་དོན་རྒྱབ་སྐྱོར་གྱི་ཆབ་སྲིད་མི་སྣ་རྣམས་དང་ལྷན་ཚོགས་འདུ་ཚོགས་ནས་རྨང་གཞི་ཡག་པོ་ཞིག་བཏིང་ཐུབ་པ་བྱུང་ཡོད། ཅེས་ཞུ་རྒྱུ་ཡིན།
དོན་ཚན་གཉིས་པ་བོད་ཀྱི་སྐད་ཡིག་ཐོག་ལ་གོང་དུ་ཤེས་རིག་ལས་ཁུངས་ཀྱི་ལས་བསྡོམས་ཐོག་ལ་བགྲོ་གླེང་ཆ་ཤས་མང་པོ་བཞེས་སོང་། བོད་ཀྱི་སྐད་ཡིག་ཐོག་ལ་བོད་ནང་གི་བོད་མི་ཚོས་ལས་འགུལ་རབ་དང་རིམ་པ་སྤེལ་བཞིན་ཡོད། དེར་བརྟེན་ང་ཚོ་བཙན་བྱོལ་སྤྱི་ཚོགས་ནང་ད་ལྟའི་དུས་སྐབས་འདིར་བོད་ཀྱི་སྐད་ཡིག་ཐོག་ལ་དོ་སྣང་གསར་པ་ཞིག་བསླེབས་ཡོད་པ་རྟོགས་བཞིན་ཡོད་པ་འདི་ང་ཚོས་མུ་མཐུད་ནས་འཇུག་སྐྱོང་ཐུབ་པ་དགོས་རྒྱུ་གལ་ཆེན་པོ་རེད། ད་ལྟ་གཙོ་སྐྱོང་གནང་མཁན་འདིས་ནིའུ་ཡོག་ཏུ་བཅར་བ་ཡིན། ཁུལ་དེར་གཟའ་མཇུག་སློབ་གྲྭའི་སློབ་མ་རྣམས་དང་ཐུག་སྐབས་ཕྲུ་གུ་དེ་ཚོའི་སྐད་ཆ་ཤོད་སྟངས་ལ་ལྟ་ཡོང་དུས་གང་ཙམ་རེ་བ་རྒྱག་ས་ཞིག་འདུག
ཕྱོགས་མཚུངས་ཉེ་ལམ་སྦེལ་ཇམ་ཁུལ་དུ་བཅར་ནས་སློབ་གྲྭའི་འགན་འཛིན་རྣམས་དང་ཐུག་པ་ཡིན། སྐབས་དེར་ཁོང་རྣམ་པས་སྦེལ་ཇམ་ཕྲུ་གུ་ཚོར་མཚོན་ན་མ་སྐད་རང་གི་ཐོག་ནས་བོད་སྐད་སློབ་ཐུབ་པ་འདུག ཅེས་གདེང་ཚོད་ཆེན་པོའི་ཐོག་ནས་བརྗོད་ཀྱི་འདུག དེ་ཚོ་ང་ཚོས་འབྲེལ་ཡོད་ཁྱིམ་ཚང་དང་ཤེས་རིག་ལས་ཁུངས། སློབ་གྲྭ་ཁག དེ་བཞིན་སྤྱི་ཚོགས་རང་ནས་བོད་ཀྱི་སྐད་ཡིག་ཐོག་ང་ཚོས་དོ་སྣང་ཤུགས་ཆེ་ཙམ་གནང་ཐུབ་ན་ང་ཚོའི་སྐད་ཡིག་ནང་དུ་ཡོད་པའི་བོད་ཀྱི་ཐུན་མིན་ཆོས་དང་རིག་གཞུང་། ལྷག་པར་ནང་དོན་རིག་པ། ཚད་མ་རིག་པ། གསོ་བ་རིག་པ་དེ་དག་ཕལ་ཆེར་ང་ཚོས་སྤོབས་པ་ལྡན་པའི་ཐོག་ནས་བཤད་ཐུབ་རྒྱུ་རེད། གཞན་ལ་མེད་པའི་ཁྱད་ཆོས་དེ་དག་ང་ཚོས་འཛམ་གླིང་ལ་ངོམས་སུ་ཆོག་པ་ཙམ་དུ་མ་ཟད། འཛམ་གླིང་སྤྱི་ལ་ཕན་ཐོགས་ཐུབ་རྒྱུའི་ནུས་པ་ཡོད། འདི་ང་རང་ཚོའི་སྐད་ཡིག་ཐོག་ནས་འཛིན་སྐྱོང་སྤེལ་གསུམ་གནང་དགོས་སྟབས། དེ་ཚོར་ང་ཚོས་སྣང་ཆུང་དང་འཐུས་ཤོར་མ་སོང་བའི་ཐོག་ནས་འབྲེལ་ཡོད་འཛིན་སྐྱོང་ཐོག་ནས་ཡིན་ནའང་འདྲ། སློབ་གྲྭ་རེད། སྤྱི་ཚོགས་རེད། ཁྱིམ་ཚང་རེད། དེ་ཚོས་ཐོག་ནས་འགན་ཁུར་ཚད་དང་ལྡན་པ་ཞིག་གནང་ཐུབ་དགོས་པ་དེ་གལ་ཆེན་པོ་རེད། ཅེས་འདི་གཅིག་འབོད་སྐུལ་ཞུ་འདོད་འབྱུང་། དེ་བཞིན་བཀའ་ཤག་གི་གསལ་བཤད་གནང་སྐབས་སུ་བར་ལམ་གཅིག་ནས་ང་ཚོའི་སྤྱི་ཚོགས་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་མཁན་ཡོང་བཞིན་ཡོད་པ་དང་། དེར་གདོང་ལེན་གནང་དགོས་པའི་བསམ་ཚུལ་ཡང་བྱུང་ཡོད། ཕྱོགས་མཚུངས་གྲོས་ཚོགས་འཐུས་མི་མང་པོ་ཞིག་གིས་དེར་ཚོར་བ་རྣོ་པོའི་ཐོག་ནས་གོ་བསྡུར་བགྲོ་གླེང་གནང་ཡོད།
དེར་བརྟེན་ད་ལྟ་གཙོ་སྐྱོང་གནང་མཁན་གྱི་ཐོག་ནས་ཡིན་ནའང་དེ་ཚོའི་གྲས་ངེས་པར་དུ་ང་རང་ཚོ་བོད་མིའི་སྤྱི་ཚོགས་སྤྱི་ཡོངས་ནས་དོ་སྣང་གནང་རྒྱུ་གལ་ཆེན་པོ་རེད། ཅེས་ཞུ་འདོད་བྱུང་། ཁོ་པ་ཚོས་ཕྱོགས་གཅིག་ནས་མ་ཤེས་པ་དང་ཉོན་མོངས་པ། མ་གུས་པ་བཅས་གནས་ཚུལ་མང་པོ་ཞིག་ཐོག་ནས་ཡོང་སྲིད། ཕྱོགས་གཞན་ནས་བསམ་བཞིན་དུ་དེ་འདྲའི་ཀུན་སློང་ཡོད་སྲིད་པའང་རེད། དེར་བརྟེན་རྒྱ་ནག་གཞུང་གིས་བྱེད་ཕྱོགས་འདི་ཆབ་སྲིད་གནས་སྟངས་ཤིག་ཐོག་ནས་བྱེད་བཞིན་ཡོད། འོན་ཀྱང་ང་ཚོའི་སྤྱི་ཚོགས་ནང་དེ་འདྲའི་ཆབ་སྲིད་ཀྱི་དགོས་མཁོ་གང་ཡང་མེད། ༸སྐྱབས་མགོན་རིན་པོ་ཆེའི་མཛད་པ་འཕྲིན་ལས་ལ་ཉི་ཤར་སྦར་མོས་འགེབས་མི་ཐུབ་པའི་གནས་སྟངས་ཆགས་ཡོད། དེ་བཞིན་ང་ཚོ་བོད་མི་རིགས་ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་སྐྱེས་དམ་བཅའ་དང་རྗེས་སུ་འཛིན་ཕྱོགས་དེ་དག་འགྲན་ཟླ་མི་ནུས་པ་ཞིག་ཆགས་ཡོད། ང་ཚོའི་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་དང་པོའི་འགོ་བརྗོད་དུ། བོད་མིའི་མགོན་སྐྱབས་དང་མཚོན་རྟགས། ཞེས་བཀོད་ཡོད། དེའི་ནང་དོན་ནང་བོད་མིའི་ངོ་བོ་དང་དེའི་ཆིག་སྒྲིལ་གྱི་མཚོན་རྟགས། ཞེས་༸སྐྱབས་མགོན་རིན་པོ་ཆེ་ལ་གུས་འདུད་ཞུས་ཡོད། དེར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ང་ཚོ་བོད་མི་རིགས་ཀྱི་འདུ་ཤེས་དེ་མགོ་ལུས་ལྟ་བུ་ཆགས་ཡོད། འདི་ལྟར་འདུ་ཤེས་འཛིན་པའི་ཐོག་ནས་མཚན་སྨད་ཞུ་མཁན་རེ་ཟུང་ཡོད་པ་དེ་དག་ལ་བཟང་ཕྱོགས་ཐོག་ནས་གདོང་ལེན་གནང་དགོས་པ་ཧ་ཅང་གལ་ཆེན་པོ་རེད། བཟང་ཕྱོགས་ཐོག་ནས་གདོང་ལེན་བརྗོད་སྐབས་ཁོ་པ་ཚོའི་གནས་སྟངས་རྩད་གཅོད་བྱས། གོ་བརྡ་སྤྲད། གང་ལྟར་ང་ཚོའི་སྤྱི་ཚོགས་འདི་བླ་སློབ་ཀྱི་དམ་ཚིག་མ་ཕྱུག་པ་ཞིག་དང་སྤྱི་ཚོགས་ཀྱི་མཐུན་སྒྲིལ་ལ་མ་གནོད་པ་ཞིག་ཡོང་དགོས་པ་འདི་བོད་མི་ཚང་མས་འགན་འཁྱེར་རྒྱུ་གལ་ཆེན་པོ་རེད། ཅེས་ཞུ་འདོད་བྱུང་།
དེ་བཞིན་སྐབས་ ༡༦ སྤྱི་འཐུས་གྲོས་ཚོགས་ཚོགས་དུས་དང་པོ་ཚུགས་ཚར་བ་དང་སྤྱི་འཐུས་རྣམ་པ་མཚམས་གཟིགས་ལ་ཕེབས་པ་རེད། འཚམས་གཟིགས་ཀྱི་ལས་དོན་རྣམས་ཧ་ཅང་ཚགས་ཚུགས་པོ་བྱུང་ཡོད། ཕྱོགས་གཅིག་ནས་ད་ལྟ་འདིར་གཙོ་སྐྱོང་གནང་མཁན་གང་ཟག་དེ་ལ་སེམས་འཚབ་ཡོང་གི་འདུག ཐག་རིང་པོ་ལ་འགྲོ་དགོས་ཀྱི་ཡོད་པ་དང་རླངས་འཁོར་ནང་འགྲོ་དགོས་ཀྱི་ཡོད་པ་རེད། ལམ་སྡུག་ས་སོགས་མང་པོ་ཞིག་ལ་ཕེབས་དགོས་སྟབས། སྐབས་རེ་བར་ཆད་དེ་འདྲ་ཡོང་མི་སྲིད་པ་མ་རེད་བསམ་པའི་སེམས་འཚབ་དེ་འདྲ་ཡོང་གི་འདུག འོན་ཀྱང་དེ་འདྲ་གང་ཡང་མེད་པའི་ཐོག་ནས་ལས་དོན་ལམ་ལྷོངས་བྱུང་ཐུབ་སོང་། དེ་ཚོ་གྲས་དགའ་སྤོབས་ཞུ་འོས་པ་གཅིག་དང་། མ་འོངས་པ་ཕྱི་ལོ་ ༢༠༡༧ ལོར་སྤྱི་འཐུས་རྣམ་པ་ས་བགོས་ཕྱོགས་བསྐྱོད་ཀྱི་ལས་རིམ་བང་སྒྲིག་ཡོད་པ་རེད། དེ་འདྲའི་ཐོག་ནས་བཙན་བྱོལ་ནང་གི་བོད་མིའི་འཕྲོད་བསྟེན་གྱི་གནས་སྟངས་དང་། དེ་བཞིན་ཤེས་ཡོན་གྱི་གནས་སྟངས་སོགས་གནད་དོན་མང་པོའི་ཐོག་ལ་ཉམས་ཞིབ་དང་། དེ་བཞིན་གནད་དོན་གང་ཡོད་པ་སེལ་ཐུབ་རྒྱུ། ཕྱོགས་གཅིག་ནས་གྲོས་ཚོགས་ཀྱི་ཐོག་ནས་འགན་ཁུར་དགོས་རྒྱུ་དང་།
ཕྱོགས་གཞན་ཞིག་ནས་འཛིན་སྐྱོང་ལ་ཞབས་སྐུལ་ཞུས་པའི་ཐོག་ནས་དེ་ཚོའི་གྲས་འཐུས་ཤོར་མི་འགྲོ་བ་ཞིག་ཡོང་གི་རེད་བསམ་པའི་ཡིད་ཆེས་ཡོད། དེ་བཞིན་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་གསལ་བཤད་ནང་ལ་རིང་མིན་ཉེ་ལམ་༸སྐྱབས་མགོན་རིན་པོ་ཆེ་མཆོག་གིས་འཕྲོད་བསྟེན་དང་ཉམ་ཐག་གི་ཐོག་བཀའ་སློབ་སྩལ་བ་དེའི་ཐད་ཆེས་མཐོའི་ཚོགས་ཆུང་གཉིས་བཙུགས་ཡོད་པ་དེས་ཞིབ་འཇུག་ཚད་དང་ལྡན་པ་ཞིག་གནང་ཡོད་པར་ངོས་འཛིན་ཞུ་བཞིན་ཡོད།
དེ་མཇུག་སྐྱོང་བྱེད་ཕྱོགས་དེ་ཡང་ཚད་དང་ལྡན་པ་ཡོང་རྒྱུར་ད་ལྟ་གཙོ་སྐྱོང་གནང་མཁན་ངོས་ནས་རེ་བ་དང་ཡིད་ཆེས་ཞུ་གི་ཡོད། དེ་བཞིན་གྲོས་ཚོགས་ཀྱི་འཐུས་མི་རྣམ་པས་བཀའ་བློན་གྱི་ལྷན་ཁང་ཁག་གི་ལས་བསྡོམས་ཐོག་དགོངས་འཆར་དང་དྲི་བ་སྟོང་ཕྲག་བརྒལ་བ་དེ་འདྲ་བྱུང་སོང་། དེ་ཚོ་གྲས་ལ་འཛིན་སྐྱོང་གིས་དགོངས་པ་བཞེས་པའི་ཐོག་ནས་མ་འོངས་པར་ལས་དོན་མཇུག་སྐྱོང་བྱེད་དགོས་རྒྱུ་དང་། གསར་གཏོད་བྱེད་དགོས་རྒྱུ། ལས་དོན་གྱི་ཐོག་འཛུགས་སྐྲུན་འཕར་མ་བྱེད་དགོས་པའི་དགོངས་པ་བཅངས་ཡོད་ངེས་རེད། དེ་ཚོ་གྲས་དོན་ཕན་ལྡན་པ་ཞིག་ཡོང་རྒྱུའི་རེ་བ་ཞུ་བཞིན་ཡོད། དེར་བརྟེན་ང་ཚོས་ཉིན་གྲངས་དགུའི་རིང་གྲོས་ཚོགས་ཚོགས་ཏེ་དུས་ཚོད་དང་འགྲོ་སོང་མང་པོ་ཞིག་བཏང་ཡོད་པ་དེ་དག་ཆུད་ཟོས་མ་སོང་བར་ཕྱོགས་ཚང་མས་གནང་ཐུབ་པ་དགོས་རྒྱུ་གལ་ཆེན་པོ་རེད། ཅེས་ཞུ་འདོད་བྱུང་། ཞེས་གསུང་བཤད་གནང་རྗེས་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་རྒྱལ་ཁའི་ངང་མཇུག་སྒྲིལ་གནང་བའི་གསལ་བསྒྲགས་གནང་ཡོད་པ་བཅས།།
