༢༠༡༦ ཟླ་ ༩ ཚེས་ ༣༠ རེས་གཟའ་པ་སངས།
གཞུང་འབྲེལ་གྲོས་ཆོད།
སྔོན་གླེང་།
༄༅། །བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༡༢༠ དང་ ༡༢༡ དགོངས་དོན་ཆེད་འཛུགས་གནང་བའི་མང་ཚོགས་རྩིས་ཁྲའི་ཚོགས་ཆུང་སྐབས་ ༧ པས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༣་་༡༤ གཙོས་རྩིས་སྙན་ཁག་ལ་ཞིབ་འཇུག་ཞུས་པའི་གྲུབ་དོན་སྙན་ཐོ་སྤྱི་འཐུས་སྐབས་ ༡༥ པའི་གྲོས་ཚོགས་ཚོགས་དུས་ ༡༡ པའི་ཐོག་ཕུལ་བ་སྙན་སྒྲོན་དང་འབྲེལ་གྲོས་ཆོད་ཨང་ ༢༠༡༦།༡༥།༡༡།༨ ཡིག་ཆ་ཨང་ ༣༧ འཁོད་པ་སྣོལ་འཇོག་གནང་བའི་འབྲུ་དོན་བཞིན་འཛིན་སྐྱོང་བཀའ་ཤག་གིས་མཇུག་སྐྱོང་ཕྱག་བསྟར་ཇི་གནང་དང་། ལན་འདེབས་གསལ་བཤད་བཅས་ཀྱི་སྙན་ཐོ་ཕྱི་ལོ་ ༢༠༡༦ ཟླ་ ༨ ཚེས་ ༣༠ འཁོད་པ་ཕུལ་འབྱོར་བྱུང་ཡོད་པར་ཞིབ་འཇུག་དང་འབྲེལ་མཇུག་སྐྱོང་གནང་ཕྱོགས་དང་། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༤་་༡༥ ལོའི་རྩིས་ཞིབ་སྙན་ཐོར་ཞིབ་འཇུག་གནང་དགོས་ཆེད་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པ་བསྐོ་འཛུགས་གནང་རྒྱུ་དང་འབྲེལ་བའི་གྲོས་ཆོད་ཅིག་འཇོག་དགོས་སུ་མཐོང་།
གྲོས་ཆོད།
༡། མང་ཚོགས་རྩིས་ཁྲའི་ཚོགས་ཆུང་སྐབས་ ༧ པས་རྩིས་ལོ་ ༢༠༡༣་་༡༤ གཙོས་རྩིས་སྙན་ཁག་ལ་ཞིབ་འཇུག་ཞུས་པའི་གྲུབ་དོན་སྙན་ཐོ་བོད་མི་མང་སྤྱི་འཐུས་སྐབས་ ༡༥ པའི་གྲོས་ཚོགས་ཚོགས་དུས་ ༡༡ པའི་ཐོག་ཡིག་ཆ་ཨང་ ༣༧ པ་སྙན་སྒྲོན་ཟིན་པ་ནང་གསལ་མུ་མཐུད་མཇུག་སྐྱོང་རྩིས་གཙང་དགོས་རིགས་འཛིན་སྐྱོང་བཀའ་ཤག་གིས་མཇུག་སྐྱོང་ལག་བསྟར་ཇི་ཞུས་དང་། ལན་འདེབས་གསལ་བཤད་བཅས་འཁོད་པའི་སྙན་ཐོ་ཤོག་གྲངས་ ༡༢༨ ཅན་ཞིག་ཕུལ་འབྱོར་བྱུང་བ་དེར་སྤྱི་འཐུས་རྒྱུན་ལས་ཀྱིས་བསྐྱར་ཞིབ་དང་འབྲེལ་མཐའ་མའི་གྲུབ་དོན་སྙན་ཐོ་སྤྱི་འཐུས་སྐབས་ ༡༦ པའི་གྲོས་ཚོགས་ཚོགས་དུས་ ༣ པར་འབུལ་དགོས་རྒྱུ།
༢། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༡༢༠ དང་ ༡༢༡ དགོངས་དོན། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༤་་༡༥ ལོའི་རྩིས་ཞིབ་སྙན་ཐོར་ཞིབ་འཇུག་བྱེད་པོའི་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པ་བསྐོ་འཛུགས་གནང་རྒྱུ།
༣། གོང་གསལ་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༤་་༡༥ ལོའི་རྩིས་ཞིབ་སྙན་ཐོར་ཞིབ་འཇུག་གནང་བའི་གྲུབ་དོན་སྙན་ཐོ་སྤྱི་འཐུས་སྐབས་ ༡༦ པའི་གྲོས་ཚོགས་ཚོགས་དུས་ ༤ པར་འབུལ་དགོས་བཅས་ཀྱི་སྤྱི་མོས་སམ་མང་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༦ ཟླ་ ༩ ཚེས་ ༢༩ ལ།
གཞུང་འབྲེལ་གྲོས་ཆོད་འདི་བཞིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༢ པའི་ཐོག་སྤྱི་མོས་ཀྱིས་གཏན་འབེབས་ཞུས། ཕྱི་ལོ་ ༢༠༡༦ ཟླ་ ༩ ཚེས་ ༢༩ ལ།
གཞུང་འབྲེལ་གྲོས་ཆོད།
སྔོན་གླེང་།
༄༅། །ཆེས་མཐོའི་ཁྲིམས་ཞིབ་ཁང་དང་། སྤྱི་འཐུས་ཚོགས་དྲུང་ལས་ཁུངས་ཀྱི་ཐད་བསྐོས་ལས་བྱེད་རྣམས་ལས་བྱེད་འདེམས་བསྐོ་ལྷན་ཁང་ནས་འདེམས་བསྐོ་བྱས་པའི་ལས་བྱེད་སྒྲིག་གྲལ་སྡེ་ཚན་སྤྱིའི་ཁོངས་ཟླ་སྒྲིལ་གཏོང་རྒྱུར་ལས་བྱེད་འདེམས་བསྐོ་ལྷན་ཁང་གི་སྒྲིག་གཞིར་བསྐྱར་བཅོས་ཟིན་པར་བརྟེན། ལས་བྱེད་དེ་རྣམས་ཞབས་ལོ་དང་། རྒན་གཞོན་གྲལ་རིམ་བརྩི་སྟངས་ཐོག་གྲོས་ཆོད་ཅིག་འཇོག་དགོས་སུ་གྱུར།
གྲོས་ཆོད།
ཕྱི་ལོ་ ༢༠༡༦ ཟླ་ ༩ ཚེས་ ༡ གོང་ཁྲིམས་སྒྲིག་དགོངས་དོན་ལྟར་བསྐོ་གཞག་བྱས་པའི་ཆེས་མཐོའི་ཁྲིམས་ཞིབ་ཁང་གི་ཐད་བསྐོས་ལས་བྱེད་ལྔ་དང་། སྤྱི་འཐུས་ཚོགས་དྲུང་ལས་ཁུངས་ཀྱི་ཐད་བསྐོས་ལས་བྱེད་ལྔ་ཡོད་པ་བཅས་ལས་བྱེད་སྒྲིག་གྲལ་སྡེ་ཚན་སྤྱིའི་ཁོངས་ཟླ་སྒྲིལ་བྱེད་སྐབས་ལས་བྱེད་དེ་དག་གི་ཞབས་ལོ་བརྩི་སྟངས་ཐོག་མའི་ཐད་བསྐོས་དུས་ཚེས་ལ་ཚད་འཛིན་དང་། རྒན་གཞོན་གྲལ་རིམ་མཚན་གཞུང་འགོད་སྟངས་ཐད། གནས་རིམ་སོ་སོར་ཐོག་མའི་བསྐོ་ཚེས་ལ་ཚད་བཟུང་གིས་གྲལ་མཚམས་གར་འཁེལ་སོ་སོར་འཇུག་རྒྱུ། གནས་རིམ་དང་ཕོགས་རིམ་གཅིག་གྱུར་རྣམས་ཞབས་བཅར་ཞུ་སྔ་རྟིང་དང་། ཞབས་བཅར་གྱི་ཚེས་ཆ་གཅིག་གྱུར་རྣམས་གནས་རིམ་འོག་མར་སྡོད་སྐབས་ཀྱི་ཞབས་ལོ་རྒན་གཞོན་ལྟར། དེ་ཡང་ཁྱད་པར་མེད་ཚེ་རང་ལོ་རྒན་གཞོན། དེ་ཡང་གཅིག་གྱུར་ཡིན་ཚེ་མིང་ཡིག་དང་པོའི་ཀ་མད་སྔོན་རྗེས་ལྟར་འཇོག་དགོས་པ་བཅས་ཀྱི་སྤྱི་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ནས་ཕྱི་ལོ་ ༢༠༡༦ ཟླ་ ༩ ཚེས་ ༢༩ ལ།།
གཞུང་འབྲེལ་གྲོས་ཆོད་འདི་བཞིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༢ པའི་ཐོག་སྤྱི་མོས་ཀྱིས་གཏན་འབེབས་ཞུས། ཕྱི་ལོ་ ༢༠༡༦ ཟླ་ ༩ ཚེས་ ༢༩ ལ།
གཞུང་འབྲེལ་གྲོས་ཆོད།
སྔོན་གླེང་།
༄༅། །ད་ལམ་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༢ པའི་ཐོག་བཀའ་ཤག་གི་ཆབ་སྲིད་ཀྱི་དོན་གནད་རྣམས་ལ་གསལ་བཤད་གནང་བར་སྤྱི་འཐུས་རྣམ་པས་བགྲོ་གླེང་ཞིབ་ལྷུག་གནང་ཐོག་སླར་ཡང་བཀའ་ཤག་གིས་གསལ་བཤད་འགྲེལ་བརྗོད་གནང་བར་གྲོས་ཆོད་ཅིག་འཇོག་དགོས་སུ་མཐོང་།
གྲོས་ཆོད།
བཀའ་ཤག་གིས་གསལ་བཤད་གནང་བའི་དོན་གནད་རྣམས་སྤྱི་འཐུས་ལྷན་ཚོགས་ཀྱིས་བློ་ངེས་བྱུང་བའི་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༦ ཟླ་ ༩ ཚེས་ ༢༩ ལ།
གོང་གསལ་གྲོས་ཆོད་འདི་བཞིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༢ པའི་ཐོག་ཚད་མཐོའི་མང་མོས་ཀྱིས་གཏན་འབེབས་གནང་། ཕྱི་ལོ་ ༢༠༡༦ ཟླ་ ༩ ཚེས་ ༢༩ ལ།།
