༢༠༡༦ ཟླ་ ༨ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༧ ཚེས་ ༡༣ ནས་ ༡༥ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་རྒྱ་གར་ལྷོ་ཕྱོགས་སྦེང་ལོར་དུ་རྟེན་གཞི་བྱས་པའི་ནི་ལ་མངྒ་ལ་ལས་རིགས་སྦྱོང་བརྡར་བསྟི་གནས་ཁང་དང་འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་གཉིས་ཟུང་འབྲེལ་ཐོག་སྦེང་ལོར་ནི་ལ་མངྒ་ལ་ལས་རིགས་སྦྱོང་བརྡར་བསྟི་གནས་ཁང་དུ་བོད་མིའི་གཞིས་སྒར་ཁག་ ༡༨ ནས་ལས་རིགས་འདྲ་མིན་ཐོག་སློབ་སྦྱོང་གནང་བཞིན་པའི་སློབ་ཕྲུག་ཚོར་འཚེ་མེད་ཞི་བའི་ཐབས་ལམ་སྐོར་ཟབ་སྦྱོང་ཞིག་གོ་སྒྲིག་གནང་འདུག། སྤྱིར་ཐེངས་འདིར་ཟབ་སྦྱོང་དེ་འདྲ་ཞིག་གོ་སྒྲིག་གནང་དགོས་པའི་དམིགས་ཡུལ་ནི་བྱམས་བརྩེ་དང་། འཚེ་མེད་ཞི་བ་བཅས་ཀྱི་ཐབས་ལམ་བརྒྱུད་རྩོད་རྙོག་རྣམས་འདུམ་འགྲིག་ཇི་ལྟར་བྱེད་ཐུབ་མིན་སྐོར་ཡིན་འདུག
དེ་ཡང་སྦེང་ལོར་ནི་ལ་མངྒ་ལ་ལས་རིགས་སྦྱོང་བརྡར་བསྟི་གནས་ཁང་གི་འགན་འཛིན་བསྟན་འཛིན་ཆོས་གྲགས་ལགས་ཀྱིས་ཉིན་གྲངས་གསུམ་རིང་གི་ཟབ་སྦྱོང་དབུ་འབྱེད་དང་སྦྲགས་ཟབ་སྦྱོང་ནང་མཉམ་ཞུགས་གནང་མཁན་རྣམས་ལ་དགའ་བསུའི་འཚམས་འདྲི་གནང་འདུག། འཚེ་མེད་ཞི་བའི་སྦྱོང་བརྡར་བསྟི་གནས་ཁང་དེས་ན་གཞོན་རྣམས་ལ་ཟབ་སྦྱོང་དེ་བརྒྱུད་སོ་སོའི་ཉིན་རེའི་འཚོ་བའི་ནང་སྒེར་དང་སྤྱི་ཚོགས། ལྷག་པར་བོད་མི་ཚོའི་བདེན་པའི་འཐབ་རྩོད་བཅས་ཀྱི་ཁྲོད་འཚེ་བ་མེད་པའི་ལམ་ནས་ ལས་དོན་ནུས་པ་ལྡན་པ་ཞིག་ཇི་ལྟར་སྤེལ་ཐུབ་མིན་དང་། ཟབ་སྦྱོང་སྤྲོད་སྐབས་སློབ་སྟོན་པས་གཏམ་བཤད་གནང་བ་དང་། དངོས་ཡོད་གནས་ཚུལ་བྱུང་བའི་ལོ་རྒྱུས་ཁག་ལ་དཔྱད་བསྡུར། དེ་བཞིན་ཟབ་སྦྱོང་བ་རྣམས་ཚན་པ་སོ་སོར་བགོས་ནས་བགྲོ་གླེང་གནང་བ། གློག་བརྙན་གཟིགས་འབུལ། དུས་ཐུང་གཏམ་བཤད་གནང་བ་སོགས་ཐབས་ལམ་འདྲ་མིན་ཐོག་ནས་ཟབ་ཁྲིད་གནང་ཡོད་འདུག
ཟབ་སྦྱོང་དེ་བཞིན་འཚེ་མེད་ཞི་བའི་སྦྱོང་བརྡར་བསྟི་གནས་ཁང་གི་འགན་འཛིན་དབང་འདུས་ཚེ་རིང་ལགས་དང་ཁོང་གི་ཕྱག་རོགས་ཐུབ་བསྟན་རྒྱལ་མཚན་དང་བསྟན་འཛིན་ལྷ་མོ་ལགས་བཅས་ཀྱིས་མཐུན་འགྱུར་གནང་ཡོད་འདུག་པ་བཅས།།
