༢༠༡༦ ཟླ་ ༨ ཚེས་ ༢༢ རེས་གཟའ་ཟླ་བ།
༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་འཆི་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༦ ཟླ་ ༨ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཀྱི་དད་ལྡན་མང་ཚོགས་ཁྲི་ཚོ་བརྒལ་བར་འཕགས་པ་ཐུགས་རྗེ་ཆེན་པོའི་བཀའ་དབང་སྩལ་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༦།༣༠ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་ཞི་བའི་ཚལ་ཕོ་བྲང་གི་གསུང་ཆོས་རྭ་བའི་ནང་༸ཞབས་སོར་འཁོད་དེ་བཀའ་དབང་གི་སྒྲུབ་བཞག་མཛད། དེ་ནས་ཆུ་ཚོད་ ༨།༠༠ ཐོག་དབང་དངོས་གཞི་དབུ་འཛུགས་མཛད་སྐབས་༸གོང་ས་མཆོག་གིས་འཕགས་པ་ཐུགས་རྗེ་ཆེན་པོའི་བཀའ་དབང་འདི་བཞིན་གསང་སྔགས་རྡོ་རྗེ་ཐེག་པའི་ཆོས་སྐོར་ཞིབ་ཕྲ་ངོ་སྤྲོད་མཛད་པ་དང་། ལོ་རྒྱུས་ཐོག་བོད་གངས་ཅན་ལྗོངས་ཀྱི་གདུལ་བྱ་དང་དེ་བཞིན་ཧི་མཱ་ལ་ཡའི་རི་རྒྱུད་ཀྱི་མི་རིགས་ཚོ་འཕགས་པ་སྤྱན་རས་གཟིགས་དང་མཐུན་མོང་མ་ཡིན་པའི་འབྲེལ་བ་ཞིག་ཡོད་སྟབས། ཐབས་ཤེས་ཟུང་འབྲེལ་ཐོག་བྱང་ཆུབ་ཀྱི་སེམས་སྒོམ་རྒྱུ་དེ་གལ་ཆེན་པོ་རེད་ཅེས་སོགས་ཀྱི་བཀའ་སློབ་སྩལ།
དེ་བཞིན་བཀའ་དབང་སྩལ་སྒྲུབ་རྗེས། མགོན་པོ་མཆོག་གིས་མང་ཚོགས་ལ་ཆོས་ཀྱི་སྙིང་པོ་དེ་སེམས་བཟང་པོ་དང་། དྲང་པོ། དེ་བཞིན་གཞན་ལ་རོགས་པ་བྱ་རྒྱུ་ཡིན་ཞེས་དང་། ཆང་རག་སྤོང་དགོས་པ་དང་རང་ལས་དམན་པ་ལ་བྱམས་བརྩེ་དགོས་པ། དེ་བཞིན་ས་གནས་སུ་རྩི་ཤིང་འདེབས་འཛུགས་གང་མང་བྱེད་པ་བརྒྱུད་ཁོར་ཡུག་སྲུང་སྐྱོབ་བྱ་དགོས་པ་སོགས་བཀའ་སྩལ་ཡོད། སྐབས་དེར་ཆོས་ཞུ་བ་སེར་སྐྱ་མང་ཚོགས་ཁྲི་ཁ་ཤས་བཅར་ཡོད་པ་བཅས།།
