༢༠༡༦ ཟླ་ ༧ ཚེས་ ༢ རེས་གཟའ་མིག་དམར།

༄༅། །ཕྱི་ལོ་ ༢༠༡༦ ཟླ་ ༧ ཚེས་ ༢༩ ཉིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩས་གོ་སྒྲིག་འོག་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་། དེ་བཞིན་དགོན་སྡེ་ཁག་དང་དེབ་སྐྱེལ་ཡོད་པའི་གཞུང་འབྲེལ་མིན་པའི་ཚོགས་པ་ཁག་གི་རྩིས་པ་བཅས་ལ་ཕྱི་དངུལ་ལེན་བེད་སྒྲིག་གཞི་དང་འབབ་ཁྲལ་ཁྲིམས་སྒྲིག་ཟབ་སྦྱོང་ཞིག་གནང་ཡོད་པ་དང་།

སྐབས་དེར་དཔལ་འབྱོར་ལས་ཁུངས་ཀྱི་དྲུང་གཞོན་བསྟན་འཛིན་དགའ་ལྡན་ལགས་ཀྱིས་ཚོགས་པ་དེབ་སྐྱེལ་བྱ་ཕྱོགས་ཀྱི་ཁྲིམས་སྒྲིག་དང་། འབབ་ཁྲལ་གྱི་ཁྲིམས་སྒྲིག ཕྱི་དངུལ་ལེན་བེད་སྒྲིག་གཞི་བཅས་ཀྱི་སྐོར་ཟབ་ཁྲིད་གནང་འདུག   ཟབ་སྦྱོང་གི་དམིགས་ཡུལ་གཙོ་བོ་ནི་རྩིས་པ་རྣམས་ལ་ཕྱི་དངུལ་ལེན་བེད་སྒྲིག་གཞི་དང་འབབ་ཁྲལ་ཁྲིམས་སྒྲིག་བསྐྱར་བཅོས་ཕྱིན་པ་རྣམས་ཀྱི་སྐོར་གོ་རྟོགས་སྤེལ་ཆེད་རེད་འདུག

དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་ཟབ་སྦྱོང་དབུ་འབྱེད་དང་བསྟུན་ཟབ་སྦྱོང་ནང་མཉམ་ཞུགས་གནང་མཁན་ཡོངས་ལ་རྩིས་པས་ཡུལ་ཁྲིམས་དང་བོད་མིའི་སྒྲིག་འཛུགས་ཀྱི་ཁྲིམས་ལུགས་གཞིར་བཟུང་རྩིས་ཁྲ་ཁག་ཁ་གསལ་ཉར་དགོས་པ་སོགས་ཀྱི་སྐོར་གསུང་བཤད་གནང་འདུག

བོད་མིའི་སྒྲིག་འཛུགས་སྤྱི་ཚོགས་ཡར་རྒྱས་ཐེབས་རྩའི་དྲུང་ཆེ་དངོས་གྲུབ་རྡོ་རྗེ་ལགས་ཀྱིས་འཇུག་བསྡོམས་གསུང་བཤད་གནང་སྐབས་ཟབ་སྦྱོང་ཐོག་ཁྲིད་པའི་བརྗོད་གཞི་ཁག་ལ་ནང་སྦྱོང་གནང་ནས་ལག་བསྟར་དོན་འཁྱོལ་ཡོང་ཐུབ་པ་གནང་གལ་ཆེ་སྐོར་གསུངས།  ཐེངས་འདིའི་ཟབ་སྦྱོང་འདི་བཞིན་ཨ་རི་གཞུང་གི་པི་ཨར་ཨེམ་PRM རོགས་ཚོགས་ཀྱིས་མཐུན་འགྱུར་གནང་བ་ཞིག་ཡིན་འདུག་པ་བཅས། །