༢༠༡༦ ཟླ་ ༨ ཚེས་ ༡༦ རེས་གཟའ་མིག་དམར།
༄༅། །ཕྱི་ལོ་ ༢༠༡༦ ཟླ་ ༨ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ས་རཱ་མཐོ་སློབ་དབུ་བརྙེས་ནས་ལོ་ ༡༨ འཁོར་བའི་མཛད་སྒོའི་སྐུ་མགྲོན་གཙོ་བོར་གདན་ཞུས་ལྟར་ཆེད་ཕེབས་ཀྱིས་གསུང་བཤད་གནང་ཡོད། དེ་ཡང་བཀའ་བློན་མཆོག་ས་རཱ་མཐོ་སློབ་ཏུ་ཕེབས་འབྱོར་སྐབས་རྡ་ས་རིགས་ལམ་སློབ་གཉེར་ཁང་གི་སྤྱི་ཁྱབ་འགན་འཛིན་དང་སྤྱི་ཟུར་དགེ་བཤེས་སྐལ་བཟང་དགྲ་འདུལ་ལགས་དང་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་རྣམ་གཉིས་ཀྱིས་ཕེབས་བསུའི་སྣེ་ལེན་ཞུས་འདུག མཛད་སྒོ་དབུ་འཛུགས་ཀྱིས་ཐོག་མར་སློབ་ཕྲུག་རྣམས་ཀྱིས་ཤིས་བརྗོད་གསུང་འདོན་གནང་རྗེས་གསོལ་ཇ་འབྲས་སིལ་ཕུལ། དེ་རྗེས་སློབ་སྤྱི་པ་སངས་ལགས་ཀྱིས་དུས་ཆེན་ངོ་སྤྲོད་གནང་བ་དང་ལྷན་མཐོ་སློབ་ཀྱི་ལས་བསྡོམས་སྒྲོགས་སྦྱང་གནང་། དེ་ནས་སྤྱི་ཟུར་དགེ་བཤེས་སྐལ་བཟང་དགྲ་འདུལ་ལགས་ཀྱིས་གསུང་བཤད་གནང་གྲུབ་བསྟུན། ཆོས་རིག་བཀའ་བློན་མཆོག་གིས་ཕྱི་ལོ་ ༢༠༡༥ ལོའི་ལོ་འཁོར་ཡིག་རྒྱུགས་ནང་ཨང་རིམ་རྩེ་སོན་བྱུང་བའི་སློབ་མ་རྣམས་ལ་བྱ་དགའ་གནང་རྗེས་སློབ་ཕྲུག་རྣམས་ལ་ལམ་སྟོན་གསུང་བཤད་གནང་ཡོད།
སྐབས་དེར་བཀའ་བློན་མཆོག་གིས་བོད་ཀྱི་རིག་གནས་སྤྱི་དང་ལྷག་པར་བོད་ཡིག་གི་གལ་གནད་སྐོར་ཙམ་མ་ཟད། བོད་ཀྱི་ནང་ཆོས་ཞིབ་ཕྲ་ཤེས་པར་བོད་ཡིག་ཤེས་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་དང་། དེ་བཞིན་བཀའ་བློན་མཆོག་གིས་སློབ་ཕྲུག་ཚོར་སློབ་སྦྱོང་བྱེད་རྒྱུའི་འགན་འཁྲི་ཡོད་པ་ཙམ་མ་ཟད། བོད་པའི་ཐུན་མིན་སྐད་ཡིག་སྲུང་སྐྱོབ་བྱེད་པའི་ཐོག་བཟང་སྤྱོད་ཀྱི་རིན་ཐང་མི་ཉམས་རྒྱུན་འཛིན་གནང་རྒྱུའི་འགན་འཁྲི་ཡོད་སྐོར་སོགས་གསུངས་འདུག །
