༢༠༡༦ ཟླ་ ༨ ཚེས་ ༡༦ རེས་གཟའ་མིག་དམར།
༄༅། །ཕྱི་ལོ་ ༢༠༡༦ ཟླ་ ༨ ཚེས་ ༡༢ ཉིན་༸གོང་ས་མཆོག་གིས་སྔ་དྲོ་ཆུ་ཚོད་ ༨།༥༠ ཐོག་ལ་དྭགས་ཁྲིག་རྩེ་གྲོང་གསེབ་ཀྱི་བཞུགས་གནས་མགྲོན་ཁང་ནས་ཆིབས་སྒྱུར་གྱིས་གྲོང་གསེབ་དེའི་དགོན་པ་གསར་པ་ཞིག་དབུ་འབྱེད་མཛད་རྗེས་བཙུན་དགོན་དགའ་ལྡན་བཤད་སྒྲུབ་ཆེད་གཉེར་གླིང་དུ་ཆིབས་སྒྱུར་བསྐྱངས་ནས་བཀའ་སློབ་སྩལ། དེ་ཉིན་གྱི་ཉིན་དགུང་ལྗགས་སྨིན་གྲུབ་བསྟུན་མགོན་པོ་གང་ཉིད་མཆོག་ཁྲིག་རྩེ་ནས་རྒྱང་ཐག་སྤྱི་ལེ་ ༢ ཙམ་གྱི་སར་ཡོད་པའི་ཤེལ་གྲོང་གསེབ་ཀྱི་ལམ་སྒྲོན་སློབ་གྲྭར་ཆིབས་སྒྱུར་བཀའ་དྲིན་བསྐྱངས་ཏེ། སློབ་གྲྭའི་དགེ་ལས་སློབ་མ་དང་ཁུལ་དེའི་མང་ཚོགས་བཅས་ཁྱོན་མི་གྲངས་ ༣༠༠ ལྷག་ལ་བཀའ་སློབ་སྩལ་དོན།
ས་གནས་འདི་ལམ་སྒྲོན་སློབ་གྲྭའི་ཡན་ལག་ཆགས་ཡོད། ཡན་ལག་སློབ་གྲྭའི་སློབ་ཕྲུག་ཚོ་དང་། དགེ་རྒན་རྣམ་པ། གཙོ་བོ་འཁུར་བཞེས་མཁན་དང་ཁྱེད་རང་ཚོ་ཚང་མར་ངོས་རང་དེ་རིང་འདིར་ཁྱུག་ཙམ་སླེབ་ཐུབ་པར་ཧ་ཅང་དགའ་པོ་བྱུང་། ངོས་རང་སློབ་ཕྲུག་ཐུག་རྒྱུར་ཧ་ཅང་དགའ་པོ་ཡོད། སློབ་ཕྲུག་དང་མཉམ་དུ་དུས་ཡུན་ཕྲན་བུ་གཏོང་སྐབས་ངོས་རང་ཡང་ལོ་གཞོན་དུ་འགྲོ་བའི་སྣང་བ་འཆར་ཡོང་གི་འདུག གཉིས་ནས་དུས་ཚོད་ནི་ཙོག་གེར་རྩ་བ་ཉིད་ནས་སྡོད་ཀྱི་མ་རེད། ག་དུས་ཡིན་ནའང་འགྲོ་གི་རེད། དེར་བརྟེན་དུས་ཚོད་རྟག་ཏུ་འགྲོ་བཞིན་པ་འདིའི་འདས་པ་ལ་བཅོས་རྒྱུ་མེད། བཅོས་རྒྱུ་ཡོད་པ་ནི་མ་འོངས་པ་རེད། ད་ཆ་དུས་རབས་ཉི་ཤུ་རྩ་གཅིག་སྟེང་སླེབ་ཡོད། དུས་རབས་ཉི་ཤུ་རྩ་གཅིག་གི་ཕྱི་ལོ་ ༢༠༡༦ སྟེ་ལོ་བཅུ་དྲུག་རྫོགས་འགྲོ་གི་ཡོད། ལོ་བརྒྱའི་ལོ་འཕྲོས་གཞི་ནས་ཡོང་རྒྱུ་ཡིན་སྟབས། མ་འོངས་པ་དེ་གཞོན་སྐྱེས་ཁྱེད་རང་ཚོའི་ལག་ཏུ་ཡོད་པར་བརྟེན། གཞོན་སྐྱེས་ཁྱེད་རང་ཚོའི་ཤེས་ཡོན་ནི་ཧ་ཅང་གལ་ཆེན་པོ་རེད་འདུག དེང་དུས་ཀྱི་ཤེས་ཡོན་ནི་ལུང་པ་དང་སྤྱི་ཚོགས་ཡར་རྒྱས་འགྲོ་རྒྱུར་ཧ་ཅང་དགོས་མཁོ་ཆེན་པོ་རེད། དེ་དང་ཆབས་ཅིག་དངོས་པོ་ཡར་རྒྱས་ཁོ་ནའི་བདེ་སྐྱེད་ཡོང་གི་རེད་དམ་ཞེ་ན། དེ་ཡོང་རྒྱུ་ཧ་ཅང་ཁག་པོ་རེད།
ང་རང་ཚོ་མི་ལ་ཕྱི་ལུས་དང་། ནང་གི་རྣམ་པར་ཤེས་པ་དེ་དང་འབྲེལ་བའི་ཚོར་བ་བདེ་སྡུག་ཡོད། དེར་བརྟེན་དངོས་པོ་ཡར་རྒྱས་ཀྱི་ལུས་བདེ་པོ་ཡོང་ཐུབ་ཀྱི་ཡོད། ནང་སེམས་ཀྱི་ཞི་བདེ་ཡོང་རྒྱུ་དང་སེམས་ལ་དངོས་འབྲེལ་དགའ་བདེ་ཡོང་རྒྱུའི་རྐྱེན་ནི་ད་ལྟ་ཡོད་བཞིན་པའི་དེང་དུས་ཀྱི་ཤེས་ཡོན་ཁོ་ནའི་ཡོང་ཐུབ་ཀྱི་མེད། ནང་སེམས་ཀྱི་བདེ་སྐྱིད་ཡོང་རྒྱུའི་རྩ་བ་ནི་སེམས་པ་བཟང་པོ་བྱ་རྒྱུ་དེ་རེད་འདུག སེམས་པ་བཟང་པོ་ཟེར་རྒྱུ་ནི་གཞན་ལ་བརྩེ་བ་ཡོད་ན། སེམས་པ་བཟང་པོ་ཡོང་གི་རེད། འཛམ་གླིང་འདིའི་སྟེང་ཆོས་མེད་མཁན་གྱི་མི་ཚོའི་ནང་དུའང་དེང་སྐབས་སེམས་པ་བཟང་པོ་དགོས་ཀྱི་འདུག སེམས་ཞི་བདེ་ཡོང་བར་སེམས་པ་བཟང་པོ་དགོས་ཀྱི་འདུག ཅེས་འཛམ་གླིང་གང་སར་མཐོང་ཚུལ་འདི་ཤུགས་ཆེན་པོ་ཡོང་གི་ཡོད། ཚན་རིག་པའི་ནང་ནས་མཐོང་ཚུལ་འདི་ཤུགས་ཆེ་རུ་འགྲོ་བཞིན་འདུག སེམས་བཟང་པོ་ཡོང་བར་འཛམ་གླིང་འདིའི་སྟེང་ཡོད་པའི་ཆོས་ལུགས་ཚང་མས་བྱམས་པ་དང་སྙིང་རྗེ་དགོས་རེད། ཅེས་སེམས་བཟང་པོ་ཡོང་བར་ཆོས་ལུགས་ཚང་མས་དམིགས་ཡུལ་འདི་བཟུང་གི་ཡོད། སངས་རྒྱས་པའི་ཆོས་ཀྱིས་སེམས་བཟང་པོ་དགོས་རྒྱུའི་བསླབ་བྱ་གཅིག་གྱུར་ལ་སེམས་བཟང་པོ་བཟོ་སྟངས་ནི་སྨོན་ལམ་རྒྱག་ནས་སེམས་བཟང་པོ་བཟོ་རྒྱུ་མིན་པར་སོ་སོས་ཉམས་ལེན་བྱེད་པ་དང་། ཉམས་ལེན་བྱེད་རྒྱུ་དེ་ཡང་དད་པ་ཁོ་ན་མིན་པར་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་དཔྱད་ནས་འཕྲལ་དང་ཕུགས། རང་དང་གཞན་གྱི་ཁེ་ཕན་དེ་དག་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་དཔྱད་ནས་སེམས་བཟང་པོ་ཟེར་རྒྱུ་དེ་ལ་ཡོན་ཏན་ཡོད་པ་ཞིག་མཐོང་། ཁོང་ཁྲོ་དང་ཕྲག་དོག་ཟེར་རྒྱུ་དེ་ཚོ་གྲས་ཀྱིས་སྐྱོན་ཡོང་གི་ཡོད་པ་མཐོང་སྟེ་སེམས་བཟང་པོའི་ཕྱོགས་སུ་དང་དོད་བྱས་ནས་དེ་ལྟར་འགྲོ་རྒྱུར་སྤྱིར་སངས་རྒྱས་པའི་ཆོས། ཡང་སྒོས་དཔལ་ནཱ་ལེནྡྲའི་ཆོས་བརྒྱུད་ནི་ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་སེམས་བཟང་དུ་སྤྱད་རྒྱུ་ཆགས་ཀྱི་ཡོད་སྟབས། སངས་རྒྱས་པའི་ཆོས་སྤྱི་དང་།
ལྷག་པར་དཔལ་ནཱ་ལེནྡྲའི་ཆོས་བརྒྱུད་ནི་ཕལ་ཆེར་ལྟ་གྲུབ་སྨྲ་བ་གཙོ་བོ་རེད་འདུག ཆོས་དད་ཁོ་ན་མིན་པར་ལྟ་གྲུབ་ཧ་ཅང་གལ་ཆེན་པོ་རྩི་གི་ཡོད། དེར་བརྟེན་ངོས་ཀྱིས་ཁྱེད་རང་ཚོ་སློབ་གྲྭའི་ཆོས་དགེ་དེ་དག་རྒྱ་གར་རྒྱ་ཐང་དུ་ཡོད་པའི་བོད་མི་བཙན་བྱོལ་བའི་སློབ་གྲྭའི་ཆོས་དགེ་དེ་དག་ལ་སྔ་མོ་ཆོས་དགེ་ཟེར་གྱི་ཡོད། བར་སྐབས་ནས་མིང་བསྒྱུར་ནས་ལྟ་གྲུབ་སློབ་དཔོན་ཞེས་མིང་བཏགས་ཡོད། འདིར་ཁྱེད་རང་ཚོར་སློབ་གྲྭའི་དྲན་རྟེན་ཆེད་ངོས་ཀྱི་པར་གྱི་ཐོག་ས་ཡིག་བརྒྱབ་རོགས་ཞེས་བརྗོད་བྱུང་། ངོས་ཀྱིས་ནམ་རྒྱུན་ཤཱཀྱའི་དགེ་སློང་ཆོས་སྨྲ་བ་ཟེར་གྱི་ཡོད། དེ་རིང་ཤཱཀྱའི་དགེ་སློང་ལྟ་གྲུབ་སྨྲ་བ་ཞེས་བརྒྱབ་པ་ཡིན། ཤཱཀྱའི་དགེ་སློང་ལྟ་གྲུབ་སྨྲ་བ་ཟེར་དུས་ངོས་རང་དགེ་བཤེས་ཡིན་ཟེར་གྱི་ཡོད། ལྟ་གྲུབ་སློབ་དཔོན་ཞེས་པའི་མིང་ཡོད་མཁན་ཞིག་དགེ་རྒན་ཡིན་དུས་ཁྱེད་རང་ཚོ་ལྟ་གྲུབ་སློབ་མཁན་གྱི་སློབ་ཕྲུག་ཟེར་དགོས་རེད། དཔེར་ན། ངོས་རང་ཆ་བཞག་ན། ཨིན་ཇི་ཐེབས་ཆག་ཅིག་ཤེས་པ་མ་གཏོགས་དེང་དུས་ཀྱི་ཤེས་ཡོན་ཤེས་ཀྱི་མེད། ངོས་རང་དེང་དུས་སློབ་གྲྭའི་འཛིན་གྲྭར་ཐེངས་གཅིག་ཀྱང་འགྲོ་མྱོང་མེད། དེ་བཞིན་ཚན་རིག་ལ་ཆ་བཞག་ན། ཆེད་དུ་གཉེར་ནས་སློབ་སྦྱོང་བྱས་མེད།
འོན་ཀྱང་འདས་པའི་ལོ་སུམ་ཅུ་ལྷག་ཙམ་རིང་ནས་ཤེས་ཡོན་ཅན་གྱི་མཁས་པ་མང་པོ་ཐུག་མྱོང་ཡོད། མཁས་པ་དང་ཚན་རིག་པ་མང་པོས་ངོས་རང་འབོད་བཞིན་ཡོད། ང་ཚོ་མཉམ་དུ་སྐད་ཆ་ཤོད་སྐབས་ངོས་ལ་དེང་དུས་ཀྱི་ཤེས་ཡོན་དང་ཚན་རིག་སློབ་སྦྱོང་མེད་ཀྱང་མཉམ་དུ་སྡོད་སྐབས་འདྲ་འདྲ་ཆགས་ཐུབ་ཀྱི་ཡོད། དེ་ནི་གཙོ་བོ་ནཱ་ལེནྡྲའི་ལྟ་གྲུབ་དེ་དག་ལ་སློབ་སྦྱོང་ཕྲན་བུ་བྱས་པར་བརྟེན་སུ་དང་སྐད་ཆ་བཤད་པ་དང་གོ་བསྡུར་གང་འདྲ་ཞིག་བྱས་ཀྱང་འདྲ་འདྲ་ཡོང་ཐུབ་རྒྱུ་ཞིག་དང་སྐབས་རེ་ལྷག་པ་ཆགས་ཀྱི་འདུག ང་ཚོར་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ལྷག་ཙམ་ཡོད་པ་དེའི་བརྗོད་བྱ་དེ་དུམ་བུ་གསུམ་དུ་ཕྱེ་ཐུབ་ཀྱི་ཡོད། ཚན་རིག་དང་། ལྟ་གུབ། ནང་ཆོས་ཀྱི་སྡེ་ཚན་བཅས་སྡེ་ཚན་གསུམ་དུ་ཕྱེ་ཡོད། དེར་བརྟེན་བཀའ་འགྱུར་བསྟན་འགྱུར་ནང་ཡོད་པའི་ཚན་རིག་དང་ལྟ་གྲུབ་ཀྱི་སྐོར་དེ་དག་འཇིག་རྟེན་ཀུན་ལ་ཕན་ཐོགས་པ་ཞིག་དང་ཐུན་མོང་ལ་འགྲོ་ཐུབ་རྒྱུ་ཞིག་ཡོད། དེར་བརྟེན་ཁྱེད་རང་ཚོས་སློབ་སྦྱོང་བྱ་རྒྱུ་དེ་ཆོས་དང་འཇིག་རྟེན་གང་གི་ཆ་ནས་སློབ་སྦྱོང་ནི་ཧ་ཅང་གལ་ཆེན་པོ་ཡིན་པ་ངོས་འཛིན་བྱས་པའི་ཐོག་ཁྱེད་རང་ཚོས་སློབ་སྦྱོང་ཧུར་ཐག་འབད་ཐག་བྱོས་ཨང་། ཐུགས་རྗེ་ཆེ། ཞེས་བཀའ་སློབ་སྩལ་ཡོད།།
