༢༠༡༦ ཟླ་ ༨ ཚེས་ ༡༩་རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་འཆི་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༦ ཟླ་ ༨ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ནང་པའི་ཚོགས་འདུས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། བཀའ་བཞེས་བཟང་པོ་སྨིན་སྩལ་ཐོབ་སྟེ་ལ་དྭགས་པ་གཙོ་བོར་གྱུར་པའི་བོད་མི་དང་། གཞན་ཡང་ཕྱི་རྒྱལ་བ་བཅས་དད་ལྡན་ཆོས་ཞུས་བ་ཆིག་ཁྲི་བརྒལ་བར་ཉིན་བཞིའི་སྤྱོད་འཇུག་ཆེན་མོའི་ཆོས་འབྲེལ་དབུ་འཛུགས་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཞི་བའི་ཚལ་ཕོ་བྲང་གི་གསུང་ཆོས་རྭ་བའི་ནང་༸ཞབས་སོར་འཁོད་སྐབས། དད་ལྡན་མང་ཚོགས་ཆིག་ཁྲི་བརྒལ་བས་ལག་ཏུ་དཀར་གཙང་མཇལ་དར་ཐོགས་ཏེ་དགའ་དད་སྤྲོ་གསུམ་ངང་ཕེབས་བསུ་ཞུས་སོང་། དེ་ནས་བཞུགས་ཁྲི་རིན་པོ་ཆེར་༸ཞབས་སོར་འཁོད་མཚམས་ལ་དྭགས་ནང་པའི་ཚོགས་འདུའི་ཚོགས་གཙོས་མགོན་པོ་གང་ཉིད་མཆོག་ལ་མཎྜལ་རྟེན་གསུམ་འདེགས་འབུལ་ཞུས་རྗེས་ལ་དྭགས་ཨ་མ་ཚོགས་པ་དང་ལ་དྭགས་གཞོན་ནུ་ཚོགས་པ་ལ་སོགས་པའི་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ་ཚོར་མཇལ་ཁ་སྩལ། དེ་ནས་སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་གིས་དབུས། ཁྲིག་རྩེ་མཁན་རིན་པོ་ཆེ་དང་བ་ཀུ་ལ་མཆོག་སྤྲུལ་རིན་པོ་ཆེ། དགོན་སྡེ་ཁག་གི་མཁན་བླ་སྤྲུལ་རྣམ་པ། ས་གནས་ཀྱི་དཔོན་རིགས་ཁག་གཅིག དེ་བཞིན་གྲྭ་བཙུན་སྔགས་གསུམ་གྱི་སྡེ། སློབ་ཕྲུག་དང་སེར་སྐྱ་མང་ཚོགས་རྣམས་ནས་རྒྱུན་ཕྱག་གསུམ་པ་གསུང་འདོན་གནང་གྲུབ་མཚམས།
༸གོང་ས་མཆོག་གིས་ནང་པ་སངས་རྒྱས་པའི་ཆོས་ལ་དད་པ་ཡོད་མཁན་ཚོས་ཆོས་ཀྱི་ངོ་བོ་དང་ཁྱད་པར་ཤེས་དགོས་རྒྱུ་གལ་ཆེན་པོ་ཡིན་སྐོར་བཀའ་སློབ་ཕེབས་དོན། ཆོས་ལ་དད་པ་ཡོད་མཁན་ཚོས་སངས་རྒྱས་པའི་ཆོས་དེ་གང་འདྲ་ཡིན་པ་ཤེས་དགོས་རྒྱུ་ཧ་ཅང་གལ་ཆེན་པོ་རེད། ཆོས་ལ་དད་པ་ཡོད་ཀྱང་སངས་རྒྱས་པའི་ཆོས་ཀྱི་ངོ་བོ་དང་ཁྱད་པར་གང་དང་གང་ཡོད་པ་མ་ཤེས་ན། དད་པ་དེ་ཡང་ལམ་དང་ལུགས་སྲོལ་ལྟ་བུ་ཆགས་འགྲོ་གི་ཡོད། ང་ཚོའི་ཕ་མེས་དང་སྤྱི་ཚོགས་ནང་པ་ཡིན་ཟེར་རྒྱུ་ཞིག་མ་གཏོགས་མེད། དེར་བརྟེན་སངས་རྒྱས་པའི་ཆོས་ཀྱི་ངོ་བོ་དང་ཁྱད་པར་ཤེས་དགོས་རྒྱུ་ཧ་ཅང་གལ་ཆེན་པོ་རེད། ཁ་རི་ཁ་ཐུག་ཟོལ་མེད་བྱས་ཏེ་བཤད་ན། དེ་སྔ་བོད་ལ་ཡིན་ན་མང་ཚོགས་ཀྱིས་ཆོས་དེ་ཙམ་ཤེས་ཀྱི་མེད། དད་པ་བྱས་ནས་འགྲོ་གི་ཡོད། ད་ང་ཚོ་དུས་རབས་ ༢༡ ནང་སླེབས་ཡོད། ང་ཚོས་ཆོས་དེ་ལམ་དང་ལུགས་སྲོལ་ལྟ་བུའི་ཐོག་ཕྱིན་ན་དུས་རབས་ ༢༡ དང་མཐུན་པ་ཞིག་བྱུང་མེད། དེར་བརྟེན་སངས་རྒྱས་པའི་ཆོས་དེ་གང་འདྲ་ཡིན་པ་ཤེས་པར་བྱས་ཏེ་དེ་ལྟ་བུའི་ཐོག་ནས་སོ་སོས་བསམ་བློ་ཡག་པོ་བཏང་ནས་བརྟག་དཔྱད་ཡག་པོ་བྱས་རྗེས། སངས་རྒྱས་པའི་ཆོས་དེ་ཕན་ཐོགས་འདུག་ན་ཉམས་སུ་བླངས། ཕན་ཐོགས་མེད་ན་གཡུག་ཤོག དེ་སོ་སོའི་རང་དབང་རེད། ཁྲལ་དང་ཁྲིམས་ཀྱི་བཟོ་འདྲ་འཁྱེར་དགོས་མེད། དེར་བརྟེན་ངས་ཆོས་འབྲེལ་བྱེད་སྐབས་ག་དུས་ཡིན་ནའང་ནང་ཆོས་ངོ་སྤྲོད་དང་འགྲེལ་བཤད་རྒྱག་རྒྱུ་དེ་ཧ་ཅང་གལ་ཆེན་པོ་མཐོང་གི་འདུག ཅེས་སོགས་ཀྱི་བཀའ་སློབ་སྩལ། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་སྐྱབས་འགྲོ་སེམས་བསྐྱེད་དང་ནང་ཆོས་ངོ་སྤྲོད་མཛད་ཡོད་པ་དང་། སང་ཉིན་ནས་ཤེས་རབ་སྙིང་པོའི་ལུང་སྩལ་རྒྱུ་དང་དེ་རྗེས་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ཆོས་འབྲེལ་དབུ་འཛུགས་མཛད་རྒྱུ་ཡིན་སྐོར་བཀའ་སློབ་ཕེབས་སོང་།
