༢༠༡༦ ཟླ་ ༨ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༨ ཚེས་ ༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ཞིང་གཤེགས་དམ་པའི་ཚ་མོ་ཉི་མ་ལྷ་མོ་ལགས་དང་མཇལ་འཕྲད་གནང་ཡོད། ཉི་མ་ལྷ་མོ་ལགས་ནི་ཕྱི་ལོ་ ༢༠༡༥ ཟླ་ ༧ ནང་རྒྱ་ནག་གི་བཙོན་ཁང་ནང་གློ་བུར་དུ་སྐུ་གཤེགས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཡིན་ཞིང་། ཕྱི་ལོ་ ༢༠༡༦ ཟླ་ ༧ ཚེས་ ༢༤ ཉིན་བོད་ནས་བྲོས་བྱོལ་ལ་ཕེབས་ནས་བཞུགས་སྒར་དུ་འབྱོར་ཡོད་འདུག
དེ་ཡང་སྲིད་སྐྱོང་མཆོག་དང་ཐུག་འཕྲད་སྐབས་བོད་ནང་གི་ཆབ་སྲིད་དང་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་། ལྷག་པར་བོད་མི་ཆབ་སྲིད་བཙོན་པ་རྣམས་ཀྱི་གནས་སྟངས་སྐོར་གླེང་མོལ་གནང་ཡོད་འདུག སྐབས་དེར་ཉི་མ་ལྷ་མོ་ལགས་ཀྱིས་རིན་པོ་ཆེ་སྐུ་མ་གཤེགས་གོང་དང་སྐུ་གཤེགས་རྗེས་ཀྱི་གནས་སྟངས། རིན་པོ་ཆེའི་ནང་མི་ཉེ་འབྲེལ་སོགས་ལ་དཀའ་ངལ་ཇི་འཕྲད་སྐོར་སྲིད་སྐྱོང་མཆོག་ལ་ཞུས་འདུག
དེ་ཡང་ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ཞིང་གཤེགས་དམ་པ་ནི་ཕྱི་ལོ་ ༢༠༡༥ ཟླ་ ༧ ཚེས་ ༡༢ ཉིན་ཁྲེན་ཏུར་རྒྱའི་བཙོན་ཁང་ནང་གློ་བུར་དུ་དགོངས་པ་རྫོགས་པའི་གནས་ཚུལ་ཐོན་ཡོད། ཁོང་ལ་སི་ཁྲོན་ཞིང་ཆེན་གྱི་ལྟེ་གནས་གྲོང་ཁྱེར་ཁྲིན་ཏུའི་ཐན་ཕུ་ཐང་ཆེན་དུ་འབར་རྫས་གས་འཐོར་བྱས་པའི་ཉེས་མིང་འོག་འཛིན་བཟུང་བྱས་ཡོད་པ་བཅས།།
