༢༠༡༦ ཟླ་ ༨ ཚེས་ ༡༡ རེས་གཟའ་ཕུར་བུ།

༄༅། །ཕྱི་ལོ་ ༢༠༡༦ ཟླ་ ༧ ཚེས་ ༣༡ ཉིན་རྒྱ་གར་ལྷོ་ཕྱོགས་ཀེ་ར་ལ་མངའ་སྡེའི་གྲོང་ཁྱེར་ཀ་ལི་ཀཊ་ Calicut ས་གནས་སུ་ཧིན་བོད་མཛའ་འབྲེལ་ཚོགས་པའི་ཡན་ལག་ལས་ཁུངས་ཤིག་གསར་འཛུགས་གནང་འདུག  དེ་ཡང་ཀ་ལི་ཀཊ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་གསར་པ་སྐུ་ཞབས་ཨ་ནུབ་ཨ་ནནྡཱ་ཡོ་གི་ Dr. Anoope Anandayogi ལགས་ཀྱིས་གོ་སྒྲིག་འོག Anandaveda Traditional Ayurveda ཞེས་པའི་རྒྱ་གར་ཚེ་ཡི་རིག་བྱེད་ཀྱི་བསྟི་གནས་ཁང་གི་ར་བའི་ནང་ཚོགས་འདུ་བསྐོང་ཚོགས་གནང་བའི་ཐོག ལྷོ་ཕྱོགས་རྒྱ་གར་བོད་དོན་རྒྱབ་སྐྱོར་འབྲེལ་མཐུད་ཁང་གི་འགན་འཛིན་དང་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཇེ་པི་ཨུར་ས་ Shri J.P.Urs ལགས་ཆེད་ཕེབས་གནང་ཡོད་འདུག ཚོགས་འདུའི་སྐབས་ཚོགས་མི་ ༡༦ ཙམ་མཉམ་ཞུགས་གནང་ཡོད།

ཐེངས་འདིར་གསར་འཛུགས་བྱུང་བའི་ཡན་ལག་ལས་ཁུངས་དེས་ས་གནས་སུ་ཕྱི་ཟླ་ ༩ ཚེས་ ༤ ནས་ ༡༤ བར་ཉིན་གྲངས་བཅུའི་རིང་ཀེ་རལ་མངའ་སྡེའི་ཨོ་ནམ་དུས་སྟོན་ Onam festival ཞེས་ཧ་ཅང་གྲགས་ཆེ་བ་སྲུང་བརྩི་ཞུ་སྐབས་བོད་དོན་དང་འབྲེལ་བའི་ལས་འགུལ་སྤེལ་རྒྱུའི་གྲོས་འཆར་བཏོན་འདུག

ཀ་ལི་ཀཊ་ཧིན་བོད་མཛའ་འབྲེལ་ཚོགས་པའི་ཚོགས་མི་རྣམས་ནི། ཚོགས་གཙོ་སྐུ་ཞབས་ཨ་ནུབ་ཨ་ནནྡཱ་་ཡོ་གི་ Dr. Anoope Anandayogi ལགས་དང་། ཚོགས་གཞོན་སྐུ་ཞབས་ཀུན་ཇི་ན་ར་ཡན་ Kunjhi Narayanan ལགས། དྲུང་ཆེ་སྐུ་ཞབས་ཨེམ་ཨིག་བྷལ་ཁན་ M. Iqbal Khan ལགས། ཟུང་དྲུང་ལྕམ་ཨེ་ཨེས་ཤབ་ནམ་ A. S. Shabhnam ལགས། དངུལ་གཉེར་སྐུ་ཞབས་ཨུ་མར་ཁན་ Ummer Khan ལགས་བཅས་ཡིན་འདུག

རྩ་བའི་ཀ་ལི་ཀཊ་ས་གནས་སུ་ཧིན་བོད་མཛའ་འབྲེལ་ཚོགས་པ་འཛུགས་རྒྱུ་ནི་ཕྱི་ལོ་ ༢༠༡༦ ཟླ་ ༧ ཚེས་ ༢༣ དང་ ༢༤ བཅས་ཉིན་གྲངས་གཉིས་རིང་རྒྱ་གར་ལྷོ་ཕྱོགས་ཀར་ན་ཊ་ཀའི་གྲོང་ཁྱེར་ཧུབ་ལེར་ཚོགས་པའི་རྒྱ་གར་ལྷོ་ཕྱོགས་ཁུལ་གྱི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་སྐབས་ལས་འགུལ་སྤེལ་རྒྱུའི་ཆ་ཤས་ཤིག་ཡིན་འདུག ཧིན་བོད་མཛའ་འབྲེལ་ཚོགས་པ་ནི་རྒྱ་གར་རྒྱལ་ཡོངས་ནང་གྲགས་ཆེ་བའི་བོད་དོན་རྒྱབ་སྐྱོར་གྱི་ཚོགས་པ་ཞིག་ཡིན་པ་དང་ཚོགས་པ་དེའི་ཡན་ལག་རྒྱ་གར་རྒྱལ་ཡོངས་ནང་ཡོད་པ་བཅས།།