༢༠༡༦ ཟླ་ ༧ ཚེས་ ༢༦ རེས་གཟའ་མིག་དམར།

༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཊིམ་ཀེན་ Tim Kaine མཆོག་ཨ་རིའི་མང་གཙོ་ཚོགས་པའི་སྲིད་འཛིན་གཞོན་པའི་འོས་མིར་འདེམས་ཐོན་བྱུང་བར་འཚམས་འདྲིའི་འཕྲིན་ཡིག་ཅིག་ཕུལ་བའི་ནང་འཁོད་དོན། ངོས་ནས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་མཆོག་ཨ་རིའི་མང་གཙོ་ཚོགས་པའི་སྲིད་འཛིན་གཞོན་པའི་འོས་མིར་འདེམས་ཐོན་བྱུང་བར་དགའ་བསུའི་འཚམས་འདྲི་ཞུ་རྒྱུ་ཡིན། ཞེས་དང་།

དེ་བཞིན་སྲིད་སྐྱོང་མཆོག་གིས་སྐུ་ཞབས་ཊིམ་ཀེན་མཆོག་ནས་གྲོང་སྡེ་སྤྱི་ཁྱབ་པ་དང་། མངའ་སྡེའི་སྲིད་སྐྱོང་དང་སྲིད་སྐྱོང་གཞོན་པ། གྲོས་ཚོགས་གོང་མའི་འཐུས་མི་བཅས་གནང་བའི་ལས་ཡུན་རིང་ཆོད་སེམས་བརྟན་པོས་མང་ཚོགས་ཀྱི་སྲི་ཞུ་བསྒྲུབས་པར་ཡི་རང་བསྔགས་བརྗོད་ཞུས་ཡོད་པ་མ་ཟད་དབུ་ཁྲིད་མཆོག་ཏུ་གྱུར་པ་ཞིག་ལའང་ངོས་འཛིན་ཞུས་འདུག

གཞི་རྩའི་སྲིད་སྐྱོང་མཆོག་ཨ་རི་ཁུལ་དུ་གཞུང་འབྲེལ་ཕྱོགས་ཕེབས་སྐབས་དང་། ཕྱི་ལོ་ ༢༠༡༤ དང་ ༢༠༡༥ ལོ་སོ་སོར་ཧེ་ལི་ཕེག་སི་ནང་རྒྱལ་སྤྱིའི་བདེ་འཇགས་གླེང་སྟེགས་ Halifax International Security Forum ཞེས་པའི་ལྷན་ཚོགས་སྐབས་བཅས་སུ་སྐུ་ཞབས་ཊིམ་ཀེན་མཆོག་དང་ལྷན་མཇལ་འཕྲད་ཐེངས་མང་གནང་མྱོང་ཡོད།

སྤྱིར་ཕྱི་ལོ་ ༢༠༡༦ ཟླ་ ༧ ཚེས་ ༢༢ ཉིན་ཨ་རིའི་མང་གཙོ་ཚོགས་པའི་སྲིད་འཛིན་འོས་མི་ཧི་ལེ་རི་ཁི་ལིན་ཊོན Hillary Clinton མཆོག་གིས་ཨ་རིའི་གྲོས་ཚོཌ་གོང་མའི་འཐུས་མི་ཊིམ་ཀེན་ Tim Kaine མཆོག་སྲིད་འཛིན་གཞོན་པའི་འོས་མིར་འདེམས་རྒྱུའི་གསལ་བསྒྲགས་གནང་ཡོད་པ་བཅས།།