༢༠༡༦ ཟླ་ ༦ ཚེས་ ༤ རེས་གཟའ་སྤེན་པ།

༄༅། །ཕྱི་ལོ་ ༢༠༡༦ ཟླ་ ༥ ཚེས་ ༢༨ ཉིན་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ CBSE ཀྱི་འཛིན་རིམ་བཅུ་པའི་རྒྱལ་ཡོངས་ཡིག་རྒྱུགས་ཆེན་མོའི་གྲུབ་འབྲས་གསལ་བསྒྲགས་གནང་ཡོད། དེ་ཡང་འདི་ལོར་བོད་པའི་སློབ་གྲྭ་ཁག་ ༢༧ ནས་སློབ་ཕྲུག་གྲངས་ ༡༦༠༩ ཡིག་རྒྱུགས་ཆེན་མོའི་ནང་ཆ་ཤས་བླངས་ཁོངས་ནས་སློབ་ཕྲུག་གྲངས་ ༡༤༡༩ ཡིག་རྒྱུགས་འཕྲོད་འདུག འོན་ཀྱང་ད་ལྟའི་ཆར་སློབ་ཕྲུག་གྲངས་ ༡༩༠ ནས་སོ་སོའི་གྲུབ་འབྲས་ཡར་རྒྱས་གཏོང་རྒྱུའི་གོ་སྐབས་ Eligible for Improvement of Performance ཡོད་པའི་ཁོངས་སུ་འཇོག་ཡོད་འདུག

འདི་ལོའི་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་འཛིན་རིམ་བཅུ་པའི་རྒྱལ་ཡོངས་ཡིག་རྒྱུགས་ཆེན་མོའི་གྲུབ་འབྲས་ནང་བོད་པའི་སློབ་གྲྭ་ཁག་གི་རྒྱུགས་འཕྲོད་པའི་ཆ་སྙོམ་གྱི་བརྒྱ་ཆ་ ༨༨།༡༢ ཡིན་པ་དང་། སྔ་ལོའི་ཡིག་རྒྱུགས་འཕྲོད་པའི་བརྒྱ་ཆ་ ༩༦༌༦༧ ཡིན་འདུག སླར་ཡང་འདི་ལོར་བུ་ལས་བུ་མོའི་ཡིག་རྒྱུགས་འཕྲོད་ཚད་ཀྱི་བརྒྱ་ཆ་ཕྲན་བུ་མཐོ་བ་བྱུང་འདུག་པ་བཅས།།