༢༠༡༦ ཟླ་ ༦ ཚེས་ ༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༥ ཚེས་ ༣༡ ཉིན་བཀའ་དྲུང་ཡིག་ཚང་ནས་གསལ་བསྒྲགས་གནང་བའི་ནང་། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་ ༡༩(༡)་འོག་དང་། བཙན་བྱོལ་བོད་མིའི་བཅའ་ཁྲིམས་ལེའུ་དང་པོ་དོན་ཚན་ ༡ ནང་གསེས་ ༣ བཅས་ཀྱི་དགོངས་དོན། ཕྱི་ལོ་ ༢༠༡༦ ཟླ་ ༥ ཚེས་ ༢༤ ཉིན་དཔལ་ལྡན་བཀའ་ཤག་ནས་བཀའ་ཟུར་འབྲོང་ཆུང་དངོས་གྲུབ་མཆོག་ལྡི་ལི་སྐུ་ཚབ་དོན་གཅོད་དུ་བསྐོ་གཞག་སྩལ་དོན་ལྟར་ཕྱི་ལོ་ ༢༠༡༦ ཟླ་ ༧ ཚེས་ ༡༥ ནས་ལས་ཁུར་འགོ་འཛུགས་གནང་རྒྱུ་གནང་སོང་བའི་གསལ་བསྒྲགས་སུ། ཞེས་འཁོད་ཡོད།
བཀའ་ཟུར་འབྲོང་ཆུང་དངོས་གྲུབ་མཆོག་ནི། ཕྱི་ལོ་ ༡༩༧༧ ཟླ་ ༦ ཚེས་ ༡༥ ནས་བདེ་སྲུང་ལས་ཁུངས་སུ་ལོ་གཅིག་ཚོད་བལྟའི་རྒན་དྲུང་དུ་བསྐོ་གཞག་དང་། ཕྱི་ལོ་ ༡༩༧༨ ཟླ་ ༩ ཚེས་ ༡ ནས་རྒན་དྲུང་ངོ་མར་བསྐོ་གཞག ཕྱི་ལོ་ ༡༩༨༧ ཟླ་ ༣ ཚེས་ ༤ ནས་གནས་བདུན་པར་གནས་སྤར་དང་སྦྲགས་བདེ་སྲུང་ལས་ཁུངས་ཀྱི་དྲུང་གཞོན་དུ་བསྐོ་གཞག ཕྱི་ལོ་ ༡༩༩༡ ཟླ་ ༧ ཚེས་ ༡ ནས་གནས་སྤར་དང་འབྲེལ་བདེ་སྲུང་དྲུང་ཆེ་ལས་རོགས་སུ་བསྐོ་གཞག ཕྱི་ལོ་ ༡༩༩༡ ཟླ་ ༩ ཚེས་ ༢༥ གནས་རང་འཇགས་ཐོག་བདེ་སྲུང་དྲུང་ཆེ་ལས་ཚབ་ཏུ་བསྐོ་གཞག ཕྱི་ལོ་ ༡༩༩༣ ཟླ་ ༤ ཚེས་ ༡༦ ནས་བདེ་སྲུང་ལས་ཁུངས་ཀྱི་དྲུང་ཡིག་ཆེན་མོར་བསྐོ་གཞག་གིས་བདེ་སྲུང་དྲུང་ཆེའི་ལས་ཁུར་བཞེས་མུར། བཀའ་ཤག་སྐབས་བཅུ་གསུམ་པའི་ནང་བཀའ་བློན་དུ་བདམས་ཐོན་བྱུང་བར་བརྟེན། སྒྲིག་གསལ་ལྟར་ཕྱི་ལོ་ ༢༠༠༧ ཟླ་ ༡༠ ཚེས་ ༤ ནས་རྒས་ཡོལ་སྔ་བསྣུར་ཞུས། དེ་ནས་སླར་ཡང་བཀའ་ཤག་སྐབས་བཅུ་བཞི་པའི་བཀའ་བློན་དུ་བདམས་ཐོན་གྱིས་མུ་མཐུད་བདེ་སྲུང་བཀའ་བློན་གྱི་ལས་ཁུར་བཞེས། ཕྱི་ལོ་ ༢༠༡༦ ཟླ་ ༤ ཚེས་ ༦ ཉིན་བཀའ་བློན་གྱི་ལས་གནས་ནས་དགོངས་ཞུ་གནང་ཡོད་པ་བཅས།།