༢༠༡༦ ཟླ་ ༦ ཚེས་ ༡༤ རེས་གཟའ་མིག་དམར།
༄༅། །ཕྱི་ལོ་ ༢༠༡༦ ཟླ་ ༦ ཚེས་ ༡༣ ཉིན་༸གོང་ས་མཆོག་ཨ་རིའི་ནང་༸ཞབས་སོར་བདེ་བར་འཁོད་མཚམས་མཛད་འཕྲིན་གྱི་ཐོག་མར་ཨ་རིའི་ཞི་བདེའི་བསྟི་གནས་ཁང་དུ་ཆིབས་སྒྱུར་བཀའ་དྲིན་བསྐྱངས། སྐབས་དེར་བསྟི་གནས་
ཁང་གི་ཚོགས་གཙོ་ལྕམ་སྐུ་ནན་སི་ལིན་བྷོག་ Nancy Lindborg མཆོག་དང་། ཨ་རིའི་གྲོས་ཚོགས་ཀྱི་མང་གཙོ་ཚོགས་པའི་ཚོགས་གཙོ་ལྕམ་ནན་སི་པི་ལོ་སི་ Nancy Pelosi མཆོག་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་དང་སྦྲགས། ཞོགས་ཟས་ལྷན་བཞེས་མཛད། སྐབས་དེར་ལྕམ་སྐུ་པི་ལོ་སི་མཆོག་གིས་གསུང་དོན། ༸གོང་ས་མཆོག་འདི་གར་ཆིབས་སྒྱུར་ནམ་བསྐྱངས་སྐབས་ང་ཚོར་དགའ་མོས་ཧ་ཅང་ཡོང་བཞིན་འདུག ལྷག་པར་ཉེ་ཨོར་ལེན་ཌོར་མི་གསོད་ཁྲག་སྦྱོར་གྱི་གོད་ཆག་བྱུང་སྐབས་འདིར་ང་ཚོར་སྐུ་ཉིད་མཆོག་གི་དགོས་མཁོ་སྔར་ལས་ལྷག་པ་ཞིག་ཆགས་སོང་། ཞེས་ངོ་སྤྲོད་དང་སྦྲགས་གསུངས་རྗེས་༸གོང་ས་མཆོག་གིས་བཀའ་སློབ་སྩལ་དོན། དོན་དམ་གྱི་ཞི་བདེ་སེམས་ནང་ནས་ཡོང་དགོས། གལ་ཏེ་ང་ཚོའི་སེམས་ནང་དངངས་སྐྲག་དང་དོགས་པ་སོགས་ཀྱིས་ཁེངས་ནས་ཡོད་ན། ཞི་བདེ་ཡོང་ཐབས་བྲལ།
དེར་བརྟེན་བསྟི་གནས་ཁང་འདི་ལྟ་བུས་རྒྱུ་མཚན་དང་རིག་པ་གཙོ་བོར་གཞི་བཞག་པའི་ཐོག་ནས་བསམ་བློར་བཟོ་བཅོས་རྒྱག་ཐབས་གནང་དགོས་པ་ལས་བྱིན་རླབས་ལ་བརྟེན་ནས་བསམ་བློ་བཅོས་ཐབས་བྲལ། བདེ་སྡུག་ཇི་འདྲ་ཡོང་མིན་གཙོ་བོ་རང་གི་ལས་ཇི་འདྲ་བསགས་མིན་ལ་རག་ལུས་ཡོད། བསྟི་གནས་ཁང་འདིས་ཞི་བདེ་སྐྲུན་རྒྱུར་ཆོད་སེམས་བརྟན་པོ་ཡོད་པ་ངོས་ཀྱི་ཤེས། འོན་ཀྱང་ཞི་བདེ་སྐྲུན་པར་ཤེས་ཡོན་ངེས་པར་དུ་དགོས། དེང་དུས་ཤེས་ཡོན་འདི་གཙོ་བོ་ཕྱི་དངོས་པོའི་འཛུགས་སྐྲུན་ལ་གཞི་བཅོལ་ནས་ཡོད་སྟབས་ད་ཆ་ང་ཚོས་ནང་གི་ཤིས་རྒྱུད་དང་འབྲེལ་བའི་རིན་ཐང་དེ་དག་ཐོག་དོན་གཉེར་མང་ཙམ་བྱེད་དགོས། དེ་འདྲ་བྱུང་བ་ཡིན་ན་བརྒྱ་ཕྲག་འདིའི་བར་མཚམས་སུ་ང་ཚོས་འཛམ་གླིང་སྔར་བས་ཞི་བདེ་ཆེ་བ་སྐྲུན་ཐུབ། ཅེས་བཀའ་སློབ་སྩལ། སྐབས་དེར་བསྟི་གནས་ཁང་གི་ཚོགས་གཙོ་ལྕམ་སྐུ་ནན་སི་ལིན་བྷོག་མཆོག་གིས་གསུང་དོན།
ཉེ་ལམ་ང་ཚོའི་བསྟི་གནས་ཁང་འདིའི་སློབ་ཕྲུག་གཞོན་སྐྱེས་ཁག་གཅིག་བཞུགས་སྒར་དུ་༸གོང་ས་མཆོག་མཇལ་བཅར་ཞུས་ནས་རྩོད་རྙོག་རྣམས་འཚེ་མེད་ཞི་བ་གྲོས་མོལ་བརྒྱུད་སེལ་དགོས་པའི་སྐོར་བགྲོ་གླེང་ནང་ལྷན་ཞུགས་གནང་ཡོད་སྐོར་སྙན་སྒྲོན་ཞུས་པར། ༸གོང་ས་མཆོག་གིས་གཞོན་སྐྱེས་དེ་དག་གི་སྙིང་སྟོབས་དང་ལྷག་བསམ་ལ་བསྔགས་བརྗོད་དང་སྦྲགས་འབྱུང་འགྱུར་རེ་བ་བཟང་པོ་ཞིག་ཡོད་སྐོར་བཀའ་སློབ་སྩལ། སྐབས་དེར་དེང་སྐབས་དཀྱིལ་ཤར་ཡུལ་གྲུ་གཙོ་བོར་གྱུར་བའི་འཛམ་གླིང་ས་ཕྱོགས་གང་སར་བཙན་བྱོལ་བའི་གྲངས་འབོར་ཇེ་མང་དུ་འགྲོ་བཞིན་པའི་གནས་སྟངས་དེར་གཟིགས་ཚུལ་ཇི་ལྟར་ཡོད་སྐོར་དྲི་བར་༸གོང་ས་མཆོག་གིས་བཀའ་ལན་སྩལ་དོན། བཙན་བྱོལ་བ་དེ་དག་ལ་རོགས་རམ་གནང་མཁན་ཚོར་ངོས་ཀྱིས་ཡི་རང་བསྔགས་བརྗོད་ཞུ་བཞིན་ཡོད། འོན་ཀྱང་སྡོད་ཁང་ཙམ་སྤྲད་པས་ཕན་རྒྱུ་མ་རེད། ཕུགས་ལ་རྙོག་གྲ་ཡོད་སའི་ས་ཁུལ་དེ་དག་ནང་ཞི་བདེ་སླར་གསོ་ཡོང་ཐབས་བྱེད་དགོས། དུས་སྐབས་དེའི་རིང་གཞོན་སྐྱེས་ཚོར་ཤེས་ཡོན་དང་ལག་ཤེས་སོགས་སྦྱོང་བརྡར་སྤྲད་ནས་རང་གི་རྒྱལ་ཁབ་ཉམས་པ་སླར་གསོའི་ལས་འགུལ་སྤེལ་ཐུབ་པ་ཞིག་བཟོ་དགོས། སྤྱིར་མི་ཚེའི་ནང་དཀའ་ངལ་འཕྲད་རྒྱུ་ཡིན། འོན་ཀྱང་སེམས་ནང་ཞི་བདེ་ཡོད་ན་དཀའ་ངལ་འཕྲད་སྐབས་གདོང་ལེན་བྱ་རྒྱུ་ལས་སླ་བ་ཡོད། དེ་འདྲ་ཡོང་བར་ཤེས་ཡོན་གྱི་ཐབས་ལམ་ཉག་གཅིག་ལ་བརྟེན་ནས་ཕྱོགས་ཡོངས་ཀྱི་གནས་སྟངས་ལ་ལྟ་ཐུབ་པ་བྱ་རྒྱུ་འདི་རེད། དེའི་ཐོག་ནས་ཚན་རིག་ཐོག་ནས་གཏན་ལ་ཕབ་པའི་རིག་པ་དང་ང་ཚོ་ཚང་མས་ཐུན་མོང་གི་ཉམས་མྱོང་དང་ཚོར་སྣང་ལ་གཞི་བཅོལ་ནས་བསམ་བློ་ཇེ་བཟང་དུ་གཏོང་རྒྱུ་འདི་རེད། ཅེས་བཀའ་ལན་སྩལ། སྐབས་དེར་བསྟི་གནས་ཁང་གི་ཚོགས་གཙོ་ལྕམ་སྐུ་ནན་སི་ལིན་བྷོག་མཆོག་གིས་སྐལ་ལྡན་བློ་གྲོས་ལགས་དང་ཨ་རིའི་སྐུ་ཚབ་དོན་གཅོད་སྐྱེ་རྡོར་ཨུ་དཀར་ཚང་ལགས་སོགས་ཀྱིས་ཞི་བདེའི་བསྟི་གནས་ཁང་གི་གཞོན་སྐྱེས་རྣམས་རྡ་སར་བཅར་རྒྱུར་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུས་གནང་ཡོད།
དེ་རྗེས་༸གོང་ས་མཆོག་གིས་གཙུག་ལག་སློབ་གྲྭའི་ཚོགས་ཁང་གཞན་ཞིག་ཏུ་ཆིབས་སྒྱུར་བསྐྱངས་ནས་མང་ཚོགས་བརྒྱ་ཕྲག་བརྒལ་བར་བཀའ་སློབ་སྩལ། དེ་ཡང་ཐོག་མར་༸གོང་ས་མཆོག་གིས་ཉེ་ལམ་ཨ་རིའི་གྲོང་ཁྱེར་ཕི་ལོ་རི་ཌའི་ནང་མི་གསོད་ཁྲག་སྦྱོར་གྱི་དོན་རྐྱེན་འོག་འདས་པོ་རྣམས་ལ་ཐུགས་སྨོན་མཛད། དེ་ནས་༸གོང་ས་མཆོག་གིས་དེང་གི་འཛམ་གླིང་ནང་སེམས་ཀྱི་ཞི་བདེ། ཞེས་པའི་བརྗོད་གཞིའི་ཐོག་བཀའ་སློབ་སྩལ། །
