ཕྱི་ལོ་ ༢༠༡༦ ཟླ་ ༦ ཚེས་ ༢༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༦ ཚེས་ ༡༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྷོ་ཁེ་ལི་ཕོར་ནི་ཡའི་ཁུལ་གྱི་མཛད་འཕྲིན་གཉིས་པའི་ཐོག་མར། ༸གོང་ས་མཆོག་གི་བཞུགས་གནས་མགྲོན་ཁང་དུ་བོད་རིགས་སྤྱི་མཐུན་ཚོགས་པས་ཇི་
ལྟར་གསོལ་འདེབས་ཞུ་དོན་ལྟར་ཁུལ་དེར་གནས་སྡོད་བོད་མི་ ༤༠༠ ཙམ་ལ་བླང་དོར་བཀའ་སློབ་སྩལ་དོན། ང་ཚོའི་ཆབ་སྲིད་ཀྱི་ཐོག་ནས་ཆ་བཞག་ན་རྒྱ་ནག་ནང་འགྱུར་བ་ཏན་ཏན་འགྲོ་གི་རེད། ང་ཚོ་བོད་པ་ཚོར་ཆ་བཞག་ན་ང་ཚོས་མང་གཙོའི་ལམ་གྱི་ཐོག་གཏན་འཁེལ་ཏེ་འགྲོ་བཞིན་ཡོད། བར་སྐབས་ང་ཚོས་འོས་བསྡུའི་ལས་རིམ་སྐབས་ཨ་རི་དང་རྒྱ་གར་གྱི་ཆབ་སྲིད་པ་ཚོས་ལད་ཟློས་ཕྲན་བུ་བྱས་ཡོད། ཁ་ཐུག་དེར་ཐལ་འཚུབ་ཕྲན་བུ་ལངས་སོང་སྟེ་ད་ཆ་ཐལ་འཚུབ་ཚང་མ་འཇགས་བསྡད་ཡོད། ནམ་མཁའ་གཡའ་དག་དང་ས་གཞི་རྡུལ་དག་ཡིན།
ཁྱེད་རང་ཚོ་ཚང་མ་བློ་བདེ་པོ་བྱོས། ངོས་རང་ཆ་བཞག་ན་ཁ་སེང་སྨན་བཅོས་ལ་ཕྱིན་རྗེས་སྨན་པས་གཟུགས་པོའི་མ་རྩ་ཧ་ཅང་ཡག་པོ་འདུག་ཟེར་བྱུང་། སྨན་བཅོས་བྱེད་རྒྱུ་ལས་སླ་པོ་བྱུང་། ངོས་རང་བདེ་ཐག་ཆོད་ཡོད། ན་ནིང་ངོས་རང་རྒྱ་མིའི་སྨན་པ་ཞིག་ཐུག་པ་རེད། ཁོང་གིས་ངོས་ཀྱི་རྩ་དང་གདོང་ལ་བལྟས་ནས་ཞིབ་འཇུག་བྱས་རྗེས་ཕྱོགས་བསྡོམས་དེར་རྒྱལ་བ་རིན་པོ་ཆེ་དགུང་ལོ་བརྒྱ་བཞུགས་པ་ལ་ཐེ་ཚོམ་མི་འདུག་ཅེས་བརྗོད་བྱུང་། ཉེ་ཆར་ལོན་ཌོན་གྱི་གནམ་ཐང་དུ་ཁྱུག་ཙམ་བསྡད་སྐབས་ངོས་ཀྱི་ངོ་ཤེས་ཁ་ཤས་ཤིག་ངོས་རང་ཐུག་ཏུ་བསླེབས་པ་རེད། ཁོང་ཚོས་ངོས་ཀྱི་གདོང་ལ་བལྟས་ནས་རྒྱལ་བ་རིན་པོ་ཆེའི་གདོང་ནི་ལོ་ངོ་དྲུག་ཅུ་ཙམ་གྱི་གདོང་བཟོ་འདྲ་འདུག་ཅེས་བརྗོད་བྱུང་།
དེ་ལྟ་བུའི་གཞོན་ཤ་དད་པོ་ཡོང་རྒྱུའི་རྒྱུ་རྐྱེན་གང་ཡིན་སྐོར་འདྲི་སྐབས་ངོས་ཀྱི་རྩེད་མོ་དང་སྦྲགས་དེ་ངའི་གསང་བ་རེད་ངོས་ཀྱིས་བཤད་ཀྱི་མ་རེད་ཅེས་བརྗོད་པ་ཡིན། ངོས་ཀྱིས་དེ་རྗེས་ཁོང་ཚོར་གཞན་དག་གང་ཡང་མེད། དངོས་གནས་དྲང་གནས་ངོས་རང་གི་ཉམས་མྱོང་རང་གི་ཐོག་ནས་སེམས་ཀྱི་ཞི་བདེ་དགོས་རྒྱུ་ཧ་ཅང་གལ་ཆེན་པོ་རེད་འདུག སེམས་ཀྱི་ཞི་བདེ་ཟེར་རྒྱུ་དེ་གླེན་པ་དང་ལྐུག་པ་བྱས་ཏེ་བསམ་བློ་དེ་ཙམ་མ་འཁོར་བར་བསྡད་པ་མིན་པར། བསམ་བློ་ཆ་ཚང་འཁོར་ཏེ་བཟང་ངན་གྱི་གནས་ཚུལ་རྒྱུན་རྐྱེན་དང་བཅས་པ་ཆ་ཚང་ཞིབ་ཚགས་པོ་ཤེས་པར་བྱས། འོན་ཀྱང་སེམས་ཚོར་གྱི་རིམ་པ་མར་བབ་སྟེ་ སེམས་ལྷོད་ལྷོད་བསྡད་ཐུབ་རྒྱུ། དེར་གཞན་ཕན་གྱི་བྱང་ཆུབ་སེམས་ཞེས་པས་ཧ་ཅང་ཕན་གྱི་འདུག རྟེན་འབྱུང་གི་དེ་ཁོ་ན་ཉིད་ཟེར་བའི་ལྟ་བས་ཧ་ཅང་ཕན་ཐོགས་འདུག གང་ལྟར་སེམས་ཁམས་རིག་པའི་ཐོག་ནས་སེམས་ཀྱི་ཁམས་ཤེས་པའི་ཐོག་ནས་རྣམ་རྟོག་འདྲ་མིན་སྐྱེས་སྐབས་དེར་གཉེན་པོ་བསྟེན་སྟངས་ཤེས་སྐབས་དེས་སེམས་ཀྱི་ཞི་བདེ་ཡོང་བར་གཙོ་བོ་དེས་ཕན་ཐོགས་ཡོང་བཞིན་འདུག སེམས་ཀྱི་ཞི་བདེས་གཟུགས་པོའི་གཞོན་ཤ་དོད་པོ་ཡོང་རྒྱུ་དེ་འདི་ལྟར་རེད་ཅེས་བརྗོད་པ་ཡིན།
ཁྱེད་རང་ཚོ་སྤོ་རྨོ་ཆགས་ཚར་མཁན་དེ་ཚོ་དེ་ཙམ་བྱེད་རྒྱུ་གང་ཡང་མེད། སྤོ་རྨོ་མ་ཆགས་མཁན་ཚོ་སེམས་ཀྱི་ཞི་བདེ་ཡག་པོ་བྱུང་ན་ཕོ་གསར་མོ་གསར་གྱི་གདོང་དེ་ཡུན་རིག་བསྡད་ཀྱི་རེད། ཁྱེད་རང་ཚོ་ས་ཁུལ་གང་དུ་བསྡད་ཀྱང་བོད་པ་གཅིག་ཡིན་བསམ་པའི་འདུ་ཤེས་དེ་མ་བྲལ་བར་བོད་སྤྱི་པའི་ལ་རྒྱ་དང་། བོད་རྒྱ་ཆེའི་མི་མང་གིས་ད་བར་དཀའ་ལས་བརྒྱབ་སྟེ་ཆབ་སྲིད་ཀྱི་ཐོག་ནས་བོད་དུམ་བུར་ཕྱིན་ཡོད་ཀྱང་། བོད་ཀྱི་ཆོས་དང་རིག་གཞུང་གི་ཐོག་ནས་མི་རབས་ནས་མི་རབས་ལོ་སྟོང་ཕྲག་ལྷག་གི་རིང་བོད་ཆོལ་ཁ་གསུམ་ཡོངས་རྫོགས་ཀྱི་བོད་ཀྱི་རིག་གཞུང་བདག་པོ་བརྒྱབ་སྟེ་བསྡད་པ་རེད། ང་ཚོས་ཀྱང་དེ་དེ་བཞིན་གཟབ་གཟབ་བྱོས་ཨང་། ཆབ་སྲིད་ཀྱི་འབོད་སྒྲ་སྒྲོག་རྒྱུ་གལ་ཆེན་པོ་རེད། འོན་ཀྱང་གཙོ་བོ་དུས་རྒྱུན་ལྡན་ནས་སོ་སོ་བོད་མི་རིགས་ཀྱི་ཁྱད་ཆོས་དེ་སོ་སོའི་གོམས་གཤིས་ལ་འཇགས་པ་བྱེད་དགོས། བོད་པ་ཞེས་བརྗོད་སྐབས་དཔེ་མཚོན་ཐུབ་རྒྱུ་ཞིག་བྱེད་དགོས། གཞན་བར་སྐབས་བོད་པ་ནང་ཁུལ་གསོད་རེ་གཏོང་རྒྱུ་བྱུང་ཡོད། དེ་ཚོ་གྲས་ཁག་མེད། འོན་ཀྱང་སྐྱོན་དེ་སྐྱོན་དུ་མཐོང་བའི་སྒོ་ནས་དེ་ལྟ་བུ་མི་ཡོང་བའི་སྔོན་འགོག་དེ་རྒན་པ་ཚོས་གཞོན་པ་བསླབ་ཡིན་ནའང་རེད། ཡང་ན་ཁྱེད་རང་ཚོ་ནང་ཚགས་ཡིན་ནའང་རེད། གང་ལྟར་ང་རང་ཚོ་ཞི་བདེ་བག་དང་ལྡན་པའི་མི་རིགས་ཤིག་ཡིན་པ་དེ་གསོན་གནས་ཐུབ་རྒྱུ་ཧ་ཅང་གལ་ཆེན་པོ་རེད། ཅེས་བཀའ་སློབ་སྩལ་རྗེས་ཨ་རིའི་ལྷོ་ཁེ་ལི་ཕོར་ནི་ཡ་མངའ་སྡེའི་ཝེས་མི་ནིས་ཊར་ Westminster ཞེས་པའི་གྲོང་ཁྱེར་ནང་གསར་དུ་བཞེངས་པའི་ཝེ་ཐི་ནམ་ནང་པའི་དགོན་པ་ Dieu Ngu དབུ་འབྱེད་ཀྱི་མཛད་སྒོར་ཆིབས་སྒྱུར་བསྐྱངས་ཏེ་ཁུལ་དེར་ཡོད་པའི་ཝེ་ཐི་ནམ་གཞོན་སྐྱེས་ཚོར་ཡ་རབས་སྤྱོད་བཟང་བྱེད་དགོས་པ་དང་། ལྷག་པར་དུས་རབས་ཉི་ཤུ་རྩ་གཅིག་པ་འདི་ཞི་བདེའི་དུས་རབས་ཤིག་ཏུ་བསྐྲུན་རྒྱུར་གཞོན་སྐྱེས་ཚོར་འགན་འཁྲི་ཡོད་སྐོར་བཀའ་སློབ་སྩལ་ཡོད། །
མཆན། འདི་གའི་བོད་ཡིག་དྲ་རྒྱའི་ཐོག་ཕྱི་ལོ་ ༢༠༡༦ ཟླ་ ༦ ཚེས་ ༢༠ ཉིན་༸གོང་ས་མཆོག་གིས་ཁེ་ལི་ཕོར་ནི་ཡའི་ཁུལ་དུ་གནས་སྡོད་བོད་རིགས་རྣམས་ལ་བཀའ་སློབ་སྩལ་བ། ཞེས་པའི་ནང་། ཕྱི་ལོ་ ༢༠༡༦ ཟླ་ ༦ ཚེས་ ༡༩ ཉིན་ྋགོང་ས་ྋསྐྱབས་མགོན་ཆེན་པོ་མཆོག་གིས་ཁུལ་དེར་བོད་མི་རྣམས་ལ་བཀའ་སློབ་སྩལ་སྐབས་ ༼བར་སྐབས་ང་ཚོས་འོས་བསྡུའི་ལས་རིམ་སྐབས་ཨ་རི་དང་རྒྱ་གར་གྱི་ཆབ་སྲིད་པ་ཚོའི་ལད་ཟློས་ཕྲན་བུ་བྱས་ཡོད། ཁ་ཐུག་དེར་ཐལ་འཚུབ་ཕྲན་བུ་ལངས་སོང་ཡང༌། ད་ཆ་ཐལ་འཚུབ་ཚང་མ་འཇགས་བསྡད་ཡོད། ནམ་མཁའ་གཡའ་དག་དང་ས་གཞི་རྡུལ་དག་ཡིན། ཁྱེད་རང་ཚོ་ཚང་མ་བློ་བདེ་པོ་བྱོས། ཞེས་བཀའ་སློབ་སྩལ་ཡོད་ཀྱང་། འདི་ནས་བཀའ་སློབ་ཡིག་ཐོག་ཏུ་ཕབ་སྐབས་ “ད་ཆ་ཐལ་འཚུབ་ཚང་མ་འཇགས་བསྡད་ཡོད་” ཅེས་པའི་ཚབ་ཏུ་”ད་ཆ་ཐལ་འཚུབ་ཕྲན་བུ་འཇགས་བསྡད་ཡོད་”ཅེས་ཡིག་ནོར་སོང་འདུག་པར་དགོངས་སེལ་ཞུ་རྒྱུ་དང་ད་ཆ་ནོར་བཅོས་ཞུས་ཟིན་པ་བཅས།།
