ཕྱི་ལོ་ ༢༠༡༦ ཟླ་ ༦ ཚེས་ ༢༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༦ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་ཁེ་ལི་ཕོར་ནི་ཡ་མངའ་སྡེའི་གྲོང་ཁྱེར་ཝེ་སི་ཊི་མིན་སི་ཊར་དུ་གསར་དུ་བཞེངས་པའི་ཝེ་ཐི་ནམ་ནང་པའི་དགོན་པ་ Dieu Ngu ནས་ཇི་ལྟར་གདན་ཞུའི་གསོལ་འདེབས་ཞུས་པར་བཀའ་བཞེས་ལེགས་པར་ཐོབ་སྟེ། བཀའ་ཆོས་དང་སངས་རྒྱས་སྨན་ལྷའི་བཀའ་དབང་སྩལ་ཡོད།
དེ་ཡང་མགོན་པོ་གང་ཉིད་མཆོག་ཝེ་ཐི་ནམ་ནང་པའི་དགོན་པ་གསར་པར་ཆིབས་སྒྱུར་བསྐྱངས་སྐབས་དགོན་པ་དེའི་མཁན་པོ་ Thich Vien Ly ལགས་དང་། ཁོང་གི་སྤུན་མཆེད་ Thich Vien Huy ལགས་རྣམ་གཉིས་ཀྱིས་ཕེབས་བསུའི་སྣེ་
ལེན་གཟབ་རྒྱས་ཞུས་ཏེ་བཞུགས་ཁྲིར་༸ཞབས་སོར་མཁོད་བསྟུན། དེར་འདུས་ཝེ་ཐི་ནམ་དང་བོད་རིགས་དགེ་འདུན་པ་རྣམས་ལ་འཚམས་འདྲི་དང་འབྲེལ་བཀའ་སློབ་སྩལ་དོན། བརྩེ་བའི་སྤུན་ཟླ་ཕོ་མོ་རྣམ་པ། ངོས་རང་དེ་རིང་འདིར་ཁྱེད་རང་ཚོ་དང་ཐུག་རྒྱུ་བྱུང་བ་ཧ་ཅང་དགའ་པོ་བྱུང་། གོ་སྒྲིག་ཚོགས་ཆུང་གི་ངོས་ནས་ང་ཚོར་གོ་སྐབས་འདི་གནང་བར་ཐུགས་རྗེ་ཆེ་ཞུ་རྒྱུ་ཡིན། ང་ཚོ་ཚང་མ་ལུས་དང་སེམས་གང་གི་ཆ་ནས་འགྲོ་བ་མི་གཅིག་མཚུངས་ཤིག་ཆགས་ཡོད།
ངོས་རང་མི་སུ་འདྲ་ཞིག་དང་འཕྲད་སྐབས་ང་ཚོ་ཚང་མ་འགྲོ་བ་མི་གཅིག་མཚུངས་ཡིན་བསམ་པ་དྲན་གྱི་འདུག ང་ཚོ་ཚང་མ་ཐོག་མར་མ་ནས་སྐྱེས་པ་དང་མཐར་མཚི་སྟངས་སོགས་གཅིག་མཚུགས་ཡིན། མའི་བྱམས་བརྩེ་ནི་ཕྲུ་གུའི་འཚར་ལོངས་ལ་ཧ་ཅང་གལ་ཆེན་པོ་ཆགས་ཡོད།
ཚན་རིག་པས་བརྟག་དཔྱད་བྱས་འབྲས་སུ་གཞིས་རྩའི་འགྲོ་བ་མིའི་རང་བཞིན་བྱམས་བརྩེ་་ལྡན་པ་ཞིག་ཡིན་པ་ར་སྤྲོད་ཐུབ་ཡོད། ཆོས་ཁས་ལེན་མིན་ལ་མ་ལྟོས་པར་སེམས་ཞི་བདེ་ཡོང་རྒྱུའི་ཆ་རྐྱེན་གཙོ་བོ་དེ་བྱམས་བརྩེ་ཆགས་ཡོད།
གཞན་ཡང་དུས་རྟག་ཏུ་ཞེ་སྡང་དང་འཇིགས་སྣང་སོགས་ཀྱིས་གཞན་དབང་དུ་འགྱུར་ནས་བསྡད་པ་ཡིན་ན། ཆགས་སྡང་གི་བློ་མ་རུང་པ་དེ་དག་གིས་མིའི་ལུས་པོའི་ནང་ནད་སྔོན་འགོག་གི་ནུས་རྫས་ immune systems ཞེས་པ་དེ་ཉམས་རྒུད་དུ་ཕྱིན་ནས་ལུས་པོ་རང་བཞིན་གྱིས་ཉམས་རྒུད་འགྲོ་བ་དང་ནད་ཀྱི་ལམ་སེང་མནར་ཉེན་ཡོད་པ་ཤོད་ཀྱི་ཡོད། དེ་ལས་ལྡོག་སྟེ་གལ་ཏེ་གཞན་ལ་བྱམས་བརྩེ་སྤེལ་བ་ཡིན་ན་སྙིང་སྟོབས་འཕེལ་ཞིང་སེམས་ནང་ཞི་བདེ་ཡོང་བཞིན་ཡོད། དེར་བརྟེན་ལུས་ཡང་བདེ་ཐང་ཡོང་བཞིན་ཡོད།
སོ་སོའི་མི་ཚེ་འདི་དོན་དང་ལྡན་པ་ཞིག་དགོས་རྒྱུ་ཧ་ཅང་གལ་ཆེན་པོ་རེད། འོན་ཀྱང་ང་ཚོ་མི་ཚེའི་བརྒྱུད་རིམ་ནང་བྱམས་བརྩེའི་རིན་ཐང་མཐོང་གི་མེད། གཞན་ལ་ཇི་ཙམ་བརྩེ་བ་བྱས་ན་སོ་སོའི་ལུས་པོ་བདེ་བ་དང་། སྤྱི་ཚོགས་ནང་ཡིད་ཆེས་བསླེབས་པ་བརྒྱུད། འཆམ་པོ་ཡོང་རྒྱུ། གྲོགས་པོ་མང་བ་བཟོ་ཐུབ་ཀྱི་ཡོད།
ཕྱི་དངོས་པོའི་ཡར་རྒྱས་དང་འགྲན་ཟླ་ཅན་གྱི་དུས་སྐབས་འདིར་བྱམས་བརྩེ་ནི་འབྲེལ་བ་མེད་པ་ལྟ་བུ་སྣང་སྲིད། ཆོས་དད་མེད་མཁན་ཚོས་ནང་སེམས་ཀྱི་ཞི་བདེར་དོ་སྣང་དེ་ཙམ་མེད། ཡིན་ནའང་ང་ཚོ་ཚང་མ་འགྲོ་བ་མི་ཞིག་ཡིན་པའི་ཆ་ནས་བྱམས་པ་དང་བརྩེ་བ་དགོས་གནད་ཅན་ཞིག་ཡིན། ཞེས་སོགས་ཀྱི་བཀའ་སློབ་སྩལ་རྗེས་ནང་ཆོས་ངོ་སྤྲོད་རྒྱས་པ་ཞིག་སྩལ་ཡོད། ཕྱེད་ཡོལ་༸གོང་ས་མཆོག་གིས་སངས་རྒྱས་སྨན་ལྷའི་རྗེས་གནང་བཀའ་དྲིན་སྩལ་ཡོད་པ་བཅས།།
