ཕྱི་ལོ་ ༢༠༡༦ ཟླ་ ༦ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༦ ཚེས་ ༡༢ རེས་གཟའ་ཉི་མའི་ཉིན་གྱི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་རྒྱལ་ས་ཝ་ཤིང་ཊོན་གྱི་ Park Hyatt ཞེས་པའི་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་གཙོས་ཨ་རི་སྐུ་ཚབ་དོན་གཅོད་དབུ་དཀར་ཚང་སྐལ་རྡོར་ལགས་དང་། བོད་མི་མང་སྤྱི་འཐུས་ཚོགས་ཟུར་སྤེན་པ་ཚེ་རིང་མཆོག དེ་བཞིན་བོད་རིགས་དང་བོད་དོན་རྒྱབ་སྐྱོར་བས་ལག་ཏུ་དཀར་གཙང་མཇལ་དར་དང་གྲོ་སོ་ཕྱེ་མར། ཆང་ཕུད་སོགས་ཐོགས་ཏེ་སྲོལ་རྒྱུན་གྱི་ལམ་ནས་ཕེབས་བསུ་གཟབ་རྒྱས་ཞུས་ཡོད།
དེ་ཡང་མཛད་འཆར་ལྟར་ན་ཕྱི་ཚེས་ ༡༣ ཉིན་གྱི་ཕྱེད་ཡོལ་ཨ་རིའི་རྒྱལ་ས་ཨ་རི་ཝ་ཤིང་ཊོན་དུ་བོད་རིགས་སྤྱི་མཐུན་ཚོགས་པས་གོ་སྒྲིག་འོག ཁུལ་དེར་རྟེན་གཞི་བྱས་པའི་ཨ་རིའི་གཙུག་ལག་སློབ་གཉེར་ཁང་གི་ Bender Arena ཞེས་པའི་རྩེད་རར་དེང་དུས་ཀྱི་འཛམ་གླིང་ནང་སེམས་ཀྱི་ཞི་བདེ་བསྐྲུན་ཐབས་ཞེས་པའི་བརྗོད་གཞིའི་ཐོག་བཀའ་སློབ་བསྩལ་རྒྱུ་དང་།
ཕྱི་ཚེས་ ༡༨ ཉིན་ཨ་རིའི་ཁེ་ལི་ཕོར་ནི་ཡ་མངའ་སྡེའི་གྲོང་ཁྱེར་ཝེ་སི་ཊི་མིན་སི་ཊར་དུ་ཝེ་ཐི་ནམ་ནང་པའི་དགོན་པ་གསར་པར་ Dieu Ngu རང་གཞན་གཉིས་ཀར་རིན་ཐང་དཔྱིས་ཕྱིན་པ་ཞིག་ཡོང་ཆེད་བྱམས་བརྩེའི་གལ་གནད། ཅེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ། ཕྱི་ཚེས་ ༡༨ ཉིན་ཝེ་ཐི་ནམ་ནང་པའི་དགོན་པ་གསར་པར་ཆོས་འབྲེལ་དང་སངས་རྒྱས་སྨན་ལྷའི་བཀའ་དབང་བསྩལ་རྒྱུ།
ཕྱི་ཚེས་ ༡༩ ཉིན་ཝེ་ཐི་ནམ་ནང་པའི་དགོན་པ་དབུ་འབྱེད་ཀྱི་མཛད་སྒོར་དབུ་བཞུགས་མཛད་རྒྱུ་དང་། མཛད་སྒོར་བཅར་བའི་ཝེ་ཐི་ནམ་གཞོན་སྐྱེས་ཁག་གཅིག་དང་ལྷན་གླེང་མོལ་མཛད་རྒྱུ་ཡིན་འདུག
ཕྱི་ཚེས་ ༢༡ ཉིན་ཡུ་ཊ་གཙུག་ལག་སློབ་གཉེར་ཁང་དང་ཡུ་ཊ་བོད་ཀྱི་ཐེབས་རྩ་ཐུན་མོང་གིས་གོ་སྒྲིག་འོག ཨ་རིའི་ཡུ་ཊ་མངའ་སྡེའི་སོལ་ཊི་ལེཀ་ Salt Lake City གྲོང་ཁྱེར་དུ་ཡོད་པའི་ཡུ་ཊ་གཙུག་ལག་སློབ་ཁང་གི་ Huntsman Center ཞེས་པའི་རྩེད་རར་བྱམས་བརྩེ་དང་ཀུན་ཁྱབ་འགན་ཁུར་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག
ཕྱི་ཚེས་ ༢༣ ཉིན་གྱི་སྔ་དྲོ་ཀོ་ལོ་རེ་ཌོ་བོད་རིགས་སྤྱི་མཐུན་ཚོགས་པས་གོ་སྒྲིག་འོག ཨ་རིའི་ཀོ་ལོ་རེ་ཌོ་མངའ་སྡེའི་བྷོལ་ཌར་གྲོང་ཁྱེར་དུ་ཡོད་པའི་ཀོ་ལོ་རེ་ཌོ་གཙུག་ལག་སློབ་ཁང་གི་ Coors Event Center ཞེས་པའི་རྩེད་རར་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་དང་། ཕྱེད་ཡོལ་ཁུལ་དེར་བསམ་བློའི་སློབ་གསོ། ཞེས་པའི་བརྗོད་གཞིའི་ཐོག་མི་མང་ལ་བཀའ་སློབ་བསྩལ་རྒྱུ། ཕྱི་ཚེས་ ༢༥ ཉིན་ཨིན་ཌི་ཡ་ན་ནང་པའི་ཆོས་ཚོགས་དང་ Interfaith Cooperation and Compassionate Indy ཞེས་པའི་ཚོགས་པས་ཟུང་འབྲེལ་གྱིས་གོ་སྒྲིག་འོག བྱམས་བརྩེ་ནི་འཛམ་གླིང་ཞི་བདེའི་ཀ་བ་ལྟ་བུ་ཡིན། Compassion as a pillar of World Peace ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བསྩལ་རྒྱུ་སོགས་ཀྱི་མཛད་འཆར་ཡོད་པ་བཅས།།
