༢༠༡༦ ཟླ་ ༦ ཚེས་ ༡༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༦ ཚེས་ ༡༥ ཉིན་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་ཕྱི་དྲིལ་བོད་ཀྱི་འགྲེམས་སྟོན་ཚན་པས་མཐུན་འགྱུར་འོག་སྐལ་བཟང་འཇིགས་མེད་ལགས་ཀྱིས་གོ་སྒྲིག་ཞུས་པའི་ In Frame ཞེས་པའི་པར་རིགས་འགྲེམས་སྟོན་དབུ་འབྱེད་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་། ཕྱི་དྲིལ་བོད་ཀྱི་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས། སྐལ་བཟང་འཇིགས་མེད་ལགས། གསར་འགོད་པ་བཅས་ལྷན་འཛོམས་ཀྱིས་ཐོག་མར། ཕྱི་དྲིལ་བོད་ཀྱི་འགྲེམས་སྟོན་ཚན་པའི་འགན་འཛིན་གྱིས་སྐལ་བཟང་འཇིགས་མེད་ལགས་ཀྱི་ལོ་རྒྱུས་སོགས་ངོ་སྤྲོད་ཞུས་གྲུབ་མཚམས་སྐལ་བཟང་འཇིགས་མེད་ལགས་ཀྱིས་པར་རིགས་འགྲེམས་སྟོན་ཞུས་དགོས་པའི་རྒྱུ་མཚན་དང་། དམིགས་ཡུལ། མ་འོངས་ལས་འཆར་སོགས་ངོ་སྤྲོད་ཞུས། དེ་ནས་སྐུ་མགྲོན་གཙོ་བོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་གསུང་བཤད་གནང་དོན། པར་རིགས་འགྲེམས་སྟོན་འདི་ཧ་ཅང་གལ་ཆེན་པོ་ཡིན་པ་དང་། ལྷག་པར་དེང་སྐབས་མི་ཕལ་མོ་ཆེར་རྩོམ་རིང་པོ་དེ་འདྲ་ཀློག་རྒྱུའི་དུས་ཚོད་དེ་ཙམ་མེད་སྟབས། པར་བལྟས་ནས་གནས་ཚུལ་མང་པོ་རང་བཞིན་ཤེས་རྟོགས་ཐུབ་བཞིན་ཡོད། དེ་རིང་སྐལ་བཟང་འཇིགས་མེད་ལགས་ཀྱིས་འགྲེམས་སྟོན་ཞུས་པའི་པར་རིགས་དེ་དག་ལ་འགྲེལ་བཤད་རྩ་བ་ཉིད་ནས་མེད། པར་རང་ལ་བལྟས་ནས་གོ་བ་ལེན་ཐུབ་པ་མ་གཏོགས་དམིགས་བསལ་འགྲེལ་བཤད་གང་ཡང་མེད་པའི་པར་རིགས་ཁག་གཅིག་འདིར་སྒྲིག་འདུག
དེང་སྐབས་བརྙན་འཕྲིན་དང་། ཟུར་ཟའི་རི་མོ། འགྲེམས་སྟོན་སོགས་བརྒྱུད་ལམ་ཐོག་ནས་མི་མང་པོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་དང་། བོད་པའི་རྩ་དོན། བོད་པའི་རིག་གཞུང་སྲུང་སྐྱོབ་ཆེད་ཕན་ཐོགས་ཧ་ཅང་ཆེན་པོ་ཡོད་པར་བརྟེན། ངས་སྐལ་བཟང་འཇིགས་མེད་ལགས་ཀྱིས་གཞོན་སྐྱེས་ཞིག་གིས་ཆེད་ལས་ངོ་བོའི་ཐོག་ནས་བོད་ཁྱིམ་སློབ་ཐོན་རྗེས། པར་ལེན་གྱི་སྒྱུ་རྩལ་སློབ་སྦྱོང་བྱས་པ་མ་ཟད། དེའི་ཐོག་དབྱིངས་ཞུགས་ནས་རང་ཁ་རང་གསོ་བྱེད་རྒྱུའི་འགན་འཁུར་ནས་ In Frame ཞེས་པའི་སྒྲིག་འཛུགས་བཙུགས་ཐུབ་པ་ཙམ་དུ་མ་ཟད། དེ་རིང་འགྲེམས་སྟོན་བྱེད་བཞིན་པར་བསྔགས་བརྗོད་ཞུ་རྒྱུ་དང་། འབྱུང་འགྱུར་བྱ་བ་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན།
ལྷག་པར་ཁོང་གིས་དམིགས་ཡུལ་དོན་ཚན་གསུམ་བཞག་འདུག དང་པོ་ནི། ལོ་འཆར་ཅན་པར་རིགས་འགྲེམས་སྟོན་གནང་རྒྱུ་དང་། དེ་དང་མཉམ་དུ་གཞོན་སྐྱེས་ཚོར་པར་རིགས་སྒྱུ་རྩལ་ཐོག་དོ་དབྱིངས་སྔར་ལྷག་ཡོང་སླད་པར་རིགས་འགྲན་བསྡུར་ཡང་གོ་སྒྲིག་གནང་རྒྱུ་ཡིན་པ་འདི་ཧ་ཅང་ཡག་པོ་རེད། ང་ཚོའི་སྤྱི་ཚོགས་ནང་པར་ལ་དོ་སྣང་མེད་མཁན་ཕལ་ཆེར་མེད། འོན་ཀྱང་པར་སྒྲིག་གཤོམ་གྱིས་གཞན་ལ་འགྲེམས་སྟོན་བྱེད་མཁན་ཧ་ཅང་ཉུང་ཉུང་རེད། དེར་བརྟེན་དེ་རིང་གཞོན་སྐྱེས་ཞིག་གིས་པར་རིགས་འགྲེམས་སྟོན་གནང་བ་ཧ་ཅང་ཡག་པོ་རེད་ཞུ་རྒྱུ་ཡིན།
དེ་བཞིན་གོང་དུ་ཁོང་གིས་ཟླ་བ་གཉིས་རེའི་མཚམས་པར་གྱི་དུས་དེབ་ཞིག་གདོན་གྱི་གསུངས་པ་རེད། དུས་དེབ་གདོན་རྒྱུ་ཧ་ཅང་གལ་ཆེན་པོ་རེད། དུས་དེབ་བརྒྱུད་ནས་བོད་པའི་རིག་གཞུང་དང་། རྩ་དོན། ༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་ངོ་སྤྲོད་ཞུ་རྒྱུར་ཐུགས་ཕན་ཆེན་པོ་གསོ་གི་རེད། འོན་ཀྱང་དེ་ལས་ལྷག་དུས་དེབ་དེ་གདོན་རྒྱུར་གནས་སྐབས་རིང་དཔལ་འབྱོར་དཀའ་ངལ་ཡོད་སྟབས། ཟླ་བ་གཉིས་རེའི་མཚམས་གདོན་མ་ཐུབ་ནའང་ལོ་རེར་ཐེངས་བཞི་ཙམ་གདོན་ནས་མུ་མཐུད་འདོན་སྤེལ་དགོས་རྒྱུ་ཧ་ཅང་གལ་ཆེན་པོ་རེད་སེམས་ཀྱི་འདུག བོད་པའི་སྤྱི་ཚོགས་ནང་དུས་དེབ་སོགས་མང་པོ་བཏོན། ལོ་དང་པོ་དང་གཉིས་པར་ཧ་ཅང་ཚགས་ཚུད་པོ་དང་སྤུས་དག་པོ་བཏོན། གང་ཙམ་ཞིག་ནས་མཚམས་ཆད་འགྲོ་གི་འདུག དེ་འདྲ་མིན་པ་ཞིག་གནང་དགོས། ལས་གཞི་ཐོག་མར་འགོ་འཛུགས་པ་བཞིན་མཇུག་བསྐྱལ་ཐུབ་པ་དགོས་རྒྱུ་ཧ་ཅང་གལ་ཆེན་པོ་རེད། ཅེས་སོགས་ཀྱི་གསུང་བཤད་གནང་།།
