༢༠༡༦ ཟླ་ ༦ ཚེས་ ༣ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༦ ཚེས་ ༢ ཉིན་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ལས་ཉིན་གཉིས་པའི་ལས་རིམ་དུ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་མུ་མཐུད་བགྲོ་གླེང་གནང་ཡོད་པ་དང་ཆབས་ཅིག མདོ་སྨད་སྤྱི་འཐུས་ཚེ་རིང་གཡུ་སྒྲོན་ལགས་དང༌། དབུས་གཙང་སྤྱི་འཐུས་བསྟན་འཛིན་འཇམ་དབྱངས་ལགས་རྣམ་གཉིས་ཀྱིས་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་མདུན་དུ་ལས་འཁུར་དམ་འབུལ་ཞུས་ཡོད། སྤྱི་འཐུས་ཚེ་རིང་གཡུ་སྒྲོན་ལགས་ཕྱི་ལོ་ ༢༠༡༦ ཟླ་ ༥ ཚེས་ ༣༠ ཉིན་སྤྱི་འཐུས་རྣམ་པའི་དམ་འབུལ་ཉིན་མོར་བཅར་ཐུབ་མེད་པ་དང༌། སྤྱི་འཐུས་བསྟན་འཛིན་འཇམ་དབྱངས་ལགས་ནི། དབུས་གཙང་སྤྱི་འཐུས་ཤར་གླིང་བསྟན་འཛིན་ཟླ་སྒྲོན་ལགས་བཀའ་བློན་དུ་བདམས་ཐོན་བྱུང་སྟབས། དབུས་གཙང་སྤྱི་འཐུས་ཀྱི་སྒུག་ཐོ་ཨང་རིམ་རྩེ་རྟོག་བཞིན་སྤྱི་འཐུས་སུ་བདམས་ཐོན་བྱུང་བ་ཞིག་ཡིན་པ་བཅས། །
