༢༠༡༦ ཟླ་ ༥ ཚེས་ ༦ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཤེས་རིག་ལས་ཁུངས་སུ་ཚན་རིག་སློབ་དེབ་རྩོམ་སྒྲིག་པ་གཅིག་སྡེ་ཚན་འགན་འཛིན་གྱི་གནས་རིམ་ཐོག་ལོ་གཉིས་རིང་ཆོད་གན་ངོ་བོར་བསྐོ་གཞག་བྱ་རྒྱུ་ལགས་ན། གཤམ་གསལ་དགོས་མཁོའི་ཆ་རྐྱེན་ཚང་ཞིང་། གོང་གསལ་ལས་རིགས་ཐོག་དོ་དབྱིངས་དང་ཞུགས་བློ་ཡོད་རིགས་ནས་སོ་སོའི་ལག་ཁྱེར་ཡིག་ཆ་ཁག་དང་སྦྲགས་འཚང་སྙན་ཕྱི་ལོ་ ༢༠༡༦ ཟླ་ ༥ ཚེས་༣༡ འགྱངས་མེད་ཤེས་རིག་ལས་ཁུངས་སུ་འབུལ་དགོས་པ་དང་། ཆ་རྐྱེན་ཚང་བའི་སྙན་འབུལ་བ་རྣམས་ལ་འདི་ནས་འདེམས་སྒྲུག་ཚོགས་ཆུང་ཆེད་འཛུགས་ཀྱིས་འདེམས་རྒྱུགས་གཏོང་རྒྱུ་ཡིན།
དགོས་ངེས་ཆ་རྐྱེན།
༡། ཤེས་ཚད་དམའ་མཐར་ཚན་རིག་སློབ་ཚན་ཐོག་ཉེ་བའི་གཙུག་ལག་རབ་འབྱམས་པ་(B.Sc)དང་། ཡང་ན་དེ་དང་མཉམ་པའི་ཤེས་ཚད་ཡོད་པ།
༢། རྩོམ་སྒྱུར་གྱི་ལས་ཀའི་སྦྱོང་བརྡར་དང་ཉམས་མྱོང་ཡོད་པ།
༣། ཀམ་པུ་ཊར་ཤེས་ཚད་གང་ལེགས་ཡོད་པ།
༤། དེབ་གཟུགས་ཇུས་འགོད་དང་རྩོམ་སྒྲིག་གི་ཉམས་མྱོང་ཡོད་པ།
༥། ཁྲིམས་མཐུན་དུས་འགྱངས་ཞུས་པའི་སྐྱབས་བཅོལ་ལག་དེབ་ཀྱི་ཤོག་ངོས་དང་པོ་དང་མཐའ་མའི་འདྲ་བཤུས།
༦། བོད་མིའི་དང་བླངས་དཔྱ་དངུལ་ལག་དེབ་འབུལ་བབ་ཕྱི་ལོ་༢༠༡༦ བར་གཙང་ཟིན་གྱི་འདྲ་བཤུས།
༧། ངོས་འཛིན་ཡོད་པའི་སྨན་ཁང་ཞིག་ནས་གཟུགས་ཐང་ལས་འཕེར་ཡིན་པའི་སྨན་པའི་ངོས་སྦྱོར།
༨། ད་ལྟ་སྡེ་ཚན་གང་རུང་དུ་ལས་ཞབས་ཞུ་མུས་ཡིན་ཚེ་ལས་ཡུལ་ནས་དགག་བྱ་མེད་པའི་ངོས་སྦྱོར།
གོང་གསལ་ཡིག་ཆ་ཁག་གི་འདྲ་བཤུས་ཐོག་བོད་མིའི་སྒྲིག་འཛུགས་ཀྱི་ཟུང་དྲུང་ཡན་དང་། ས་གནས་འགོ་འཛིན། ཡང་ན་བོད་མིའི་སློབ་གྲྭའི་སློབ་སྤྱི་བཅས་གང་རུང་གི་དག་མཆན་ངེས་པར་འགོད་རྒྱུ་བཅས་ཀྱི་གསལ་བསྒྲགས་སུ།
ཤེས་རིག་ལས་ཁུངས་ནས། ཕྱི་ལོ་༢༠༡༦ ཟླ་༥ ཚེས་༦ ལ།
