༢༠༡༦ ཟླ་ ༥ ཚེས་ ༡༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༥ ཚེས་ ༡༦ ཉིན་དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གོ་སྒྲིག་འོག རྡ་ས་དབུས་སྣེ་ལེན་འབྲེལ་མཐུད་ཁང་གི་ཚོགས་ཁང་དུ་ཕྱི་ཚེས་ ༡༦ ནས་ ༡༨ བར་ཉིན་གྲངས་གསུམ་རིང་བཙན་བྱོལ་བོད་མིའི་འཕྲོད་བསྟེན་ཡར་རྒྱས་གཏོང་ཕྱོགས་དང་འབྲེལ་བའི་དམིགས་བསལ་ཚོགས་ཆེན་ཐོག་འཕྲོད་བསྟེན་ཁྱབ་ཁོངས་རྒྱ་གར་གྱི་ས་གནས་ ༢༦ དང་བལ་ཡུལ་གྱི་ས་གནས་ ༡༠ དེ་བཞིན་མོན་གྷོ་དགའ་ལྡན་བྱང་རྩེ་དང༌། འབྲས་སྤུངས་བློ་གསལ་གླིང༌། སྒོ་མང་གྲྭ་ཚང༌། སེར་སྨད་གྲྭ་ཚང༌། སེར་བྱས་གྲྭ་ཚང༌། རྣམ་གྲོལ་གླིང༌། བཀྲ་ཤིས་ལྷུན་པོ། རྡ་ས་རྒྱུད་སྟོད། སྦིར་དཔལ་སྤུངས་ཤེས་རབ་གླིང༌། རཱཇ་སྤུར་ས་སྐྱ་སྨན་ཁང༌། བོད་ཀྱི་སྨན་རྩིས་ཁང་དབུས་དང་ཡན་ལག། བདེ་ལེགས་སྨན་ཁང༌། གསོ་བ་རིག་པ་སྨན་པའི་ལྷན་ཚོགས། བོད་ཕྲུག་ཁྱིམ་སྡེ་དང༌། མ་སུ་རི་བོད་ཁྱིམ། བོད་སློབ་འཛིན་ཚོགས་དང་སཾ་བྷོ་ཊ་ཁྱབ་ཁོངས་སློབ་གྲྭ ས་རཱ་བོད་ཀྱི་མཐོ་སློབ། ཝར་ཎ་མཐོ་སློབ། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང༌། ལྕགས་པོ་རིའི་དྲན་རྟེན་བོད་སྨན་སློབ་གཉེར་ཁང༌། དེ་བཞིན་བོད་ཀྱི་བདེ་རྩ་བཅས་ནས་སྨན་པ་དང༌། སྨན་ཁང་འགན་འཛིན། སྨན་ཞབས་པ། འཕྲོད་ལས་པ་བཅས་ཁྱོན་མི་གྲངས་ ༡༢༩ མཉམ་ཞུགས་གནང་ཡོད།
ཚོགས་འདུའི་ཐོག་གཤམ་གསལ་གྲོས་གཞི་ཁག་གི་ཐོག་གོ་བསྡུར་གནང་རྒྱུ་ཡིན་འདུག
གྲོས་གཞི་དང་པོ།
ཕྱི་ལོ་ ༢༠༡༦ ཟླ་ ༣ ཚེས་ ༢༣ ཉིན་རྡ་ས་བཞུགས་སྒར་ཐེག་ཆེན་ཆོས་གླིང་གཙུག་ལག་གི་གསུང་ཆོས་རྭ་བར་བོད་ཀྱི་རྒྱལ་ས་ལྷ་སར་ྋརྒྱལ་མཆོག་སྐུ་ཕྲེང་ ༡༣ པ་ཆེན་པོ་མཆོག་གིས་ཕྱི་ལོ་ ༡༩༡༦ ལོར་བོད་ཀྱི་རྒྱ་ས་ལྷ་སར་སྨན་རྩིས་ཁང་ཕྱག་བཏབ་ནས་ལོ་ངོ་ ༡༠༠ འཁོར་བའི་དུས་དྲན་སྲུང་བརྩིའི་མཛད་སྒོར་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་དོན་དུ། ནད་རིགས་སྔོན་འགོག་ཐོག་འཕྲོད་བསྟེན་ལས་ཁུངས་ནས་འཐུས་ཤོར་ཧ་ཅང་ཕྱིན་པའི་བཟོ་ཞིག་འདུག སྨན་རྩིས་ཁང་གི་བོད་སྨན་སྡེ་ཚན་ཁུངས་ནས་ཀྱང་འཐུས་ཤོར་ཕྱིན་པའི་བཟོ་འདུག་ཅེས་སོགས་དུས་གསུམ་གསལ་གཟིཌ་ཀྱི་བཀའ་སློབ་ལྕི་ནན་ཕེབས་དོན་གཙོར་བཟུང་གིས་མི་མང་ལ་འཕྲོད་བསྟེན་ཞབས་ཞུ་ཡར་རྒྱས་གཏོང་ཐབས་སྤྱི་དང༌། ལྷག་པར་ནད་རིཌ་སྔོན་འགོགས་ཐོག་འཐུས་ཤོར་ག་པར་ཕྱིན་ཡོད་མེད་དང༌། འཐུས་ཤོར་གྱི་རྒྱུ་རྐྱེན་ཇི་ཡིན། འཐུས་ཤོར་ཕྱིན་པ་དེ་ཚོ་འཐུས་ཤོར་མ་འགྲོ་རྒྱུའི་ཐབས་ཤེས་གང་འདྲ་བྱེད་དགོས་མིན་སྐོར་གོ་བསྡུར།
གྲོས་གཞི་གཉིས་པ།
གོང་གསལ་བཀའ་སློབ་ཏུ་མུ་མཐུད་ནས་༸གོང་ས་མཆོག་གིས་ང་ཚོ་སྤྱི་ཚོགས་ནང་ཡ་རབས་བཟང་སྤྱོད་ཟེར་རྒྱུ་ཁ་ནས་བཤད་པ་མ་གཏོགས། ལག་ལེན་ངོ་མའི་ཐོག་ལ་ཚད་དམའ་རུ་འགྲོ་གི་ཡོད་པའི་བཟོ་འདྲ་འདུག་ཅེས་སོགས་བཀའ་སློབ་ཕེབས་དོན་བཞིན་སྨན་ཁང་དུ་བསྟེན་གཏུགས་བྱེད་མཁན་རྣམས་ནད་ན་ཚའི་སྡུག་བསྔལ་གྱིས་མནར་ནས་སྨན་ཁང་བསྟེན་མཁན་ཤ་སྟག་ཡིན་པར་བརྟེན་འཕྲོད་བསྟེན་འགོ་ལས་ཡོངས་ནས་རྣམ་ཀུན་མི་མང་དང་ལྷག་པར་ནད་པ་དང་མཉམ་ཡ་རབས་བཟང་སྤྱོད་དང་བྱམས་སྙིང་རྗེའི་སྒོ་ནས་གཅེས་སྐྱོང་བྱེད་ཕྱོགས་སྐོར་གོ་བསྡུར།
གྲོས་གཞི་གསུམ་པ།
ཡང་བཀའ་སློབ་ནང་། ད་ལྟ་བར་འགྲིག་ཙམ་འགྲིག་ཙམ་བྱས་ནས་ཁུངས་འཁྱོལ་བ་རེད། ག་ལེར་ག་ལེར་ང་ནི་ཉི་མ་ལ་བརྒལ་གྱི་མཚམས་ལ་བསླེབ་འགྲོ་གི་རེད། ལོ་བཅུ་བཅོ་ལྔ་བསྡད་ཀྱི་ཡོད་སྲིད། དེ་ནས་འཆི་འགྲོ་རྒྱུ་རེད། ཅེས་སོགས་གསུངས་དགོས་པའི་གནས་སྟངས་ནི་རང་ཅག་གཞིས་བྱེས་བོད་མི་སྤྱི་བོ་གནམ་བསྟན་ཡོངས་ནས་བཟོད་དཀའ་ཞིང་ཡིད་ལ་གཤོངས་ཐབས་མེད་པ་ཞིག་ཡིན་སྟབས་བདག་ཅག་རྣམས་ཀྱི་ངོས་ནས་མ་ཤེས་མ་རིག་དབང་གིས་ནོངས་པ་དང་འགལ་བར་གྱུར་པ་ཇི་ཡོད་ཐམས་ཅད་གནོངས་འགྱོད་དྲག་པོ་དང་བཅས་སྙིང་ནས་མཐོལ་བཤགས་ཞུ་རྒྱུ་དང༌། ཕྱིན་ཆད་སྤང་སྡོམ་ཚུལ་བཞིན་ཞུ་རྒྱུར་སྙིང་ཐག་པ་ནས་ཁས་ལེན་ཞུ་བ་ལགས་ན་ཐུགས་བརྩེ་བ་ཆེན་པོས་ཅི་ནས་བཟོད་པར་མཛད་དུ་གསོལ་རྒྱུའི་དམ་བཅའ་ཕུལ་ཏེ་མགོན་པོ་མཆོག་གི་ྋསྐུའི་གསང་གསུམ་མི་ཤིགས་རྡོ་རྗེའི་ཁམས་སུ་བརྟན་པར་བཞུགས་སུ་གསོལ་རྒྱུའི་གསོལ་བ་ཕུར་ཚུགས་སུ་འདེབས་རྒྱུའི་སྐོར་གོ་བསྡུར།
གྲོས་གཞི་བཞི་པ།
དབུས་དང་ས་གནས་ལས་བྱེད་དབར་གྱི་འབྲེལ་བ་དང༌། ལྷག་པར་ས་གནས་སྨན་ཁང་ལས་བྱེད་རྣམས་ཀྱིས་མི་མང་ལ་འགན་ཁུར་དང་ཞབས་ཞུ་ཚད་མཐོར་གཏོང་ཐབས་ཇི་ཡོད་སྐོར་གོ་བསྡུར།
གྲོས་གཞི་ལྔ་པ།
ས་གནས་འཕྲོད་བསྟེན་སྨན་ཁང་དང༌། ས་གནས་སྨན་རྩིས་ཁང༌། གྲྭ་ཚང་ཁག་གི་སྨན་ཁང༌། སློབ་གྲྭ་ཁག་གི་སྔོན་འགྲོའི་སྨན་ཁང་བཅས་དབར་ཕན་ཚུན་མཉམ་ལས་གནང་ཕྱོགས་དང༌། ས་གནས་རྒྱ་གར་སྨན་ཁང་ལ་འབྲེལ་བ་ཞུ་ཕྱོགས། དེ་བཞིན་རྒྱ་གར་དབུས་ས་གཞུང་ནས་མང་ཚོཌ་ཀྱི་འཕྲོད་བསྟེན་ཆེད་སྨན་བཅོས་མཐུན་འགྱུར་དང་རོཌ་རམ་ཐོབ་ཐབས་སྐོར།
གྲོས་གཞི་དྲུག་པ།
རང་རེའི་སྤྱི་ཚོགས་ནང་ནད་རིགས་ཁྱབ་གདལ་ཆེ་བའི་རིགས་ལ་སྔོན་འགོག་བྱ་ཐབས་ཇི་ཡོད་སྐོར།
གྲོས་གཞི་བདུན་པ།
གནད་དོན་གཞན་ཐོག་བཀའ་བསྡུར་གནང་རྒྱུ་ཡིན་འདུག་པ་བཅས།།
