༢༠༡༦ ཟླ་ ༥ ཚེས་ ༡༧ རེས་གཟའ་མིག་དམར།
༄༅། །ཕྱི་ལོ་ ༢༠༡༦ ཟླ་ ༥ ཚེས་ ༡༦ ཉིན་བོད་ཀྱི་དཔེ་མཛོད་ཁང་གི་ཚོགས་ཁང་ནང་བོད་མི་མང་སྤྱི་འཐུས་གངས་ལྷ་མོ་ལགས་ཀྱིས་རྒྱ་ཡིག་ནས་བོད་བསྒྱུར་གནང་བའི་༼འཛམ་གླིང་ཐོག་གི་བུད་མེད་གྲགས་ཅན།༽ ཞེས་པའི་དཔེ་དེབ་དབུ་འབྱེད་གནང་སོང་། དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༤ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་། བོད་མི་མང་སྤྱི་འཐུས་གངས་ལྷ་མོ་ལགས། ངག་དབང་བྱམས་པ་ལགས། གསར་འགོད་པ་བཅས་ལྷན་འཛོམས་ཀྱིས་ཐོག་མར་སྤྱི་འཐུས་གངས་ལྷ་མོ་ལགས་ཀྱིས་ྋརྒྱལ་བའི་སྐུ་དཔར་མཐོང་གྲོལ་རིན་པོ་ཆེར་མཇལ་དར་འབུལ་གྲུབ་མཚམས་སྐུ་མགྲོན་གཙོ་བོ་ནང་སྲིད་བཀའ་བློན་རྒྱ་རི་མཆོག་གི་དཔེ་དེབ་དབུ་འབྱེད་གནང་། དེ་ནས་སྤྱི་འཐུས་གངས་ལྷ་མོ་ལགས་ཀྱིས་བོད་ཀྱི་རྩོམ་པ་པོར་འབོད་སྐུལ་གནང་དོན།
བཙན་བྱོལ་གྱི་གནས་སྟངས་འདི་གཞན་དབང་སྟབས་བསྟུན་དང་དཀའ་ཚེགས་ཤིག་གི་འོག་ཏུ་ཡོད་པ་དང་། རྩོམ་པ་པོས་བྲིས་ཚད་ཚང་མར་རིན་ཐང་དང་ཚད་མཐོན་པོ། དེ་བཞིན་རྒྱལ་སྤྱིའི་སྡིངས་ཆར་སླེབས་ཐུབ་པའི་གྲགས་རྩོམ་དེ་འདྲའང་ཡོང་བར་དཀའ། འོན་ཀྱང་རྩོམ་པ་པོ་འབྲི་རྩོམ་གྱི་བྱ་བར་ཞུགས་ཚར་རྗེས་རྒྱུ་མཚན་སྣ་ཚོགས་ལ་བསྙད་དེ་སྨྱུག་ཐོགས་པའི་འོས་འགན་མཚམས་བཞག་ན། ཕམ་ཁའི་སྣེ་མོར་འཇུས་པ་དང་མཚུངས། རྩོམ་པ་པོས་བརྗོད་གཞིའི་ཁ་ཕྱོགས་གདམ་སྟེ་རྩོམ་གྱི་སྤུས་ཚད་ལ་ཁ་ཕྱོགས་ཐུབ་ན་ལེགས་ངེས་ཀྱང་། ཐོག་མར་རྩོམ་འབྲི་ནི། རྩོམ་པ་པོའི་ཉིན་རེའི་འཚོ་བའི་ནང་གི་རྒྱགས་ཕྱེ་ལྟ་བུ་ཡིན་པ་ཁྱོན་ནས་བརྗེད་མི་ཉེན། ཞེས་སོགས་ཀྱི་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། ཐོག་མར་ནང་སྲིད་ལས་ཁུངས་བུད་མེད་ནུས་སྟོབས་སྤེལ་བྱེད་ཀྱི་འགན་ཡོད་མཁན་བོད་མིའི་སྒྲིག་འཛུགས་ཀྱི་བཀའ་བློན་ཞིག་ཡིན་པའི་ངོས་ནས་དངོས་གནས་བྱས་རྗེས་ཅན་གྱི་ཉིན་མོ་ཞིག་ལ་ངོས་འཛིན་ཞུ་གི་ཡོད། གང་ཡིན་བརྗོད་ན་སྤྱིར་བཏང་བཙན་བྱོལ་ནང་ལ་བལྟས་པ་ཡིན་ན་བུད་མེད་རྩོམ་པ་པོ་ཉུང་ཤས་ཡིན་པ་ཞིག་ལ་ངོས་འཛིན་བྱེད་ཆོག་གི་རེད་བསམས་ཀྱི་འདུག དེའི་ནང་ནས་གངས་ལྷ་མོ་མཆོག་ལྟ་བུ་ཡིན་ན། ཆབ་སྲིད་བཙོན་ཟུར་ཞིག་ཡིན་པ། བོད་ནང་ནས་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་གི་སྲོག རང་གི་བདེ་སྐྱིད། རང་གི་འཚོ་བ་བློས་བཏང་ནས་ལས་འགུལ་སྤེལ་མཁན་གྱི་དཔའ་མོ་ཞིག་ཡིན་པར་བརྟེན་ནས་དུས་རྒྱུན་དུ་གུས་འདུད་ཞུ་ཡུལ་ཞིག་ཡིན། དྲག་གནོན་གྱི་སྲིད་བྱུས་འོག་ནས་སོ་སོའི་རྒྱལ་ཁབ་དང་མི་རིགས་ཀྱི་ལ་རྒྱའི་ཐོག་ནས་བྱ་བ་སྤེལ་བ་དེ་དག་ཧ་ཅང་ཡག་པོ་རེད། ཅེས་དང་། བཀའ་བློན་མཆོག་གིས་མུ་མཐུད་གསུང་བའི་ནང་། བོད་ནང་ད་དུང་རྒྱ་གཞུང་གི་བཙོན་ཁང་ནང་དཀའ་སྡུག་མྱོང་བཞིན་པའི་བོད་མི་མང་པོ་ཞིག་ཡོད་པ་དང་། འདིར་བཙན་བྱོལ་ནང་༸གོང་ས་མཆོག་གི་ཐུགས་རྗེའི་བཀའ་དྲིན་འོག་བཙན་བྱོལ་ནང་ཆབ་སྲིད་བཙོན་ཟུར་མང་པོ་ཞིག་མུ་མཐུད་སྤྱི་བའི་རྩ་དོན་ཐོག་ཐུགས་འཁུར་བཞེས་མཁན་ཡོད་པ། བོད་ནས་སེམས་ཁུར་ཅན་གྱི་བོད་མི་མང་པོ་ཞིག་རྒྱ་གར་དུ་བྲོས་བྱོལ་ཡོང་སྐབས་ལམ་དུ་དཀའ་ངལ་འཕྲད་པ་དང་ཚུར་འབྱོར་རྗེས་སྐད་ཀྱི་གོ་བརྡ་ལ་སོགས་པ་དཀའ་ངལ་མང་པོ་ཞིག་གདོང་ལེན་བྱས་པའི་མཐར་སོ་སོའི་ཕ་ཡུལ་དང་མི་རིགས་ཆེད་སྐུ་ལས་བསྐྱོན་ཐུབ་པ་བྱུང་ཡོད་པ་དེ་དག་ཚང་མ་སོ་སོའི་སྤྱི་ཚོགས་ཀྱི་ནུས་པ་དང་གཟི་བརྗིད་ཅིག་ལ་ངོས་འཛིན་གནང་གི་ཡོད་སྐོར། ཆབ་སྲིད་བཙོན་ཟུར་ནང་ནས་གངས་ལྷ་མོ་ལགས་ནི་བུད་མེད་ཆབ་སྲིད་བཙོན་ཟུར་ཞིག་ཡིན་པ་དང་། ཁོང་མོས་དགུ་བཅུ་གསུམ་དང་དེ་བཞིན་ལས་དོན་གཞན། ལྷག་པར་མི་མང་གི་འོས་འདེམས་བྱས་པའི་སྤྱི་འཐུས་གནང་བ་དེ་དག་བུད་མེད་ཚོར་སྙིང་སྟོབས་སྐྱེ་གཞི་ཞིག་ཡིན་པ། མཇུག་ཏུ་བཀའ་བློན་མཆོག་གིས་གསུང་བའི་ནང་། མང་གཙོའི་ནང་རྩོམ་པ་པོའམ་གསར་འགྱུར་བརྒྱུད་ལམ་གྱི་འགན་ཁུར་དང་ནུས་པ་དེ་ཤུགས་ཆེན་པོ་ཇི་ཙམ་ཡོད་མེད་ཚང་མས་མཁྱེན་གསལ་རེད། རྒྱལ་ཁབ་ཀྱི་ཆབ་སྲིད་འགྱུར་འགྲོས་ཆེན་པོ་ཡོང་བའི་སྐབས་དེར་གསར་འགྱུར་བརྒྱུད་ལམ་གྱི་ཐོག་ནས་ནུས་པ་ཆེན་པོ་ཐེབས་ཀྱི་ཡོད་པ་དེ་གཟིགས་རྒྱུ་ཡོད་པ། ལོ་རྒྱུས་ནང་བཀླག་རྒྱུ་ཡོད་པ་དངོས་འབྲེལ་ཆགས་ཡོད། དེར་བརྟེན་དེ་སྔོན་ངས་ཐེངས་ཁ་ཤས་ཞུས་མྱོང་། བཙན་བྱོལ་ནང་ཡོད་པའི་གསར་འགྱུར་བརྒྱུད་ལམ་ནང་ཕྱག་ལས་གནང་མཁན་ཚང་མར་ལས་འགན་ཆེན་པོ་ཞིག་ཆགས་ཡོད། དེ་ཡང་དང་པོ་དངོས་ཡོད་གནས་ཚུལ་གང་ཡིན་པ་དེ་འབྲེལ་ཡོད་ཚོས་མཁྱེན་ཐུབ་རྒྱུ་དེ་གཅིག་རེད། གཉིས་པ། བོད་ཀྱི་རྩ་དོན་བསྒྲུབ་ཆེད་བོད་ཀྱི་བདེན་པའི་གནས་སྟངས་འདི་འཛམ་གླིང་མི་མང་ལ་མཁྱེན་ཐུབ་འཇུག་རྒྱུ་དེ་གལ་ཆེན་པོ་རེད། དེར་བརྟེན་གསར་འགྱུར་བརྒྱུད་ལམ་པ་ཚོར་ལས་འགན་དམིགས་བསལ་ཞིག་ཡོད་སྟབས་དྲང་བདེན་ཐོག་ནས་བོད་དོན་ཁྱབ་བསྒྲགས་གནང་རྒྱུ་གལ་ཆེ་ཡིན། ཞེས་གསུངས།།
