༢༠༡༦ ཟླ་ ༥ ཚེས་ ༢༤ རེས་གཟའ་མིག་དམར།
༄༅། །སྐབས་བཅུ་བཞི་པའི་བཀའ་ཤག་གིས་ཇི་ལྟར་གསོལ་བ་བཏབ་པ་བཞིན། འདི་ལོའི་ཕྱི་ལོ་གསར་ཚེས་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་གར་ལྷོ་ཕྱོགས་སྦེལ་ཀོབ་ཆོས་སྡེ་ཆེན་པོ་བཀྲ་ཤིས་ལྷུན་པོའི་གདན་སར་ཕྱི་ལོ་ ༢༠༡༧ ཟླ་ ༡ པོའི་ནང་དུས་འཁོར་དབང་ཆེན་སྩལ་རྒྱུ་ཡིན་པའི་གསལ་བསྒྲགས་མཛད་ཡོད་པ་ལྟར། སྤྱི་ནོར་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་ཞལ་སྔ་ནས་བོད་རྒྱལ་ལོ་ ༢༡༤༣ རབ་གནས་མེ་སྤྲེལ་ཟླ་ ༡༡ ཚེས་ ༥ ནས་ ༡༧ བར་དང་། ཕྱི་ལོ་ ༢༠༡༧ ཟླ་ ༡ ཚེས་ ༣ ནས་ ༡༤ བར་འཕགས་ཡུལ་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་བཀའ་དྲིན་ཆེ་གཏན་འཁེལ་སྐོར་གསལ་བསྒྲགས་བྱེད་འཐུས་ཀྱི་བཀའ་བཟང་སྤྱི་སྨན་སྨིན་བྱུང་སོང་བ། དད་ལྡན་ཕྱི་ནང་མང་ཚོགས་ཡོངས་ནས་ཐུགས་འཇགས་ཡོང་བའི་གསལ་བསྒྲགས་སུ། བཀའ་དྲུང་ཡིག་ཚང་ནས། ཕྱི་ལོ་ ༢༠༡༦ ཟླ་ ༥ ཚེས་ ༢༤ ལ།།
